2011年08月16日 15:13 来源:新民晚报
勿要看我是一个十九岁个小囡,其实我还蛮怀旧个,平常呒没事体就会怀念小辰光。但是勿晓得从啥辰光开始,自家应该天天挂辣嘴巴浪向个上海闲话也成为了我怀念个一部分。大概因为学堂里脱人家交流侪用个普通话,一直搿能也就习惯了,上海闲话勿讲勿讲末也退化成三脚猫了,交关辰光我侪勿情愿讲,常怕出洋相。
几个号头前我辣夜报上头看到了“上海闲话”一版,见识到交关上海话个书面用字,顿时觉得老新鲜、老好白相个。我老自豪,原来上海闲话也是一门语言,有个完整个系统,勿是嘴巴讲讲就算数个。读仔夜报浪个文章,一股浓浓个市井百姓生活扑面而来,邪气精彩,有人情味,拨我感觉到了老早阿拉屋里向长辈“栀子花,白兰花”个童年,亲切得勿得了。
我想,语言搿样物事是有伊存在个道理个,一个地方个风土、人情,还有交关因素侪构成了当地独有个语音语调脱仔讲闲话个方式。反过来看,假如当地人勿讲当地闲话,葛末又阿里搭能体现出独有个情调风味,哪能真正个传情达意呢?更加可惜个是,上海话个优美脱仔鲜活却老直接个告诉我,勿好拿伊掼脱!每趟听人家讲起幽雅个上海情调,我个脑子里就会出现一个举止温柔个女人,伊可能穿旗袍,也可能穿件工作服,但是伊一定是辣辣讲上海闲话个,伊讲闲话个腔调认真而平静,吴侬软语里充满柔情。还有交关熟语也老有意思!有个听起来好像“瞎三话四”,又像“瞎七搭八”,但是“勿管三七廿一”,侪精炼而活泼,有一针见血个本事。有个辰光我辣街浪向走,耳朵边侪是上海话个叫卖声脱仔讨价还价个市声,勿晓得啥道理,我觉得老捂心,脚步也变得轻快。搿大概就是所谓个归属感。
此时此刻,小辰光弄堂里阿姨伯伯个上海话又回响辣心头,拿我“摇到了外婆桥”。上海话对我来讲,实在是一个剪勿断个情意结,脱我全身个每一条血管连辣一道。我又哪能会忘记脱伊?台湾个流行团体S.H.E.有首歌叫《中国话》,大江南北老受欢迎,但是我更希望阿拉上海人,特别是年轻一代个心里还有另一首歌,伊叫《上海话》!
作者:殷朝虹 |