吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 5693|回复: 1

赏太湖夜景,品太湖美味

[复制链接]
发表于 2010-10-20 10:19:46 | 显示全部楼层 |阅读模式
赏太湖夜景,品太湖美味
今年格国庆节我是勒无锡度过嘅。今年我勒加拿大多伦多一只大学里向做教授格阿姪囡儿搭国内一些学堂有点学术浪格交流活动,所以勒九月初带仔俚格爷娘,也就是我格阿哥、阿嫂,还有俚四岁格小囡儿,一淘从加拿大坐飞机转来哉。利用国庆节格长假,伲兄弟姊妹淘里从四面八方侪聚到无锡,伲妹夫厾勒梅园附近格屋里向来叙叙手足之情。
节前,一日下昼里,伲阿哥阿嫂厾一家搭仔妹妹、妹夫,总共七个人到太湖边浪格一个名叫“管社山庄”格风景区去散步白相,偶然之间走到游船码头,看见游船进进出出,游客也上上下下络绎不绝,十分闹热。
游船样子蛮漂亮,看上去就是一只呒不画栋雕梁格画舫。船格前进、后退是由马达驱动,转弯、掉头则依靠船头驾驶舱里方向盘控制格舵来操纵,十分灵活。船长大约二十来米,阔度里向有五米开外。船格待客部分分上下两层。上层比较宽敞,两侧还留出一条有栏杆格走廊,栏杆一直延伸到船艄格平台浪合拢,可以方便游客勒船浪走动、观景、拍照等活动。上层舱面浪前后各有一只玻璃门窗围起来格包间,包间里向还装仔一只挂壁式格空调,冷天可以开暖气,热天可以开冷气。上层舱面摆好四只有转盘格大圆台,算是四席:包间里向各摆一席,前后包间之间格敞棚里摆仔两席;下层是一间统舱,两面也侪是大格玻璃窗,也有空调,里向摆开三只圆台,算三席。
上前一问,船浪人说是船浪可以游湖用餐,位子也可以预订,菜肴以太湖里向格各种鱼类为主,辰光订勒垂夜快,还可以观赏环太湖风景区格夜景。听船浪人实梗一说,大家觉着勿差,太湖格日景大家随时可以出来一面散步一面观赏,而夜景就勿大容易哉。于是决定预订一席夜饭,日脚订勒三号,登船格辰光订勒下晚昼四点到四点半钟。讲好格价钿是一千元洋钿游湖三个钟头,十来个人格一桌夜饭也是一千洋钿,双方讨价还价,最后讲定总共一千八百元。于是伲大阿嫂当时就付脱仔两百元洋钿格定金,还相互交换仔联系格电话搭仔手机格号码,以备必要格辰光可以相互联络。
哪里晓得,两号箇日,勿大勿小格雨落仔整整一日天。总当仔三号也呒不好天哉。转念一想,到仔明朝,就是落雨也呒不啥关系,游船浪向,有棚有窗,既可以避风也可以挡雨,难得看看雨里格太湖也蛮有情趣嘅。真是“天有勿测风云”。三号朝浪起来,朝天浪一看,碧碧蓝格天空浪漂浮仔几丝丝淡颜色格白云,箇倒是一个蛮蛮好格好天气,而且天气个温度也蛮适宜。
三号箇日下昼,大家睏仔中觉起来,人人养足仔精神,各人做仔一些准备,辰光也就将近三点半哉。因为从伲住格场化跑路走到游船码头,路程勿算远,大约只要走半个钟头也就可以到达。所以出发格辰光一定要提前半个钟头,一汏路走过去,算是活动腿脚进行锻炼。一路浪向谈谈讲讲,说说笑笑,大家也侪蛮开心。
四点半过一点伲预订箇只画舫(游船)靠岸,船浪人接伲上船。伲上传一看下层已经有人,船浪人让伲勒上层格两只包间当中随便拣一只。伲箇批人大小总共十二个,到船浪一看,后头箇只包间四面侪是大格玻璃窗,看出去景致呒遮呒挡,觉着十分敞徉,于是大家勿约而同格就拣仔后头箇只包间。
虽说是坐仔船游太湖,实际浪游览格范围只有无锡太湖格一只角而已。根据船浪人格说法,游湖格辰光是三个钟头。箇末从伲四点半上船算起,一直要到天黑以后个七点半上岸。也就是说,伲勒船浪既可以观赏太阳西沉辰光格日景,还可以欣赏到天黑以后格夜景唻。所以一转白相,能够观赏太湖格日夜两景,倒真格是蛮有意思嘅。
伲坐格箇只画舫从码头所在格湖湾里转出来,是沿仔无锡滨湖区格环太湖风景带走嘅。游船经过太湖工人疗养院格辰光,停靠仔一歇,接仔一批疗养院格客人。一路浪倒西太阳照耀得太湖里格湖水波光粼粼,湖面浪差差落落格停泊着十几条太湖里格渔船,勿晓得啥个道理,大多数船格船浪仍旧扯起仔格船篷,湖面浪格风吹得个船勒湖里向摇摇晃晃。再望前头,就是无锡顶顶有名格牛头渚哉。勒牛头渚格湖面浪,正好有两艘渡轮一来一往,接送着湖当中格三山岛浪白相格游客。伲箇只画舫就勒牛头渚转弯掉头,沿仔湖当中格三山岛一路西行。现在太湖当中格三山岛搭我勒上个世纪七十年代末游历过格三山已经大勿一样哉。现在格岛浪已经增添仔勿少建筑搭仔人造景观:巨型格老子塑像、还有一些真人大小格神佛塑像,因为画舫行进格速度比较快,搭岛格距离也比较远,所以一时头浪也呒不办法去仔细分辨箇些神佛塑像格身份。
实梗一个圈子兜下来,大约有一个半钟头格辰光。天也勒浪慢慢交暗下来哉,差勿多要到吃夜饭格辰光哉。服务员上来问伲要泡啥茶?因为天要夜快哉,勿适宜吃浓茶,所以就要仔比较清香一点格茉莉花茶。箇辰光船浪厨房里格师傅厾已经忙仔歇哉。服务员开始勒每张圆台浪摆消毒餐具。餐具刚摆好,小菜就陆陆续续送上来哉。
冷盆、烧炒加清蒸,一共有二十道菜。吃太湖美味,最少勿脱格就是有名格“太湖三白”:白颜色格银(苏州白话读作“尼”)鱼加上白鱼、白虾。伲该趟吃格是拿银鱼做格汤,白鱼是清蒸嘅,虾,做仔两只菜:一只是油爆虾,一只是虾松(也叫“面拖虾”)。现在正是宜兴板栗上市格辰光,所以厨师做仔一只时鲜菜:红烧栗子鸡。太湖美味以鱼为主,所以送上来格菜,勿少侪是用太湖里格鱼做出来嘅,其中有:清蒸鳜鱼,塘鲤鱼(无锡称“盎鲫鱼”)串格汤,白烧钉头鱼,白烧栈(此字来自我无锡住地附近一个水产广告,但我认为可能应该写作读音相同的“鳣”字),油里氽格鲹鲦(亦称“鮇鲚鱼”)、鳑鲏做格冷盆,鱼格骨头也勒油里氽得松松脆脆,连鱼骨头也可以一淘吃嘅。太湖格时鲜格蔬菜当中,除脱仔前面说格栗子之外,还有芋艿头、无锡菱,不过哪亨烧格?叫啥格菜名,我已经忘记脱哉。箇是因为上仔年纪哉,记忆力衰退个原因。
其实吃夜饭格辰光,天已经完全黑下来哉,所以也就是一面吃夜饭,一面看夜景。箇辰光画舫已经回到仔湖滨风光区哉。所谓赏太湖夜景,实际浪也就是看沿岸景点建筑浪用霓虹灯勾勒格轮廓,用各色节能型发光灯装饰格树木映照出来格五光十色格夜景,箇是勒日里向呒不办法看得见嘅。假如伲订格是十月一号格夜饭,箇末还能够观赏到燃放格礼花、焰火。箇夜景就更加漂亮哉。
画舫勒浪回转来格半路浪,勒疗养院码头先送走仔一批疗养院上来格游客。大约七点半勿到格辰光,画舫回到仔湖湾格游船码头。
发表于 2010-10-21 16:22:05 | 显示全部楼层
真不错,虽然今天来不及看了,作为苏州人还是要顶一下。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 06:57

Powered by Discuz! X3.4

© 2001-2017 Comsenz Inc.

快速回复 返回顶部 返回列表