说说我自家格故事（十一）

laosuzhou

说说我自家格故事（十一）

跌勒屎坑里

      箇也是我勒浪黄埭格辰光发生格一桩我记忆犹新格事体。我是一九五二年随全家移居到苏州市里向嘅，所以箇桩事体大约发生勒一九五零年前后格初夏。
      事体要从姆妈做豆瓣酱说起。我小辰光，伲屋里向吃格酱侪是姆妈自家做嘅。每年到蚕豆要落市格辰光，姆妈就会买弗少格老蚕豆，拿俚剥出豆瓣来用水煮熟，焖烂，加面粉一淘拌匀，做成小方块格酱黄糕，让俚发霉，放到敞口格陶缸里向，再加盐搭仔酱油，还要适当格加冷开水。勒空旷格地方放一只木头格三脚架，酱缸就架到三脚架浪。日里让太阳底下暴晒，垂夜块，要勒酱缸浪罩一只圆锥形状格白铁皮做格酱棚盖，隔开露水，防止雨水。为仔要避免苍蝇叮，要勒酱缸朗加一个透气格罩。箇个罩，现在大家侪会用消毒纱布、金属纱网，或者塑料纱网做一个比缸口大格罩，盖勒酱缸浪挡虫挡灰尘。老早，勒我小辰光，曾经看见有格人家是用一只比酱缸口径稍微大一点格圆竹框做嘅，为仔竹框盖得着实，当中再加扎一个“十”字撑，然后勒箇只竹框浪卷满结蛛罗网。实梗格盖既能够透过太阳光，也可以透气，还便于水分蒸发，而且随便啥格虫也侪钻勿进去。其实伲小格辰光还用卷满结蛛罗网格竹框框，绑勒长竹头浪仔，去捉树浪向格知了（苏州人称会鸣叫的“蝉”为“知了”）。
      为仔要弄实梗一只盖，我自告奋勇，瞒脱仔屋里向格人，一干子拿仔只做好格竹筐绑到一根一人多长格竹头浪，去卷结蛛罗网。我走遍屋檐、墙角树丛，一张张大大小小格结蛛罗网畀我一一卷到我格竹筐浪，竹筐浪已经卷满仔结蛛罗网。哪里晓得我勒浪卷最后格一张结蛛罗网格辰光，只顾仔上头，朆顾着脚底下。啥人晓得一脚踏添，滑进仔旁边格粪缸里，粪缸里格屎一直没到我格脚踝（苏州白话读作[ku箍]）骨。我马上厾脱手里箇根柱头，两只手勒坑缸边浪一撑豁出坑缸。箇根卷结蛛罗网格竹头总算幸亏（苏州白话读作[tshu区]）厾得快，竹头戗勒旁边格墙头浪向，朆弄着坑缸里格龌龊，我一下昼格努力总算呒不白费。于是，我马上掮仔箇根竹头到河滩头，拿竹头望旁边格树桠子浪一戤，拿两只脚浪格鞋、袜统统脱下来，赤仔脚立到河里，仔仔细细格拿鞋袜浪、脚浪格屎迹汏干净。为仔瞒脱屋里格爹爹姆妈，勒外头一直等到拿鞋袜㫰（苏州白话读作[laqng朗]，晾）干仔以后，方始回到屋里。
      虽然鞋、袜搭脚浪格龌龊，我已经勒小河浜格河滩浪仔细格汏过，朆留一点点痕迹，但是勒坑缸边浪擦过格短衫裤子浪残留格气味，终于朆骗过屋里向大人灵敏格鼻头。畀大人一阵诘问，只好拿自家格遭遇格经过一五一十，原原本本，侪讲出来。
      “倷箇个死小鬼（苏州白话读作[tcyu举]），倷算伽（苏州白话读作[dzia迦]，逞能；精明，能干之意。因未知正字为何字，此处仅以其同音而借用之）嘅！”姆妈说，“倷勒外头出仔事体，屋里向也呒不人晓得！我哪亨搭恁厾爷去讲吤？箇种龌里龌龊格物事哪亨去盖勒酱缸浪向呐。哪亨畀倷想出来嘅！下转勿许倷一个人再去做箇种危险格事体！”说完就拿我辛辛苦苦弄得来格箇只竹框框拗断仔甩勒天井角落头格垃圾（苏州白话读作[le肋 se色]）堆浪。虽然我当时辰光嘴浪勿说，心里向是蛮弗服帖嘅。只是伲小辰光格规矩，勒大人面前是弗许回嘴百答嘅。不过，事体过仔之后，自家再仔细回想想当时发生格事体，自家也觉着蛮险嘅，大人格教训真是说得一点也勿错：一人多深格坑缸，假使坑缸里向格屎已经存满，滑下去辰光一脱手朆撑牢缸边，旁边亦呒不人帮忙，当时我可能就已经沉杀勒坑缸理想，也就呒不我格今朝哉！

人人头

乡下头到底危险喏~~到处是吓人个屎坑

富春山越

那个年代，用飞丝网作罩法子，真个赞！透气又防虫！

富春山越

做酱塌饼出毛，不知苏州这里盖的啥个树叶？我们这里是黃荆。

$(message)