吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 2339|回复: 0

【讲讲伲苏州】

[复制链接]
发表于 2013-4-28 22:53:07 | 显示全部楼层 |阅读模式
    苏州电视台格【民生在线】【李刚评话】蛮好看格,节目里向是讲格百姓事体,五花八门,生动活泼,还有一些丑恶格社会现象,批评得好啊。【电视书场】里向,大书格响档说得呱啦松脆,小书格开篇唱得另有一功。苏州人实梗好格环境,弗听苏州评弹么实在有点浪费。我有空格辰光欣赏水乡苏州风光片,看到七里三塘街,马上就想着仔唐朝苏州刺史白居易为伲苏州人积格功德;想着仔老底子姑苏城繁华似锦格盛世景象;想着仔《玉蜻蜓.庵堂认母》勒虎丘山夕阳弄法华庵里,申贵生格儿子徐元宰中仔解元后为仔解开小辰光带勒身浪格血书之谜,亲自到庵里去三师太志贞尼姑为亲娘,荡气回肠,令人唏嘘;想起仔《三笑》里唐伯虎为仔秋香,搭乘仔米田共格一只小船,从虎丘一直跟梢跟到无锡龙亭,卖身投靠勒华相府里向,做个书童,改个名字叫华安;想起仔促狭朋友祝枝山勒华相府里向当仔华鸿山格面刁难唐伯虎,要俚用四句诗一塌刮子廿八个字,拿苏州城格特点全部概括出来。唐伯虎好学问啊,故意落破绽厾脱前头两句诗让祝枝山高兴一下,“姑苏城外有三塘,固是人间极乐场”,后头两句么显显才情畀俚看,“沽酒店开蜂亦醉,买花人过路犹香”,倷看,三塘街浪酒店连牢酒店,开得密密猛猛,哪怕胡蜂蜜蜂飞过,闻着仔酒味叫啥会得闻醉脱,嘙嘟掉勒地浪,单单一个“蜂”字就代表仔春天。虎丘山格花农半夜里采仔栀子花白兰花,装满仔一担吭乎嘿乎从虎丘过三塘进阊门,人走过哉进仔城哉,路浪向仍旧有栀子花白兰花格香味,眼睛一闭花香扑鼻。祝枝山弗壳张唐伯虎有实梗呱呱叫格才学,别人四句诗尚且做弗过来,倷格朋友奈哼只用十四个字两句诗就拿苏州城花天酒地闹城春色格繁华景致写得淋漓尽致,真格佩服格哦。

您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2020-10-26 23:16

Powered by Discuz! X3.4

© 2001-2017 Comsenz Inc.

快速回复 返回顶部 返回列表