吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 3610|回复: 0

江南个孤儿——嘉定宝山(吴语嘉宝话)

[复制链接]
发表于 2015-4-11 18:36:28 | 显示全部楼层 |阅读模式
认得吾个人侪晓得,吾耷年前头了QQ浪个名字叫“江南个孤儿”。 迭个名字阿是听上去有眼熟悉,像煞勒啊浪听歇过动?对个,罗大佑有得首老歌,叫《亚细亚个孤儿》,话个是台湾(也有人话忒着当年辰光缅北个国军有得关系)。禄山兄当时一看到吾实个名字,就反应过来是罗大佑个伊首歌。台湾叫“亚细亚个孤儿”,大家侪了解,台湾有渠自家个特殊个历史背景,个实伲嘉定宝山为啥也叫孤儿,外加是叫“江南个孤儿”呢,或了伲迭块户荡也有啥特殊个历史背景忒着现实处境?迭个问题,是吾焦想要话个,大家待吾慢慢较点忒尔哒道一眼眼个话来。

打开中国地图,先寻着长三角,放大著看,了浪苏州忒着松江个交界许头,有两条河浜,一条叫吴淞江,一条叫娄江。了着迭个两条河浜还得东面个长江出海口当中,夹了许个块土地,就是伲垫要介绍个地方——嘉定宝山。嘉定宝山老底子是一个地方,侪是古嘉定县个,关于渠个历史,吾下头就要话下去哉。

顶顶老早个辰光,实块户荡一直是属于吴郡娄县个。了了南宋嘉定年间个公元1217年,浙西路平江府昆山县个地方官上报朝廷,话昆山地方脱大,治理弗大便当透,请求朝廷担昆山县东南部个几个乡划出去单独建县。1218年1月,朝廷批复同意。从此,迭几个乡拨划出昆山县,单独成立一个县,并以伊歇著个年号命名,名“嘉定县”,分归仁,循义,崇礼,乐智,守信五乡,原旧属于平江府。相对现在来话,古嘉定县伊歇动还是蛮大个,大总有得一千平方公里,忒着现在太湖地区一般性个县差大弗多大。到着元朝,嘉定县改为嘉定州,属于江浙行省苏州府。挨下来到着明朝初期,亦从昆山个东面划出来一块户荡,加上常熟南面个一块,还得嘉定北面个两小块户荡,组成着太仓州。伊个辰光太仓还是散州,归南直隶苏州府管理。到着清朝,一开始还呒啥,后手到着1724年,奈弗对哉,太仓升到直隶州,划出镇洋县,嘉定划出宝山县,加上崇明,一道拨着太仓管哉,出棺材个西头阿卵忒着苏州府平级哉话。一直到清朝灭亡,嘉定,宝山侪是属于江苏省太仓州个。到着民国,取消着传统个州府制,嘉定,宝山脱离着太仓州,归江苏省直接管理。民国个辰光,虽然只有短短个三十几年,但是区划个变动还是蛮大个,一歇弗歇了拉变个,吾也搞弗大清爽,后手头嘉定,宝山还是忒着太仓,苏州地区登一道歇过个,侪属于中华民国江苏省第几大区(具体啊竿记弗大清爽哉)。五十年代开始,嘉定,宝山拨划到江苏省松江专区,自从松江地区了唐朝辰光跟着嘉兴道脱离苏州地区,朝后个一千多年以来,历史浪头一趟忒着松江道登着同一个地级行政区划当中。但是也呒几年,到着1958年,嘉定宝山,崇明,松江府地区,了同一年当中分两批拨从江苏划到上海,从此归上海管理。1989年,宝山撤县改区,三年后,嘉定也撤县改区,了着郊县当中,侪属于比较早个,一直到今朝。

吾了着荡要特别个说明两桩事体。一是清朝辰光个“沪海道”,弗好作为嘉定宝山属于上海个证据。第一,沪海道弗是常规个区划,道只是出于军事忒国防个目的特别设置个,弗好代替太仓州实伦个常规政区个日常管理个用场。沪海道个范围还包括了许太仓,海门,启东,或了迭眼地方也侪是上海个?第二,假使“沪海道”就代表是上海个地方,个么清朝辰光还有过歇“苏松太道”,“苏常道”了新,照腾个逻辑,阿是苏州也是属于上海个?常州是属于苏州个?苏州松江太仓,苏州常州是一个地方?第三,沪海道则弗过是道台官员平常登了上海办公,弗代表沪海道下头个地方侪是属于上海个。个就像江苏个省会是南京,扑了意思是话苏州,扬州,盐城,徐州侪是属于南京个?嘉定宝山就算属于沪海道,也弗代表是属于上海。两是抗战辰光个汪伪政府个区划,也弗好作为嘉定宝山属于上海个证据。之前个民国正统个南京国民政府个区划,嘉定宝山是属于江苏省个,忒上海道呒啥关系。汪伪个政权是非法个,渠个区划自然也是非法个,民国还朆灭亡了许,个囊好担汪伪个区划代替民国区划当成功正统?尔话阿是?再讲汪伪个统治共总呒几何日脚,也弗好说明啥问题。抗战一结束,嘉定宝山忒着别它两个郊县一道马上就脱离上海,重新拨划归到江苏,前脚后脚个事体。

实伲嘉定建县到奈,也有得将近八百年哉。实个八百年当中,伲嘉定个土地越来越小,当年一千平方公里还多眼个土地,到今朝奈最得不足一半。想想也真蛮罪过个,吾觉着从迭点浪来话,国家也是蛮对大弗起伲个。人家昆山,太仓,吴江,常熟,苏州,伊歇辰光也一样拨“江南分县”过,后手头侪重新合并哉,最得伲嘉定宝山,还有松江地区,朆重新并县。嘉定忒着宝山亲兄弟道,永远个拨分开哉。宝山离开嘉定将近三百年,实眼年数当中,宝山兄弟也受著兴兴个苦,特别是上海人一直刚死骨缩个弗太平,一停弗停个了了占宝山个土地。据说今朝上海市区个土地,最得三分之两是上海县个,还有三分之一是宝山县个。就算是今朝个宝山区,直南面忒着东南面个土地原来也是上海市区个吴淞区,后手头上海人焦得出于啥目的,亦担吴淞区忒着宝山重新合并哉。包括原来是宝山县城个宝山镇(顶老早叫淞阳镇),老早就拨上海移民占领同化脱哉,现在伊浪一句宝山闲话也听弗到哉。宝山除脱划拨上海地,还担高桥,高东划拨着浦东(凌桥覅得阿是)。听一个宝山杨行本地个兄弟话,今朝整个宝山还了讲宝山闲话个人,共总大则最得十万人。原来是嘉定本土个真如,桃浦,长征三个镇(虽然真如原来是从宝山划到嘉定个,但宝山归根到底还是嘉定个),后手也拨上海人划过去哉,外加侪弄著眼江北人进去,像伲嘉定人侪晓得,桃浦是“江北人老窝”,真如,长征个江北人也是海海泛泛,作孽着伲个桃浦,真如,长征个本地人兄弟。除脱宝山忒上海,太仓个浏河,南郊,陆渡,昆山个蓬朗,闵行个诸翟,纪王,老底侪是伲嘉定个,浏河镇南面至今还了话标准个嘉定北头闲话,诸翟,纪王,高桥,高东个本地闲话,侪带有眼嘉定口音个。但昆山花桥好像弗是嘉定个,花桥闲话接近安亭闲话,据说老底安亭是实个一带个商业中心,花桥受安亭口音个影响造成功个。

话起嘉定闲话,上海人扛棺材个则弗出空个了着说书了许,钱乃荣个“温藻浜是嘉定宝山口音忒上海口音个地理分界线”个理论,猫儿也笑瞎脱(清坛个祁嘉耀还相信实个理论,用来“警告”吾,笑煞)。嘉定个温藻浜南北两头,口音一眼眼区别也呒末个,宝山个温藻浜南面,老早点侪是宝山本地闲话,后手头上海人移民过去,再变成功上海闲话个。再讲温藻浜是五六十年代挖个人工河,弗是自然河,从来弗是啥方言分界线。嘉定闲话个内部分界线是了浪虬江,也就是古吴淞江,江南面个江桥,封浜,黄渡,安亭四乡镇忒江北面个嘉定主要地区有眼区别,但呒末上海人话个介大。上海人担江桥,封浜算成功“上海方言区”,黄渡,安亭算成功“松江方言区”,真了呒啥话哉。封浜北面个口音忒着南翔有眼接近,南面个口音接近松江府,但是江桥,封浜,黄渡,安亭,迭四个地方个闲话,侪是嘉定口音忒着松江口音个混合区,松江府人听著,嘉定口音还是蛮足个。覅话啥嘉定南面哉,就是青浦北头个闲话,听起来也有眼偏嘉定口音个。各佬,嘉定南面四乡镇个闲话,原旧应该算嘉定方言,弗是啥松江方言忒上海方言。上海人话话南面四乡镇弗是嘉定闲话,个么也算哉,宕日勒浪家变哉,居然连南翔闲话接近上海闲话,比江桥闲话还接近上海闲话也出来哉,真要死快哉,阿是耳朵坏脱撒?正宗个南翔闲话顶接近马陆闲话,就算接近嘉定北头闲话,也要超过接近嘉定南面四乡镇个,忒着上海闲话道,益加呒啥关系,远开八只脚哉阿好?南翔马陆闲话个流摄,灰候韵比嘉定镇浪忒嘉定北头闲话还要离上海闲话远哉,尔哒覅神知胡知。尔哒上海人阿是平常辰光侪欢喜担两管尺量地图比远著近个?

嘉定忒宝山个本地人地区现在到处侪是上海人,上海闲话,像一只只老鼠恁个到处了了钻来蹩去,好好恁个嘉定县,拨上海人弄着一天世界。宝山南头本者就是上海人地区,中南许头也一直拨上海人搬过来,中北许头还稍微好眼。嘉定原来个整体情况比宝山要好,但是嘉定个城镇地区,上海人也多透多透,嘉定镇浪侪是眼计划经济年代下乡个上海人,住着南翔镇浪个上海人弗多(但有也是有少数个),但是了浪工作个上海人也行情行市,安亭镇浪据说一半侪是计划经济忒改革开放初期辰光下来个上海人。迭眼上海人登了嘉定几何年数,非但朆拨同化脱,反转著还了同化嘉定本地人,弄着嘉定三大镇浪侪是眼上海闲话,上海腔调个物事,看看也惹气,最得上海人基本弗到个娄塘镇比较正常。实个还是老底个情况,最近几年益加弗得了,上海人弄着越来越家变哉,嘉定镇,安亭镇奈也覅话哉,嘉定新城,马陆镇,南翔镇,原封浜镇,到处是成千上万个上海人,上海人个规划当中,嘉定新城要弄五十万人,南翔要弄十洒万靠廿万个上海人过来,马陆么能万个人也是顶少个。至于江桥,真新迭种恁么是已经算数脱哉,基本拨上海人占领哉。听有个祖籍苏南个上海人话,江桥,真新基本是祖籍江北个上海人拆迁过去个,外加是一个地区个江北人一道拆迁过去个。江桥,真新现在虽然名头浪还是嘉定个,人基本侪是上海人哉,忒着桃浦,真如,长征了啥也呒啥实质区别哉。伊个祖籍苏南个上海人还话,伊歇辰光上海市ZF担眼江北拆迁户分到桃浦,结果实眼江北人豁变哉,弗肯拨嘉定管,到上海市里向去闹事,上海市ZF担江北人也唔办法,只好担桃浦划出嘉定,拨着属于上海市区个普陀区管,好弗容易个奈么总算太平哉。除脱着上海市内各个地方外,行情个上海人还跑到昆山,太仓去买房子。吾也理解弗大透,世界浪囊是有得实种能介人个,本地人覅做,就欢喜做外地人,太公是外地人,从苏北,无锡常州,宁波绍兴,广东,山东到上海,大爹是外地人,从上海到浦东县,闵行,吴淞,爷是外地人,从浦东县,闵行,吴淞到川沙,宝山,金山,自家也是外地人,从川沙,宝山,金山到松江,嘉定,南汇,奉贤,甚至昆山,太仓,每一代侪是外地人。人家周边大中城市个苏州人,常州人,南京人,杭州人,绍兴人,宁波人也好,别它直辖市个北京人,天津人,重庆人也好,别它移民地区个深圳人,珠海人,东北人,北疆人也好,随便啊一个地方个人,阿有迭能介个?就算是渠哒嘴巴里向话个“硬盘”,个么也弗是实伦个,也呒弄着实伦滑稽法子个,阿对?

上海人了嘉定留著交交关关个种草,吾了网浪认得一只嘉定镇浪个土生上海种,是其中个代表,迭排棺材个心理侪是弗大正常个。只短寿话:要弗是嘉定闲话还分尖团个说话,迭种闲话忒着垃圾道呒啥区别哉。还话:嘉定闲话属于松江闲话系统,弗属于太仓闲话系统,嘉定闲话中忒着苏州闲话差弗大多个地方,忒苏州闲话弗是同源个,嘉定镇浪个闲话就是“老上海话”。实种能个滥讲八讲亦呒良心个闲话,显示出着嘉定个上海人后代个扭曲心理。同样是对吾“反上海”有看法个嘉定镇浪人,吴协个正宗本地人个小囡,就弗会实能介乱话。吾问过歇华师大汉语研究生专业毕业个一个嘉定华亭人,还得熟悉音韵个一个宝山杨行人,还有另外一个欢喜研究地域,族群个嘉定镇浪人(虽然也是上海人后代,但是祖籍了浦东,忒祖籍了外地个棺材心态弗一样),渠哒侪话,嘉定闲话忒着上海闲话晤啥关系,是两种方言,嘉定闲话忒老个太仓闲话比较接近。问问看一眼弗懂方言个普通嘉定镇浪人,侪话,嘉定闲话接近昆山闲话,太仓闲话,要超过接近上海闲话个,嘉定闲话忒着上海闲话,差别还是蛮大个。还有一个欢喜了帖吧里讨论吴语,申花球迷个南翔农村人,也话,南翔闲话忒着上海闲话相似度蛮小个,假使南翔闲话忒着太仓闲话有65%个相似度个说话,个么忒着上海闲话大则顶多最得25%个相似度。另外一个南翔农村个爱好方言个高中生有趟还突然之间个忒吾发表感想,话:嘉定闲话还是偏苏个,忒着松江地区个闲话弗一样。就算一直骂吾“脑残”个一个亲沪反汉脱中个,十一岁到真如个上海化个封浜人,也话嘉定闲话忒着上海闲话差着蛮大,口音完全弗一样个。吾担嘉定华亭人个音频发拨交关吴语人听,有苏州城里人,吴县农村人,无锡人,常州人,高淳人,绍兴人,宁波人,台州人,上饶人了新,还有得一眼上海人自家,渠哒侪觉着弗像上海闲话,除脱口音完全弗一样外,还比上海闲话难听懂,还得比起著上海闲话,忒苏州闲话还是要更加像一眼。还有一个了嘉定读过几年书个宜兴女人话,嘉定闲话还是属于苏南闲话口音个,忒着上海闲话完全弗一样。顶顶笑煞人个是两竿苏州人,一竿话,嘉定闲话听上去弗像上海闲话,呒末一眼苏北口音,蛮好,尔哒奈要好好恁保护,另外一竿话,渠去过嘉定镇,南翔镇,觉着镇浪个闲话还是有眼接近苏州闲话个,听上去蛮热络个,忒着上海市区个闲话差别大著海泛,完全弗一样个,希望像伲嘉定人要好好较保护自家个方言。虽然闲话是实伦话,但是现在嘉定宝山个城镇化个地区,口音侪多多少少受到上海闲话个影响忒同化,正宗个朆受歇污染个嘉定宝山闲话只好到离开镇浪比较远个农村里去寻。吾一直觉着上海闲话真个是蛮恶行恶状个,自家已经是吴语当中倒数第二脱底个(倒数第一个是杭州闲话),还一眼自知之明也呒末,亦了到处同化影响其他地方个方言,难么也难听煞,还自我不觉臭个标榜自家是“吴语公约数”,忒着苏州闲话,其他吴语道去争“吴语标准语”,“吴语通用语”,面皮倒是实实较厚。

台湾人话,台湾拨荷兰,西班牙,郑明,清朝,日本,中华民国侪管过,渠哒自家也覅得自家到底是行人个。台湾人觉着自家呒末根,呒末归属忒依靠,是亚洲个孤儿,外头来个人来一个跑一个,只想利用渠哒,呒末人真正当心过渠哒,担渠哒当自家人。就像伊首歌里向唱个一样:亚细亚个孤儿了风里向哭,呒人想要忒汝孛相平等个游戏,每个人侪想要汝心爱个孛相倌。。。亲爱个嗯妈迭是啥个道理。。。实伲嘉定宝山,历史浪拨着昆山,苏州,太仓,江苏,松江,上海侪管过,伲自家也覅得自家到底是行人个。实伲也呒末根,呒末归属忒依靠,是忒着行人也呒啥大关系个,拨抛弃了个江南个孤儿。实伲虽然是昆山划出来个,但是嘉定人短寿个现在已经不担昆山当桩事体,昆山人也觉着伲是“上海人”,忒伲道弗近弗远保持距离。虽然长期是苏州府个,明末清初个辰光也有得行情行市个苏州府人(吴江人,常熟人,昆山人,太仓人,吴中人了新)搬到嘉定县城忒嘉定西头北头来,据说一直到民国个辰光嘉定镇浪还有眼大户人家了着苏州城里有老祖宗留下来个房子,但是毕竟忒苏州城离着实在脱远,口音也差著兴兴,各佬一直缺少互相之间个亲近认同。苏州地区人还则了话苏州忒上海个亲眷关系,上海人当中有得交关人祖籍侪了苏州地区,实质浪上海人当中个苏州籍比例是弗高个,远远弗及嘉定人身浪个苏州地区血统比例高,但是“富了深山有远亲,穷了闹市呒人问”,苏州地区人只强调自家忒着上海个血缘关系,老早侪担伲嘉定宝山人忘记脱哉。虽然忒太仓历史渊源顶近,但是照历史浪个太仓人做汉奸,相帮清兵屠杀抢劫嘉定个原因,嘉定人尤其是城里,西头,北头个两块棺材,侪蛮厌滋太仓人个,话渠哒“西头人”了“西头阿卵”,甚至两百多年朆通过婚个。吴人本生就弗认江苏省个,江苏省县直辖还呒几年,拨江苏直接管,有忒着呒末也呒啥区别了许。嘉定宝山忒着松江府地区了历史浪一千年以上弗了一道,各佬对渠哒也蛮陌生个,认同感弗强,再讲拨松江管共总也呒几年工夫个。虽然现在侪是上海个郊区,但是还是明显可以觉着,松江府七县关系比较亲热,虽然有倘时也则了拉吵吵闹闹个,但是是一家,嘉定宝山弗一样,忒渠哒道呒啥来去忒认同,明显是两道个。崇明虽然也是太仓州个,但是因为岛浪向个特殊个地理环境,再加上崇明人个来源主要是松江地区忒浙江北面个嘉兴,湖州,绍兴,各佬忒嘉定宝山之间也弗大亲热个,甚至于上海郊县个大陆地区有眼人对崇明人还有眼看大弗起(实质浪崇明人也行情侪是从苏锡常地区搬过去个,较苏锡常人也有眼看弗起崇明人忒着崇明人后代个海门人,启东人,觉着渠哒是“江北人”,崇明人,沙地人各佬蛮恨个,是不大愿意公开承认自家忒苏锡常有得关系个)。

实伲嘉定宝山现在属于上海管,下趟要分出去估计是弗大可能哉,但是凡是有得骨气个嘉定宝山人,侪是从来弗会真正觉得自家是上海人,是属于上海个。老早点上海人是看弗起伲郊县人个,话伲是乡下人了阿乡,再讲上海人个名声也弗好,跑出去也难听透难听透个(比比看,苏州人,杭州人个名声几何好),典型上海人个腔调(不管是市井腔调还是“海派”腔调),伲郊区人也是看大弗惯个,各佬伲也弗想当啥“上海人”,呒啥好个。现在上海人想拉拢伲,一个目的是上海人了市区登弗下去,想朝郊区跑,搬到伲荡来,还得一个目的是联合伲一道反“硬盘”。因为上海人对郊区人个态度有所变好让郊区人觉着适意,上海人年纪轻个一代素质也的确比老一代好着交关也让郊区人认可,越来越多个郊区人跑到上海读书上班忒上海人有接触交流,还有眼了上海最近几年个经济忒城建发展当中担着好处觉着满意个郊区人也会得拥护上海好继续获得或者维持实伦个好处,郊区人自家面对本地越来越多个外地人,也需要先忒上海人团结起来,一致对外,维护共同个即得利益。种种变化让郊区人加深了对上海人个认同忒依赖,再加上郊区人当中也有交关人要么蛮势力,要么蛮虚荣,要么蛮自卑,要么蛮向往大城市个生活,渠哒侪蛮嫌变郊区乡土个物事,巴弗得望着早眼“脱乡入沪”,各佬交关郊区人现在侪是表现出亲近认同上海。但是话句难听闲话,上海人忒着美国人差大弗多,较著实力个原因,现在人家侪呒办法想弗得弗服,等到有得一日天美国忒中国了着世界浪个位置调调,尔到辰光再看看较,美国阿会得还像现在腾有得介希多个朋友?上海人啊日实力严重下去,也用弗着变着脱差,就变成功今朝个苏州,南京迭副吞头势好了,个么到辰光尔哒看好好哉,郊区人阿会得再像今朝介亲上海?上海人对郊区人本生是呒啥吸引力,亲和力个,郊区人欢喜和向往个是“上海大都市”,弗是“阿拉上海人”,关于迭点,上海人是要拎拎清爽个,对自家个人缘哪恁要有得自知之明,当然不包括少数拨汰过脑子个郊区年轻人。前头话个迭眼,侪是指伊排弗大有骨气个郊区人,像伲实伦有骨气,有乡土意识个郊区人,绝对是弗会得去亲上海,认同上海个。上海人便恁就忒伲郊区人从来源,血缘,外表(包括卖相,衣裳打扮,气质),文化,人文,历史,风俗,民风,方言,思想观念,思维方式,生活方式了挺,各方各面侪是弗大一样,甚至有些方面是完全弗一样个,呒啥共同语言。再讲现在上海人侪跑到伲郊区来,伲郊区个乡土个物事,从语言,文化,到习俗,观念,侪拨上海人消灭脱,同化脱,就算呒迭眼事体,伲也弗欢迎渠哒来,正常人行人会得希望自家个家乡,拨一大群外来生物抢脱,日逐侪去看渠哒两张触气个外乡面孔,听渠哒两句触气个外乡闲话?横竖吾是绝对弗希望,弗欢喜个,忒着渠哒道也绝对呒末共同语言个。

实伦话起来,嘉定宝山人忒着其他郊区人,忒着上海人,忒着苏州地区人,忒着锡常人了浙江人,侪弗大有道个,各佬腾一竿子独来独往,辰光长着也真是蛮厌气个,拨人家看看么也蛮古怪个。格实实伲一直想晓得,想问:实伲到底是行人?实伲到底属于啊一个集体?实伲是真正个孤儿,还是照啊眼原因着“拨孤儿”?伲真个只是一个呒爷娘,呒兄弟姐妹,呒亲眷个,独竿子个江南个孤儿?从吾个人个角度,是蛮认同苏州地区个,尤其是昆山,太仓,就是焦得昆山人,太仓人是哪嘎看伲个,阿是原旧担伲当失散个兄弟姐妹,还是担伲看成功忒着上海市区人呒啥大区别个典型个“上海人”?郊区人当中,吾顶认同个是崇明忒青浦,可惜迭两个地方侪蛮偏个,嘉定宝山人一般性弗大去个。对于实伲来话,可以去皈依大上海,让自家麻醉了着精神鸦片,精神海洛因里向,假使选择着保持乡土意识,独立思考,追寻自家个真实身份,个么,日朝侪会得拨迭个身份认同个问题缠牢了许,生活了一种精神浪个苦恼忒迷茫当中。大部分人侪会得情愿去选择前头一种,但是吾仍旧板定会得选择后头一种,情愿去做一个“痛苦个清醒者”,了大城市个一贯压迫面前坚持保卫乡土,维护乡土,直到啊日困去朱桥个铁板浪向为止。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2020-8-7 16:47

Powered by Discuz! X3.4

© 2001-2017 Comsenz Inc.

快速回复 返回顶部 返回列表