88嘉定印象
我也想来学学张艺谋，来一个××印象。只勿过，文学功底实在勿哪能，写出来各物事要差得多。首先声明，20年前头个事体，如果有所出入，记了勿清爽，箇也是正常个。
我是88年毕业以后，勒拉最热个7月底到嘉定联华去报到工作个。之所以选勒拉7月底，老早国营厂做过个侪晓得个，中国工资个算法是半个月一算个，就算31号报到也可以拿半个月个工资个。
勒拉来嘉定之前，我只有2次搭嘉定有过联系，一次是中学辰光，伲松江二中搭嘉定一中交换过一次考卷，也就是我伲做嘉定一中个考卷，嘉定一中做我伲个考卷。当时对我讲，嘉定搭嘉兴是一样个，侪是遥远个地方。另外一次就是读大学辰光搭同学乘北嘉线千辛万苦到过秋霞圃、汇龙潭、还有埃只法华塔白相过一次。其它辰光，嘉定搭我浑身勿搭界个。呒没想到，勿但我个青春勒拉嘉定度过，并且搭嘉定结下一生个缘分。
嘉定县城拨我个第一印象就是小外加勿大闹猛。我勒拉松江读了6年中学，松江城厢镇个布局是蛮怪个，南到北估计只有2公里样子，东到西恨勿得有5公里勿止（瞎估计个）。而嘉定东到西，南到北侪只有2公里个样子（清河路搭城中路，西大街勿算）。松江从解放路（现改名谷阳路）到马路桥一埭路侪是商店。嘉定只是东一撮，西一撮，侪是勿成规模个几爿店，就连新嘉商场也是刚刚开出来个。就勒拉科大个对过，塔城路边浪，还有几块农田，里头种了一眼菜。
嘉定拨我个第二个印象是比较清爽、绿化好、安静。好像勒拉埃个辰光，城中路搭塔城路浪机非车道个隔离已经是用绿化带了。勿管是松江还是上海我读书个附近（我读书勒拉纺大，老早叫华纺，现在叫东华），清爽搭绿化侪比勿过嘉定个。按照当时辰光人个心态，到了一个单位侪是一辈子个事体，所以我想，嘉定环境勿错，一辈子做嘉定人也蛮好。
第三个印象是嘉定人个语言。埃个辰光，各乡箇镇个人到嘉定买房子还呒没开始，城里向侪是嘉定城厢镇人为主，勿过嘉定人讲几乎纯上海言话个人交关，年纪轻一眼个口音至少已经蛮接近上海话。而我读中学个辰光（78-84）松江城里基本呒没人讲上海言话，侪是一口松江言话。大概是因为嘉定市属单位比较多，上海人多个原因。有一个例子可以说明嘉定个特殊性：嘉定老早就用管道煤气了，外加是从上海市区用管道输送过来个。而松江，当时侪还勒拉用煤饼炉烧饭，呵呵。
正宗嘉定言话我第一句有印象是“haon”，表示弄，箇个是闻所未闻个。第二句有印象个是勒拉一部公共汽车浪向，有一个小囡问伊个娘目的地到了伐，伊问：“aon 到”，伊拉娘讲：“Ven 到”。我觉着搭苏州言话蛮接近个，觉着交关文雅。
嘉定对我影响最大个地方就是西大街。讲到西大街，不晓得从何里搭讲起。日日侪勒拉西大街经过，反而没啥物事好唠叨了。一句言话可以概括西大街――西大街比嘉定其它地方，至少落后10年。当时辰光，我几乎当仔时光倒流到70年代末。
以此纪念到嘉定工作20周年―――还有半年，就是20年了。
小囡请多指正。 |
发表于 2007-12-26 21:09:44
微信
QQ好友和群
收藏
分享
淘帖
崭个
推扳
提升卡
置顶卡
沉默卡
喧嚣卡
变色卡
显身卡
发表于 2011-9-30 12:19:56
发表于 2011-5-30 15:52:44
楼主