吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4277|回复: 7

说说我自家格故事(三)

[复制链接]
发表于 2009-6-24 07:17:56 | 显示全部楼层 |阅读模式
说说我自家格故事(三)
从小至今,气喘病一直搭我嬲夹弗清
气喘病,又叫做“吼病”,现在格医学名字叫做支气管哮喘。箇种毛病发作起来,一个人觉着胸口头像畀几几化化物事塞牢高仔实梗,只觉着进气短,出气长,几几乎呒不法子呼吸,喉咙里向勿断格发出“叽——诟,叽——诟”格声音,就像得仔瘟鸡病格鸡喉咙里发出来嘅箇种声音一似一样。人根本勿能平躺勒床浪,只得坐勒床浪向。坐格辰光一长,腰酸背痛,混身呒不一眼眼力气,真格只是比死人多一口气!。
我就是从小就有箇种毛病格人,直到现在,只要稍微有一点点勿当心,着个瀴(读作“印”,凉),或者伤个风,只要连勒浪两个喷嚏一打。箇末叫快得邪气得来,马上就会觉着胸口头像有物事勒浪塞进来,胸口闷起来,呼吸慢慢交勿舒畅,吼病就会开始发作起来。箇种毛病已经勒我身浪嬲夹弗清仔六十多年哉!
听伲爷娘告诉我,说我格气喘毛病是从我三、四岁辰光出痧子以后带出来嘅。“痧子”,现代医学称“麻疹”,是由“麻疹病毒”引起格一种勒婴幼儿当中传布格呼吸道传染病。现在格小人可以用接种疫苗的方法来避免罹病。我小辰光,还呒不箇种疫苗,所以差弗多每个小囡侪免勿脱出痧子格关口嘅。
就勒浪我出格痧子还朆好清格辰光,连牢仔又是一场“百日咳”。“百日咳”是中医格名字,是说箇种咳嗽格病相当弗容易好,断断续续勿停格咳嗽,约摸要咳一百日天方始会得漫漫交格好转起来。箇个病大约相当于西医说格“肺炎”。特别是出痧子连带百日咳,是个极凶险格疾病,弄得勿好,可能就会死人!我就是箇个出痧子带出来格百日咳格咳嗽毛病,最后变成功勒我身浪嬲(读作“绕”,纠缠)夹勿清仔六十多年格老气喘病。
我小辰光,作为一个男小干,日里总归是好动嘅。只要我日里向厌得过仔分,到夜里气喘病极可能就会发作。我格吼病一发作起来,伲姆妈就会起来陪我,一面用俚格手勒我胸口头、背心浪,前头、后头勿停格撸,想让我觉着舒服点,气喘也快一点平下来,好让我早点平平稳稳格睏下去。每到箇个辰光,伲爹爹也会马上着好衣裳,半夜三更出门,到街东横头格西药店“泰来药房”去,敲开仔药店格门,买吃气喘病格特效药转来畀我吃。箇种药片晓得一眼眼,药片格名字叫“麻黄素”。箇歇辰光,中国自家还不能做格箇种药片,爹爹从药店里买转来格箇种侪是外国货。药格效果极好,吃下去仔之后,气喘马上就停止,喉咙里箇种像瘟鸡叫格声音也听勿见哉,人也就能够平睏勒床浪,马上就能捆着。
本来只要勒身体起发格辰光注意饮食格营养,身体格健康搭仔生活个规律性,婴幼儿时期格某些疾病多半是能够带好嘅。我箇个人就是呒不实梗格好运气!我勒苏州市四中读高中一年级箇年(1957年),也正是我身体发育格关键时期,箇年格暑假刚开始格辰光,我突然发高烧,到医院经医生一诊断,是非常严重格发热病症,西医称作“副伤寒”,马上就收下来住院治疗。刚开始格辰光,高烧41℃。一张病危通知,吓得姆妈马上请人拿爹爹从南京喊仔转来。经过医院格抢救,总算拿我格姓名保住。勒医院里住仔一个多月,身体虽然逐渐得到恢复,小辰光得格吼病勒箇格关键时刻就朆能够随发身那箇个病带脱,一直留我身浪,搭我嬲夹勿清到仔将近古稀之年格现在。
也因为我气喘箇个顽疾长期缠身,气喘发作起来辰光缠磨格种种痛苦,年纪渐长,慢慢交自家也晓得要保护自家格身体哉。特别是离开学堂,走上社会以后,自觉嘅寻一点搭哮喘病格预防、治疗有关格资料、书籍来看看。晓得仔毛病源自家格过敏性体质,积累仔一点搭自家发病有关格过敏原因。还终于明白仔自家箇个病弗单单呒不根治格办法,而且还有遗传畀下一代格可能,只有通过中医药格长期调理,改善身体格健康状况,从根本浪增加自家对疾病格抵抗力,减少发病格次数、发病格频率,延缓身体体质格恶化。因此我也就勒天命之年(子曰;“五十而知天命”)对自家格人生作出了远离婚姻孓然一身格重大决定。
想通仔箇点点道理,自家反而觉着自由自在,可以无拘无束格支配自家格时间,根据格嗜好来安排自家格生活哉。
发表于 2009-6-24 11:49:53 | 显示全部楼层
哎哟,你有毛病啊。
发表于 2009-6-24 12:33:40 | 显示全部楼层
本帖最后由 cqdanielzh 于 2009-6-24 12:54 编辑

删掉。
发表于 2009-6-24 12:35:49 | 显示全部楼层
苏州的“吼病”,“吼”读什么调?
其他方言区有用“齁”的。“齁”似乎更讲得通一点。
发表于 2009-6-24 12:38:43 | 显示全部楼层
苏州的“吼病”,“吼”读什么调?
其他方言区有用“齁”的。“齁”似乎更讲得通一点。
cqdanielzh 发表于 2009-6-24 12:35

大约是平声
发表于 2009-6-24 12:39:48 | 显示全部楼层
谢谢。
发表于 2009-6-24 12:40:00 | 显示全部楼层
老苏州出生时死而复生,又有气喘病,多灾多难啊。
发表于 2009-6-24 12:48:07 | 显示全部楼层
苦恼个。我有一个大学同学也有哮喘个,发起来苦恼啊,要马上喷一种药水
伲乡下头“吼病”叫“透病”
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2021-9-27 13:03

Powered by Discuz! X3.4

© 2001-2017 Comsenz Inc.

快速回复 返回顶部 返回列表