|
发表于 2006-12-1 09:35:20
|
显示全部楼层
管理员同志啊,侬啥体老是觉着我了了帮侬唱对台戏,我胃口介好啊。弗瞒侬讲,我来参与讨论纯粹是出于娱乐。侬自家亦讲过,娱乐界嘛勿要介认真(大概搿意思,弗是原话),寂静亦讲过,茶馆重地,禁谈国是。我一向本着个个精神来坛浪向白相。蒙侬看得起,啥事体呒没做,就拨我一只乡贤公(亏得弗是乡先贤kiakia)当当,我是一直蛮感谢。
大概记得一个多月前,侬了了忙wuwiki,发贴来讨论正宗吴语个文法,亦算我自家自作多情,偏要鲜嘎嘎来回侬贴,讲啥将来个吴语书面语么亦要借鉴借鉴文言搭仔欧式文法。到现在我还是个个想法,当时个帖子还了嗨,我想我并呒没啥特别“反动”个言论。弗晓得为啥从此以后,侬对我意见就特别大。我想侬应该是误解我了。每个人个观念侪弗一样,譬方侬老热爱吴语,尤其对自家个江阴闲话情有独钟(搿么当然hehe),但亦有人弗在乎个呀,侬为啥一定要去扭转伊呢?或者觉着伊有啥勿对奈?譬方我自家罢,弗要讲江南,我对整个中国文化意见侪老大,要是上天拨再我一次机会个闲话,我一定会投胎投到国外去,haehae,我就是搿恁。起码现阶段,暂时亦呒啥可能改变想法了。当然我对自家个家乡是老有感情个,但是我对伊已经失去信心了,我顶顶欢喜个上海已经成为历史半个多世纪了。我看到个是一个自家无法去改变个现实,就像我名字个谐音一样,交关堕落。
格么对于吴方言呢,我所能感受到个吴方言就是上海闲话,塌仔数量有限个评弹越剧,搿决定了我个认识是相对狭隘个,所以我从来弗会去参与其他吴方言个讨论,我呒没搿种资格,亦呒啥感情,投入勿了。所以大家看到我,勿管了了此地,还是清籁论坛,大家可以发现,我顶多是谈一眼自家生活当中经历过个生活细节,回忆性居多。但从来呒啥建设性个意见,特别是对于吴语个未来。因为么,我本身就弗抱啥个希望个,讲了严重眼,帮我弗搭界。搿是我个世界观还有对中国历史文化个认识决定个,弗是我有啥个企图,像侬或者某些其他id想象个实梗,要来推普,或者搞啥个破坏,我心相呒没介好。我自我界定,是逍遥派。
搿答要澄清一桩事体,mandarin搿个id是我大四个辰光上网取个,乖些辰光我还是“国学派”,要是换作当年个我,肯定汉服啊繁体字啊古音啊侪要“哈”一记“饭”一记(昆曲就是个个辰光开始欢喜个)。所以么传统“文人”情节比较重,mandarin正好又有士大夫个意思,所以就用起来了。当然官话个意思我亦考虑到,但是当时辰光呒没现在搿种吴方言个意识,觉着普通闲话勿是蛮好。直到现在,我还要承认,我从来呒没觉着普通闲话帮吴方言一定要对立起来,你死我活(个个吴官照样可以读,阿拉姆妈就可以搿恁。大概帮我外婆屋里向是杭州人有关),沈炯个普通话必定占领上海论调我弗敢苟同,坛浪向某些吴越人视官话为仇敌我照样有意见。正因为此么,所以我亦无避讳用mandarin作网浪向个名字。就是搿恁。所以拜托某些人弗要以“貌”取人(弗是对侬讲hehe),标签乱贴,愤青得勿得了,见啥咬啥,一口咬到我头浪来么,格么呒啥客气,我一定好好叫帮伊汰脑筋。
格么侬要问了,既然逍遥派么,为啥道理看到侬有辰光欢喜啥个问题侪来轧一脚。格么只能怪我自家道行勿深涵养功夫勿够好,看到勿同意见么就熬勿牢了呀。。。。。。其实大部分侪可以弗参与个,讨论点吃啊白相啊历史文化啊勿是蛮好,偏要来稿啥个脚劲,所以畀别人家断章取义或者捕风捉影硬劲要究出我个“内心想法”“深层观念”,然后归归类算啥个啥个派别,亦是我咎由自取(吴官照样读,整个调型高-低-高,老mandarin个老书卷气个),怨弗得别人。人家水平塌仔素质摆死了嗨个么,又弗能去改变伊拉,啥体勿自家躲躲开呢。官话讲得妙,“识时务者为俊杰”,我亦要做“俊杰”。 |
|