吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4101|回复: 3

说说我自家格故事(五)

[复制链接]
发表于 2009-6-26 09:59:44 | 显示全部楼层 |阅读模式
说说我自家格故事(五)
我有点像伲爹爹
有一日,勒路浪碰着曾经做过三十几年乡邻格江苏省中医院格退休护士长小杨阿姨,长远勿见,一见面,俚用常州普通话对我说:本忠啊,你的样子越来越像你的爸爸了。
我就问俚:哪亨见得?

你爸爸的两条眉毛在省中医院门诊上是出了名嘅啘!几化病人侪要来寻箇位长眉毛格老医生看病。一直到你爸爸去世以后也还有人慕名前来寻俚看病呢!俚说,你看你格两条眉毛,也是长得那么长,啊像你爸爸的一样!

儿子搭爷勒模样上长得相像,其实是十分正常格事体,本来呒啥稀奇。其实我年轻辰光格样子更加向伲姆妈,伲姆妈个人,身体长得小迹灵灵嘅;我格身材也是瘦瘦小小,身高刚好只有一米六。伲姆妈格面孔是瓜子格脸型,两条淡淡眉毛;我也是一副瓜子脸格脸型,年轻格辰光我格两条眉毛也勿浓,也呒不像现在实梗格长眉毛。勒黄埭,勒苏州格乡邻,侪说我格样子像伲娘。
不过,我细细较想想,我搭伲爷的确还有其他方面相像箇格场化。譬如出世辰光搭仔自家爷格年纪相差浪是相同嘅。我听爹爹说过,伲阿爹勒六十八岁浪过世嘅,箇辰光伲爹爹格年纪是廿九岁,俚厾两家头格年纪相差三十九岁;爹爹出世格年份是勒清朝光绪廿八年,也就是公元一九零二年,我出世格辰光是民国三十年,也就是公元一九四一年,我搭伲爹爹格年纪也相差三十九岁!
爹爹是一九七四年过世嘅,按习惯用虚年龄计岁,箇年伲爹爹就是七十三岁,比阿爹多活五岁年纪,我现在预言自家也会比伲爹爹多活五岁年纪,我预计我自家可能会勒二零一八年离开人世!
其实,箇点点相像侪勿值得当桩事体来写嘅。勒我脑子里一经挥之勿取个是我让伲爹爹生前对我感到彻底失望格事体:朆能够按俚老人(该搭格,苏州话里读如[niang])家格意思去跟俚学习中医,继承俚格衣钵。现在想起来真格觉着有点愧对俚老人家嘅。
现在,再回想起爹爹生前对我格所做、所言,侪隐含着要我跟俚学中医,继承俚衣钵格意思。
箇还是勒上一个世纪60年代之初,由于人祸搭仔天灾,我就读格一爿技术学堂因实行当时格调整、巩固、充实、提高八字方针而解散停办。一纸证明让我回家待业。待业箇辰光,也因为爹爹搭南京中医学院(现更名为南京中医药大学)之间格关系,我有一段辰光就勒南京中医学院《中药大辞典》编写组里做抄写文稿格临时工作。因此我也同时接触过不少有关中医中药理论方面的文献资料。实梗格条件,对我来说,就是学习中医学知识,将来成为一名中医师极为有利格机会。加上我本身从小就体质虚弱而且多病,医生箇个以脑力劳动为主格职业应该比较适合我格身体条件。呒不工作待业勒屋里,正好有充足格学习辰光。爹爹业为了提高我对中医事业格兴趣,勒那段辰光里,差勿多每日天侪要拿俚勒医院门诊浪碰着格疑难病例、俚对病症格处理方法,搭仔经过俚治疗以后格效果,像讲故事一样讲畀我听。我也勿是木头,当然晓得爹爹格苦口婆心。但是,箇辰光勿像现在实梗开放。一个人勒箇个时代格想法是,侪只想有一个国有格工作单位,一个固定格工作岗位,一份稳定格工资收入。就是实梗一种带有时代烙印格思想,让我完全放弃了继承父业格机会。
发表于 2009-6-26 10:56:53 | 显示全部楼层
为先生的淡定与旷达而感动。
发表于 2009-6-26 11:14:07 | 显示全部楼层
方言写作弗容易,学习了!
发表于 2009-6-26 19:49:18 | 显示全部楼层
名医世家~~
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2021-9-29 11:06

Powered by Discuz! X3.4

© 2001-2017 Comsenz Inc.

快速回复 返回顶部 返回列表