棋盘石（民间故事）

富春山越

棋盘石

           前昶，还十八老早时光，一小鬼头去山高头斫柴，斫了好一刹，吃力煞了。望见近头山背上有块平石头，就[蒙]1柴蓬窠里2邋3勒出去。坐徠4石头上，一腔5风打6过来，油出汗出格伊，觉到蛮蛮得过。弗晓得眼泡皮撒手7墜8落来，伊忖想9日头还蛮高，爽可10徠石头高头睏勒一觉再话。
    一觉醒来，揉了揉眼睛，只见一个[揄]11着红肚兜的小人头，在松树底落吃松子。斫柴小鬼见伊吃得介个味道，自家肚皮也感到嘈巴巴，就话：“ 小弟弟，好好畀12点我吃吃？”小人头一笑：“畀尔13吃好咯，弗过要陪我杀两盘棋咯。”搿当浪，斫柴小鬼还弗晓得小人头是个仙童。
    小鬼亦是棋迷，一听走棋，肚皮也弗觉到饿了，问到嚡里下棋？仙童讲：“就徕尔刚才睏过块平石上。”仙童用手指头徕石头高头扒勒几扒，石头高头上出现一个棋盘。就手14拣来些石子，往上一扎15，变勒棋子，两个人就走了起来。一边走一边吃松子，斫柴小鬼感到从来亦呒吃到介味道个东西。二人一起一落，走勒六盘，日头上上落落有六卯16，两人走了平局。
    等到第七卯太阳腾17起来时光，走了第七盘，宁旧18是个和棋。仙童叫小鬼头好回家了，还告诉他自家是仙童。仙童攀来关细竹，吹勒口气，变勒只马，叫小鬼头骑勒马落山去。
    斫柴小鬼到勒村口头，觉到全部变得陌里陌生，骑着马韬19了个大桶箍20，也咪个人认得。伊落勒马来，望见路边有间茅草屋，里头走出个老人，就上去问伊打听见看。两人讲了半半肆日21，才刚弄清老人还是伊个晚辈，排旦起來，还是伊个四十五六代孙了，上落千把年了。小鬼呆勒呆煞了：“山中方七日，世上巳千年。”
    后息来，搿块石头叫伊棋盘石。搿卯子山高顶还徕底勒。
注：
1.[蒙]---音孟，往、向。
2. 柴蓬窠里—树丛中。
3.邋，动词，在山林中攀走穿行。《唐韻》良涉切《集韻》力涉切，𠀤音獵。《廣韻》邁也。又《廣韻》盧盇切《集韻》力盇切，𠀤音臘。邋遢，行貌。
4.徠---在。
5.腔---阵（用于风），量词。
6.打---吹、起（用于风），动词。
7.撒手---使劲、一个劲。
8.墜---音治，欲睡时眼下闭，动词。
9.忖想---心想。
10.爽可---索性。
11.[揄]，音余，动词，围系着。
12.畀---给。
13.尔---音n，你。
14.就手---随手。
15.扎---抛撒，动词。
16.卯---次，量词。
17.腾---音特，升起，动词。
18.宁旧---仍然。
19.韬---绕，动词。
20.大桶箍---大圈子。
21.半半肆日---很久。