吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4468|回复: 7

说说我自家格故事(四)

[复制链接]
发表于 2009-6-25 10:27:24 | 显示全部楼层 |阅读模式
本帖最后由 laosuzhou 于 2009-6-25 16:40 编辑

说说我自家格故事(四)

跟仔阿哥一道白相

仁官,是我大阿哥格小名,俚呐比我大五岁。平常辰光,有俚自家格一班白相淘伴。学堂里放仔学,阿哥总归会搭仔俚格一班白相淘伴约好仔一淘出去白相,勿大愿意带仔自家格兄弟姐妹一淘出去白相嘅。不过,闲话要说转来,伲阿哥也勿是从来勿带伲一淘出去白相嘅。勒我脑子里影响最深格也有过勿少次。
暑假里,夜幕降临,像伲阿哥实梗年纪格一班大小干,有格辰光也会得带仔伲箇班小小干一淘白相一种叫“官兵捉强盗”格游戏。大家事先就已经约好仔啥辰光了啥场化集中。屋里有电筒嘅,手里拿好仔电筒。等人头到齐,大小干、小小干拆一分为二,一半大小干带仔一个小小干,弟兄淘里总归会分勒一淘嘅。所以白相箇种游戏,我总归跟牢胶仔伲阿哥。
人头分派定当,两方面各推举一个大小干做头头,由两个带头人用“猜东猜”格方法来决定哪读作[lo]洛,疑问词。下同个一方当官兵,哪个一方当强盗。按照一般格规则,“猜东猜”,就是现在格小人也拆欢喜用来决输赢格“石头剪刀布”猜拳游戏。“猜东猜”也像一般格游戏比赛,以三局两胜决定输赢。赢格一方就当官兵,输脱格一方就当强盗
游戏开始之后,当强盗格一方先自家寻壁壁角角勿容易畀别人寻着格场化叛躲藏起来,叛格辰光长短是事先规定好嘅。等辰光一到,当“官兵”一方格领头人已发出指令,就三三两两,开亮仔手里葛电筒来寻,畀官兵寻出来格强盗只要还朆畀对方捉牢,还可以逃跑,“官兵”就勒后头追。箇个辰光,可以看见伲箇班大大小小格小干儿(读作[ng]鱼)三三两两满街格大呼小叫,奔来奔去。直到当强盗格一方所有人侪畀官兵一方捉牢游戏结束
假使游戏继续进行,两方面格角色对调,也就是原来扮“官兵格一方改扮做强盗,原来强盗格一方掉转来改扮官兵。有辰光,一盘游戏结束,下一盘游戏开始之前,两方面格头头再用“猜东猜”定输赢格办法来决定哪方当强盗或者官兵。
我小格辰光,黄埭,箇个场化小得真可以称得上是个弹丸之地整条街浪呒不高楼大厦,最高格要算西横头黄埭中学后头大操场浪格一座瞭望用格碉堡哉。一条黄埭河贯穿全镇,拿个黄埭分成上塘、下塘两个部分。上塘一条街,街路两边大小商铺林立,文化娱乐场所间插其间,下塘也有一条断续而不规则格街,临河一侧差勿多侪是石驳岸,另一侧则大多搭旷野、农田相连,零散分布着几家工厂、手工业作坊,外来人口勒下塘相对比较集中。上塘搭下塘之间从东到西有庙桥、新黄埭桥、芳桥、中市桥、香花侨等五座桥梁通连,伲屋里向就勒芳桥堍笡读作[tsia]“且”,斜)对面。从最东横头格庙桥到最西横头格香花侨,总共也只不过三里路。伲白相“官兵捉强盗”游戏格范围一般侪勒新黄埭桥到中市桥之间上、下塘两条街格范围以内。白相箇种“官兵捉强盗”格游戏侪是男小干,一场游戏白相下来,个个侪是大汗淋漓,浑身侪是汗酸臭味。身浪格衣裳全部湿透,就像勒雨头里沰(读作[toq]厾)过格一样。下晚昼格浴赛过朆淴,上床睏觉以前要末再淴一次浴,要末拿浑身上下好好交揩一揩,拿身浪格汗酸臭味揩脱仔才好让伲到床浪去睏觉!
倷啊曾看见过鬼(读作[ju]举)火?绿悠悠格火光,勒空旷格野田爿里飘来荡去格就是鬼火”,我看见过,也就是跟仔伲阿哥,搭俚格一斑大小干一淘白相格辰光,勒野田爿里看见过嘅!现在,读过书格人,呒不哪个勿晓得,鬼火”实际朗是漂浮勒空气当中格磷元素,搭流动格空气之间发生磨擦以后产生自燃格一种自然现象。记得也是一年格暑假里向,一日吃过仔夜饭,大大小小格小干儿搭往常一样,由箇里向个大小干带仔一淘白相。里向有一个搭伲阿哥一样大格,名叫元熙格阿哥,对伲箇班小小干说,今朝带恁厾到野田爿里去看鬼火。恁厾勿怕就跟伲一淘去。啥人胆小,勿敢去,箇末倷现在自家先转去,覅跟牢仔伲!
其实,箇辰光,各班大大小小格小干儿跟牢仔俚,已经走过芳桥,穿过仔芳桥下塘格一条屎坑弄,聚集勒埭基坟个空地浪哉。四面是墨黜黑格一片野田爿,再说伲老早听大人说过,各条屎坑弄格式坑棚里曾经吊杀过人!倷想,箇辰光还有哪个小干再敢离开箇班大小干,自家一干子转去呢?只好自家壮壮胆,答应一声:伲侪勿怕!”大家跟牢仔俚厾。你几个小小干小手相搀,夹勒大小干格当中,沿只能一个人走格田岸,一直望西,沿路还有几搭乱葬岗,一直走到西横头格香花弄外格空地浪。天气闷热加上心理恐惧,你已经走得满头大汗淋漓嘅哉。就勒格辰光,只听见一阵啪啪声从身后划空而过,一个小小干下的——一声大哭起来。听见有人一哭,我格心里也虚落落起来,马上我格两只小手抓紧仔自家格阿哥。阿哥说:呒啥吓头,刚刚飞过去格不过是只野鸡而已!”听仔自家阿哥劝慰,我也勿再怕哉。不过,箇日子格夜里,伲搭仔箇班大小干一淘真格看见仔勒野田爿里飘来荡去,颜色绿悠悠格鬼火
发表于 2009-6-25 11:12:36 | 显示全部楼层
写得相当详细,我想请问“业绩”是啥格物事?
 楼主| 发表于 2009-6-25 11:23:11 | 显示全部楼层
写得相当详细,我想请问“业绩”是啥格物事?
泖港人 发表于 2009-6-25 11:12


啊呀,真正对勿起,是我格一时疏忽,箇是汉语拼音输入里经常出现格让我苦笑勿得格事体。朆拿俚改过来。“业绩”应是“野鸡”之误。倷如果有办法,箇末拜托倷帮我了上面格文章里改一改。谢谢倷哉!
发表于 2009-6-25 13:42:20 | 显示全部楼层
箇个要倷自家改嘅,我呒不权限格wae,或者是版主领导们倒是可以改脱俚嘅。
倷看看每一只自家写个贴子下头有编辑两个字,倷点击编辑就可以改哉。
发表于 2009-6-26 11:08:45 | 显示全部楼层
“大小干、小小干”,似应写作“大小官、小小官”,或者“大小倌、小小倌”?
发表于 2009-6-26 11:34:40 | 显示全部楼层
恁厾,好像是常熟话哇~~~

埭基坟是什么啊?
 楼主| 发表于 2009-6-26 17:23:58 | 显示全部楼层
恁厾,好像是常熟话哇~~~

埭基坟是什么啊?
人人头 发表于 2009-6-26 11:34


1、恁厾,勒陆基格《苏州同音常用字汇》里写作“{口五}”,勒叶祥苓格《苏州方言志》、钱乃荣格《当代吴语研究》里写作“唔”,箇两个带口字旁格字用来做人称代词,我觉着总归勿大恰当。所以拿俚换成“恁”字。“恁”,新版《辞海》里注二:“[nin]同‘您’”。协会推荐格《北部吴语书面用字》注作“[nen],你(常熟方言)”。我觉着拿俚再转个音,用到苏州话里。所以勒我格《吴语方言(苏州话)书面用字》里,我拿俚注作[ng]。恁厾,我格注音是[ng toq],苏州话里格“你们”。
2、“埭基坟”是黄埭芳桥下塘一个高墩墩格地名。2002年我到黄埭去,已经寻勿着箇个地方哉。
发表于 2009-6-26 19:39:04 | 显示全部楼层
这个高墩墩弄不巧还是个什么时代的文化遗址哩。。就像草鞋山、赵陵山一类的
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2021-9-27 13:08

Powered by Discuz! X3.4

© 2001-2017 Comsenz Inc.

快速回复 返回顶部 返回列表