吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 3982|回复: 0

嘉定的方言/血统/区划/历史/文化介绍(吴语嘉宝话)

[复制链接]
发表于 2015-4-11 18:41:29 | 显示全部楼层 |阅读模式
嘉定了耷江南吴地个太湖朝东个户荡,东南西北侪拨着宝山,上海/青浦,昆山,太仓了听围着里向。从地理位置浪看,包括着嘉定宝山个古嘉定县正正好是夹了浪娄江,吴淞江,东海实当中个一片三角洲地区。

嘉定顶早是昆山县/娄县个一部分,南宋个辰光(1217年)再从昆山划出来建县,以依歇动个年号为县名,拨着平江府管。明朝个前期,亦划出昆山东头,常熟南头,还得嘉定北头个少数地方一道建着太仓州(散州),嘉定县原旧拨着苏州府管。清朝个前期,嘉定还是苏州府个,直到1724年,太仓变成功直隶州以后,嘉定再划到着太仓州。同一年江南分县,宝山从嘉定划出来建县,忒着嘉定道侪拨着太仓州管。民国建立以后,取消着老底个州府制度,嘉定直接拨着江苏省管哉。30年代开始,嘉定,宝山忒苏州,无锡,常州一道属于江苏省第二行政督察区,1947年后嘉定,宝山忒崇明,启东,海门一道拨划到松江,浦东,上海县了着个江苏省第三行政督察区(上海市已经了1927年脱离江苏省,变成功直辖市哉)。1950年,嘉定,宝山侪拨划到江苏省松江专区,1958年忒松江,浦东,上海县,崇明了新一道侪划到着上海市。1988年着1992年,宝山忒嘉定前后拿县改成功区。像伲可以看到,嘉定了历史浪一直是苏州地区(昆山县,苏州府,太仓州)个一部分,一日也朆拨松江府管过歇个,忒着上海县道益加呒啥关系哉。

教个嘉定西头6000年前头就已经是陆地哉,比起上海县好好恁要早了许哉。古嘉定县地皮还算是蛮大个,包括着今朝个嘉定个全部,宝山个全部,太仓个浏河,陆渡,南郊,昆山个蓬琅,浦东个高桥,高东,凌桥,闵行个诸翟,纪王,上海普陀区个真如,长征,桃浦,还得上海杨浦区,虹口区,闸北区了得三个区个直北面个眼乡镇(譬如彭浦,江湾,五角场了听),一共涉及到两个省七个县市个地方。古嘉定县亦分成功临江,醋塘,安亭,平乐,春申五个乡,后头名字改成功归仁乡,循义乡,崇礼乡,乐智乡,守信乡,取“仁义礼智信”个意思。嘉定还拨着昆山管个辰光,叫“疁城乡”,各佬嘉定简称“疁”。疁城乡个乡治大总了着现在个马陆石岗得块头,嘉定建县以后,县治朝北迁到教个嘉定镇浪。嘉定镇古代叫“练祁镇”,老法里亦常状叫“城厢镇”,1928年开始再叫 “嘉定镇”个。关于古嘉定县各个乡镇个特点,实伲嘉定宝山地区个民谚是实恁话个:金罗店,银南翔,铜江湾,铁大场,教化嘉定食娄塘,武举出着徐家行。当然得个是伲自家内部了叫,苏州府太仓州地区个人,侪叫伲“银嘉定”个。

嘉定闲话属于吴语,也叫江浙闲话,具体来话,了谱系浪属于:吴语——太湖片——苏沪嘉小片——太仓方言大区——嘉定方言小区。嘉定闲话弗是上海闲话,是忒着上海闲话两道个独立个吴语方言。也呒末“上海嘉定闲话”个话法,最得“吴语嘉定闲话”个称法。嘉定闲话忒着上海闲话是弗一样个,了口音,词汇,语法,音韵了新各个方面侪忒着上海闲话推板远了许哉,嘉定口音忒上海口音个明显差异,北部吴语区个人统统侪听得出来个。从口音浪向话,嘉定闲话忒着老个太仓闲话相对有眼接近个,忒苏州闲话,松江闲话相对侪比较远个。

了内部划分浪,嘉定地区个闲话可以分成功北区忒南区两部分,嘉定个4/5个地区侪属于北区,最得1/5属于南区(北区14乡镇,南区4乡镇)。北区拨认为就是语言学分类浪向个嘉定方言,南区则拨划到其他方言区。但是根据实际个听感,南区个方言格实忒北区道还是有得行情个共同点个,忒着边浪个松江府地区是有得区别个。

嘉定人了人种浪总个来话属于典型个太湖东面个苏松人种,买相,气质忒上海人完全弗一样个,着个衣裳也有眼弗一样,区分度高着海泛,常状一看就看得出来个。上海人是苏北人忒浙东人个混血人种,忒嘉定人弗是一个种草,但是嘉定人忒松江青浦人,昆山太仓人长着还是蛮像个,一看就晓得是一个地方个人。

嘉定宝山人个来源,叫行情户荡成陆侪比较偃,各佬嘉定人,还得所有个宝山本地人,侪是历史浪向弗同个辰光从西面搬得来个移民个后代。明末清初个“嘉定三屠”以后,嘉定县城,北乡,西乡地区个点人侪死着差弗多哉,后头边浪个苏州府地区就对嘉定发动着一次大移民。根据记载,依歇动弗少昆山人,太仓人侪搬到两个县边边沿个嘉定乡镇,行情行市个吴江人搬到嘉定县城,常熟人弗管啊浪侪了浪个,还得吴中人,嘉兴人侪多透多透(但是松江府移民像煞弗大看见)。可以实恁话,今朝个嘉定县城人,西乡人,北乡人,大部分侪是清朝以来再刚刚搬得来个移民个后代,得眼移民绝大多数亦侪是从苏州府地区来个。据说了民国个辰光,嘉定镇浪有眼人还了着苏州城里有得老房子了许哉。

嘉定个历史呒末苏州嘉兴得介悠久灿烂,但也忒着江南其他地区一道经历了千年以来个江南历史个风云变化。了宋朝以及宋朝前头,嘉定还是一个蛮荒凉个文教也不大发达个地区,县志记载着依歇动个嘉定民风“性情刚烈,旷顽难治”。一直到明朝,县志还记载嘉定有蛮着力个“滨海气息”,忒内陆弗大一样。明朝前头的嘉定历史呒啥好话,嘉定真正个辉煌是从明朝辰光再开始个。浏河镇个刘家港,本生是嘉定个后手再划到太仓,得浪老早点长期是中国第一大港口,也是郑和下西洋个出发地。嘉定人也参与着江南各地个抗金,抗元,抗倭,抗清,反清,抗日个各种斗争,是太湖吴地个弗可分割个一部分。除脱名气比较响个嘉定三屠外,南翔罗汉党,外冈游击队也侪是蛮有名个,陆秀夫个子孙至今原旧生活了浪嘉定马陆,老早是嘉定个宝山,还经历过着惨烈个淞沪会战。但也叫满清入关个依歇辰光,隔壁县个太仓人弗仅朆抵抗清兵,反而主动相帮清兵屠杀抢劫嘉定,奈么好哉,从此以后嘉定太仓亲兄弟弗对哉,还号称“嘉定太仓弗通婚”,到奈还是得恁朆变个,嘉定人还拿太仓人当成功强盗胚,弗大要看伊哒个。除脱打仗外,嘉定也是中国顶早有人信耶酥个地方之一,中国个基督教传播历史当中也开过一场重要个“嘉定会议”。在外特别要话个是,嘉定曾拨认为是一个有得“帝王龙气”个户荡。

嘉定历史浪也出过眼文化名人。明清开始嘉定个文教慢慢恁个发达起来哉,依歇动个嘉定人欢喜读书也蛮有知识,各佬有得“教化嘉定”个话法。昆山人归有光住了嘉定安亭几十年,开办个震川书院(教个安亭震川中学)到奈还是中国现存个顶顶古老个学堂之一。明末个“嘉定四先生”,清朝乾嘉学派的两个代表人物嘉定人钱大昕,王鸣盛侪蛮有名气。明朝个末代周皇后,祖籍也了着嘉定。清朝辰光,嘉定一共出着三个文状元,两个武状元。近现代以来,嘉定也产生过各种各样,各行各业个人才,包括嘉定人侪晓得个陆俨少,胡厥文,还有祖籍了嘉定个赵小兰,陈祖德。嗯特别要话一话个是,嘉定一个县了100年里向产生着包括顾维钧了许个三个外交部长(虽然多数只是祖籍),得个即使了整个中国也是蛮少见个。

嘉定个文化属于太湖吴文化,忒着苏州,嘉兴道一式一样个,侪是“小桥流水人家”个江南水乡,但嘉定弗是所谓个“海派文化”, 忒着上海是完全弗一样个,也浑身弗搭界个。弗管是外头个城建还是里向个人,嘉定侪原旧忒苏州,嘉兴一样是太湖吴文化,弗是上海人个宁波+苏北+西洋腔调个海派文化。

嘉定县城是江南个历史文化名城,有得1000多年个古老历史。南宋辰光造个嘉定文庙,号称“吴中第一”,到奈还是中国顶大个县级孔庙之一。嘉定城还有明朝个古典园林汇龙潭,秋霞圃,以及法华塔,州桥,西大街了听,嘉定城外还有得一段明朝留下来个古城墙。除脱县城外,嘉定还有得三大古镇:南翔镇,安亭镇,娄塘镇。其中南翔历史顶悠久,建镇到奈已经超过1500年哉,也拨公认为是上海市个四大古镇之一。南翔个历史文化底蕴也弗比嘉定县城推板,五代造个南翔双塔,是中国现存顶早个仿木结构砖塔,明朝造个南翔古漪园,也是江南名园,南翔寺个唐经幢,也古老透古老透个,南翔小笼包,更加是全国侪闻名个。还得一个明清辰光个南翔人写过一本〈续茶经〉,拨当成功是一代“茶圣”。三国辰光个外冈吴兴寺,也拨认为是当时辰光个“江南三大寺”之一。在外还得孙权老娘造个安亭菩提寺。当然,嘉定顶有名个特产还是大蒜忒着草编,而嘉定个代表性个文化艺术,眼板是嘉定人自家发明个“嘉定竹刻”。嘉定竹刻也影响到着旁边行情地区,成为江南传统工艺艺术个重要代表之一。上头得眼,侪证明着像伲嘉定是一个有得悠久历史,有得文化沉积个地方,忒上海是弗一样个。

嘉定人,宝山本地人,还得松江府忒崇明个兄弟,虽然了行政浪向是拨上海管个,但是实伲个人种,气质,血统,历史,文化,风俗,方言了新,统统侪是忒苏州,嘉兴,启海一样个,同文同种,反而忒着上海人道呒啥关系个。覅管人家囊侪话伲是“上海人”,伲自家要弄得清爽,行政归行政,民族归民族,两桩事体,上海人忒伲一个市弗代表伲忒伊哒道就是亲眷,更加弗代表伲忒上海人是一个群体,一个民族。上海人弗管血统还是文化侪忒伲起源弗一样个,伲个亲眷是苏州人,嘉兴人,启海人。嗯也希望有一日天,伲好脱离上海,忒苏州,无锡,常州,嘉兴,湖州,启海,通东,丹靖(或者再加上杭州)一道建立太湖省,恢复浙西路,完成实伲太湖吴人600多年来个重新统一个顶大个心愿。


注:以上文章比较书面,所以用词也比较书面,缺乏生活气息和口语特征,但不代表日常生活用语也这么“官”。一般口语中,嘉定宝山话和上海话的差异是更大的。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2020-8-7 17:47

Powered by Discuz! X3.4

© 2001-2017 Comsenz Inc.

快速回复 返回顶部 返回列表