吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 17617|回复: 51

童年回忆系列

[复制链接]
发表于 2007-12-23 11:38:45 | 显示全部楼层 |阅读模式
    搿个回忆是想到何里写到何里个,写了勿好,大家勿要笑话我,争取用上海市区言话写,大家侪好看得懂,用我伲乡下言话写个闲话,一来交关呒没正字,一来大家可能看起来吃力。争取多写点,慢慢叫变成功一只大坑。
    我伲泖港是一个江南小镇,也是一个人民公社个政府所在地。实梗样子个小镇勒拉江南到处侪有个,一般性讲只有一条大街,1500来口人。麻雀虽小,五脏俱全,勒拉小镇个大街(叫中大街)浪向有搿能一些店铺:南货店,百货店,书店(连文具一淘卖),药店(中药/西药混拉一淘),副食品店(卖水产品/水果个),买油酱搭仔酒个店铺,茶馆店,剃头店搭仔一些街道办小店铺,比如磨剪刀,裁缝摊,铜匠摊。
    勿过,泖港还是有一眼特别个地方。我伲泖港是从上海走内河水路到浙江个一条交通要道。一直到10多年前,从十六浦到海盐搭仔平湖还有客船,我伲叫大平湖搭仔海盐班,小平湖是从松江出发到平湖个。既然是水路要道,从清朝开始,就勒拉泖港设立了卡子,来往个船侪要交税再好通过个,一来二去,就成为集镇。一直到现在,泖港附近个农民到镇上来,叫“卡路Ki”。呵呵,就是“卡浪去”个乡下叫法。解放前头,泖港还有一只庙,叫氽来庙,据说蛮有名气个。我小辰光放暑假到闵行,伊面搭有个老人也晓得个。
    我养出来个搿年正好是文革发生个一年,告佬文革开始辰光个事体侪勿晓得,所谓个记忆,侪是71年我5岁,可以记得起事体以后个情况。
    小辰光,难得有新衣服着个,大家侪穷呀。外加,一般个小囡对着穿新衣裳也勿上劲,因为我伲小辰光受个教育使得我伲觉着艰苦朴素是眼板数个,着勒好,侪是资产阶级思想,我伲无产阶级是应该以艰苦朴素为荣个。所以说,我埃个辰光个衣裳,大多数是阿哥阿姐着下来个改小了个,有一些补丁是正常个。实际浪,差无多所有个小囡着个侪是有补丁个衣裳,大家从来也呒没觉着坍台。衬里布衫,譬如衬衣衬裤侪是“老布”做个。我伲是小镇上个人,跟真正的农民还不一样,我们一些农村同学,搿么交关侪从外到里是“老布”衣裳。所谓“老布”,就是乡下个土布--是一种纯棉个,蛮粗糙个,一般是蓝条个布。我看到过织布个过程,速度是邪气慢个,估计从黄道婆发明以后,基本浪呒没改进过。一直到80年代初,我还看到奶奶用纺纱机纺纱,再借人家个织布机织布(我伲屋里呒没织布机)。

[ 本帖最后由 泖港人 于 2007-12-23 11:41 编辑 ]
发表于 2007-12-23 12:10:19 | 显示全部楼层
原帖由 泖港人 于 2007-12-23 11:38 发表
我伲泖港是从上海走内河水路到浙江个一条交通要道。一直到10多年前,从十六浦到海盐搭仔平湖还有客船,我伲叫大平湖搭仔海盐班,小平湖是从松江出发到平湖个。


讲起来我搭泖港也有一眼缘分个,伲大爹当年就是勒浪平湖负责检修箇条“大平湖”航线轮船个。
发表于 2007-12-23 12:23:47 | 显示全部楼层

崭个,加油

我是正正宗宗乡下人
镇浪人也弗是。。。
ps: 松江闲话写出来弗关事个呀。。。我也侪是混合闲话。。ki(khi?)应该就是“去”。
发表于 2007-12-23 14:36:57 | 显示全部楼层
毛好!
 楼主| 发表于 2007-12-23 14:39:12 | 显示全部楼层
热天
    埃个辰光,我顶欢喜热天,因为热天有交关好处。头一个,就是热天有冷饮吃吃。大约摸6岁开始,每天姆妈会得拨我4分洋钿(冷天5分),箇4分洋钿刚巧可以买一根棒冰吃,多数棒冰侪是白颜色个,大概是水里向放一眼糖冰起来,就变成功棒冰了。有辰光也有得赤豆棒冰卖,箇美道就更加好了, 8分洋钿一根个雪糕,箇是呒没办法想象个,我也不可能有耐心囥2天个钞票去吃一次雪糕个,只有勒拉大人施舍个辰光再有可能吃到一趟,拉我印象里头,每年能够吃着1-2趟已经蛮好了。顶好吃个是冰砖,大概交关年数里向只有吃过几趟,以至于我还记得其中个2趟,看得出是交关宝贝个。泖港么,交通不大便当,棒冰个供应从6月1日起,到10月份就结束了。
    勒拉热天,还有别样好处,穿了少。勒拉热天我伲小镇浪向,10岁勿到个囡囡头个标准衣裳是一件背心,一条短裤,外加赤脚。早上头起来,床浪向跳下来,最多刷只牙齿,揩把面,几许便当啊。就算到学堂里也是着成功箇恁样子,大家侪习惯了,呒没觉着有啥现世。下半日放学后么,就直接到河里向游泳去了。
    我伲个小镇,勒拉黄浦江上游个一条大支流边浪,叫大泖港。外加箇条支流到我伲箇搭,来一个90度个转弯,形成功三面环河个样子,箇佬我伲小镇也可以叫河岛,还要确切。箇三面个河,最阔个地方约莫着有200米,最狭个地方也有100米多。勒拉箇恁一个地方,大多数小囡从5岁开始,爷娘侪同意小囡搭仔阿哥阿姐一淘去游泳(我伲乡下叫浴身)。箇佬我伲镇浪差勿多全部小囡侪会得游泳个,日逐一到3点半个样子,河里向就闹猛了,搭搭是嬉闹个小囡。我大概勒拉8、9岁就可以勒拉河浜里勿受监视个游了。
    我顶欢喜河浜里开过个拖头船,就是前头一只机器船,后头拖了10来只水泥船个运输船。拖头船,最好是逆水个,我伲可以游到船海边,拉牢船舷浪个轮圈(箇轮圈是防船搭船撞个),跟牢船拖了蛮远,再顺水游回转。到了4、5年级以后,我伲一般就想游过河浜了。我伲一帮人一直来来去去游过河去,真个是蛮开心个。后收来80年代中期开始,就逐步看勿见小囡游泳了,现在个小囡再也不可能有我们箇辰光个乐趣了。当然,伊拉有伊拉个乐趣,时代勒拉变化。
发表于 2007-12-23 15:50:55 | 显示全部楼层
hoho,汏冷浴顶顶开心:freelaugh:
发表于 2007-12-23 21:20:11 | 显示全部楼层
亲切!写得好!!
 楼主| 发表于 2007-12-24 10:21:41 | 显示全部楼层
大水没、读书      
        我伲个地方是勒拉黄浦江个中上游,受海里潮水个影响,我伲箇面也有潮来、落潮个。对我来话,就是河水有辰光朝东流,有辰光朝西流,河里向个水位高低大约莫有3-4米个变化。我伲有一句老古言话,叫初一月半午时潮,就是阴历初一搭十五勒拉中浪向开始涨潮,到夜快头6点种左右开始落潮,然后每一天潮来辰光往后头推迟50分钟左右。勒拉有种年份个热天,下半日潮水最大个辰光,差勿多要超过河堤,瀊出来了。
    讲到河里水瀊出来,我年年望河水会得瀊出来,就是一次也呒没真正发生过,我看到最高个一趟是离堤岸最低个地方大概有靠10公分样子。河里向水位高了,倒是会从阴沟洞里灌进来,有几趟,连街浪也有10公分样子个水,大家只好从街沿石浪走。旧年,我又到老早游泳个地方看了看,(当然,现在河里再也没人游泳了)居然堤岸又加高过两次,加起来加高了1公尺多,大潮汛辰光居然河水离岸也只有20来公分。我就糊涂了,为啥现在个水位会得比老早高了1公尺左右?水多了?小支流淤塞了?还是河床勒拉变浅?实在想勿清爽,大概水文站个人晓得是啥道理个。
   我小辰光年年望发大水,就是望勿着。话说起望发大水个原因,一个么是小囡欢喜白相水,着好高筒套鞋辣水里趟,蛮有趣个。还有一个就是单望大水没,能够勿去读书。我读书个辰光,基本浪呒没逃过学。当时我伲对老师也蛮尊敬个,老师要求也不好讲侪放松。勿管哪恁,读书总归要遵守纪律,勿好乱说乱动,对小囡来讲总归没劲个。埃个辰光1-3年级只有语文搭数学课,箇佬也没多少课,一日最多有5节课。平常考试是呒没个,期末考试佬啥倒是有个,不过我基本不记得考几分了,大概是老便当个题目。
    虽则每年望勿着发大水,每年倒有2次农忙假。照理讲,应该有3个农忙,就是5月底个三抢,7月上中旬个双抢搭仔10月份个三秋。7月份个一次正好暑假,箇佬没农忙假了。5月份搭10月份个农忙假,从3年级开始,我伲就勒拉老师个带领下,去附近大队里向做点力所能及个农活。一般性是拾麦穗头(稻穗头),剥剥寒豆箇种轻生活。但我记勿得是何里一年了,照规矩是4年级以后,箇年我伲学堂组织去撒Zia(就是肥料)。箇桩事体我记忆犹新,伊个肥料大概是猪或着牛个粪搭仔草拌在一淘发酵个,是臭得来呒得哈话头势(这是崇明话,难得用一次)。虽则臭,我伲从小受个教育是要向贫下中农学习个,勿可以嫌变臭个。撒光之后手浪个臭味道好几天也净(用一个乡下词,表示洗)勿脱。
    讲到读书,我伲有辰光还要开门办学。我印象顶深个一趟是,老师带我伲去附近大队里向,为老农民朗诵儿歌。我读个是关于越南人民抗击美帝国主义侵略个儿歌,读完之后,还要请伊拉拨我伲打分,不过伊拉也搞不清啥人好啥人勿好,后收来老师就自家打分,弄过去算完成任务。我后来(12-13岁)稍为大一眼之后勿明白个是,我伲箇恁歌颂个越南人民,居然侵略柬埔寨,又来侵略我伲国家。
    我现在也记不太清爽上眼啥个课了,勒拉印象里好像是一些革命故事搭一些阶级斗争个故事。好像有一些革命儿童团搭日本鬼子斗智个故事,还有刘文学搭破坏生产个地主斗争个故事,刘胡兰/董存瑞/蔡永祥等箇些英雄个故事,还有歌颂祖国建设成就,比如南京长江大桥建设个故事。反正,糊里糊涂就上到5年级了。我伲此地是上海个郊区,所以搭上海市区一样,4年级就开始上英语课了。我还记得,老师给我伲讲学习英语个伟大意义,是为了进一步反修反帝。小学个英语,学个无非是“Long live Chairmen Mao. Long live……”。到了76年风云变幻个埃个一年,又学会了“Down with the Gang of four”。“Chairmen Hua is our wise leader”。

[ 本帖最后由 泖港人 于 2007-12-24 10:56 编辑 ]
发表于 2007-12-24 10:49:02 | 显示全部楼层
文革辰光竟然四年级有得上英文课?
发表于 2007-12-24 10:54:53 | 显示全部楼层
Long live chairman Mao 我里娘也会个。。。
 楼主| 发表于 2007-12-24 11:06:01 | 显示全部楼层
原帖由 疁城小囡 于 2007-12-24 10:49 发表
文革辰光竟然四年级有得上英文课?

哈哈,我还会得英文版个《我爱北京天安门》:
I love Tian'anmen in Peking
The sun rise over Tian'anmen
Great leader Chairman Mao
Lead us marching on
发表于 2007-12-24 11:06:13 | 显示全部楼层
我也蛮熟悉:浪,列夫,恰慢毛!
发表于 2007-12-24 11:10:34 | 显示全部楼层

楼主可以考虑去上海报纸投稿

写得侪交关好个
发表于 2007-12-24 11:15:17 | 显示全部楼层
原帖由 疁城小囡 于 2007-12-24 10:49 发表
文革辰光竟然四年级有得上英文课?


上海果然先进哦。。到我上小学辰光小学里还呒拨英语课了。。。
发表于 2007-12-24 12:21:35 | 显示全部楼层
我五年级刚刚开始学个,文革居然四年级就有了。。。
 楼主| 发表于 2007-12-24 13:38:15 | 显示全部楼层
原帖由 疁城小囡 于 2007-12-24 12:21 发表
我五年级刚刚开始学个,文革居然四年级就有了。。。

文革辰光上海是单独出教材个。讲起来为仔英文课,我伲学堂专门派老师到上海进修个
我估计,到78年以后,开始用全国统一教材了。我记得读初中个辰光,教材是全日制十年啥啥课本,为了搭全国同步(交关地方实在呒没师资力量),上海也从5年级开始了
 楼主| 发表于 2007-12-24 15:58:22 | 显示全部楼层
落雪
    老早个天比现在冷,一般来讲每一年侪有零下5、6度个日脚。伲娘讲,五几年辰光有一年连得大河里头也结冰个,大平湖(客船)开个辰光,还要勒拉前头拿冰敲脱。箇个有一眼蛮难想象个,总之要比现在冷多了。我小辰光,勒拉农田边浪个水沟里头,2、3公分厚个冰块是经常有个。天冷,所以也常朝落雪个。
    我记得落了最大个一场雪是76年1月份个冷天,也有可能是77年,记勿清了。气象预报讲最低温度可能会得到零下10度个样子,反正蛮冷个。箇日天,正好是我伲放寒假个阿末一天,到学堂里去了去就回转来了。回转来个路浪,北风头大了海泛,开始落雪,外加雪已经开始勒拉路浪积起来了,走起路已经有眼滑了。我心里蛮开心个,明早有雪白相了。
   外头天冷,回到屋里也勿出去了,下半日也没看到哪恁落啥大雪。没想到第二天一醒过来,外头白茫茫个一片,夜里向落个雪大天大地(松江方言,表示非常大),箇恁讲好了,地浪雪顶起码有20公分厚,如果是朝北个墙头,因为北风头实在大,勒拉墙脚口形成50公分左右个斜高坡,蛮壮观个。箇个一天,我做了两桩现在还记得起个事体,一个就是堆雪人,堆了一个前所未有,勒拉我眼里不空前,但是绝后个大雪人,大概一公尺高(说绝后是因为后来再也没有下过这么大的雪) 。还有就是我朝雪里向拆尿,拆出来本来是想拿雪炀脱,结果雪只有炀脱勿多,反而勒拉雪个对照下头,尿是蜡蜡黄个,有眼吓人,像生仔黄胆肝炎个病人个尿。
   箇场雪落了之后,勒拉背阴、勿通风个地方,几乎炀了一个月再炀脱个。没想到落雪个年份后来越来越少,我囡儿出生之后,上海地区几乎没落过像样个雪,就算落下来,一歇歇就炀脱了。
   题外话:我伲乡下有句俗话:落雪狗欢喜,麻鸟(音刁)苦tsih tsih。是讲天浪落雪,狗认为天浪落米下来了,麻鸟蛮作孽个,一落雪,吃个物事也寻勿着了。
 楼主| 发表于 2007-12-24 16:10:12 | 显示全部楼层
我想起来了,91年12月份上海也落大雪个。箇天夜里,我上夜班,脚踏车也勿敢踏,夜里10点钟从嘉定梅园路走到西门个联华公司,一步一滑,风大得来阳伞也撑勿牢。第二天讲,因为是零下8度,交关水管也冻裂脱。
发表于 2007-12-24 16:15:58 | 显示全部楼层
85年弗是86年也落过一场大个,相比之下91年伊场弗算大,一塌刮子落著一夜天多一眼,地浪积雪大概碰顶10公分横里。
发表于 2007-12-24 16:18:08 | 显示全部楼层
我里爸爸讲,渠搭小辰光河里还有所谓个“连底冰”,人好上去跑个;现在结来结去只有薄枵枵里一层。

看来相“全球变暖”也弗是一年两年个事体咧哦。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2020-11-28 16:22

Powered by Discuz! X3.4

© 2001-2017 Comsenz Inc.

快速回复 返回顶部 返回列表