关于吃蚊子老虎的转贴

showay

http://club.book.sina.com.cn/yccompete/chapter.php?id=5061
………………
………………
        啪！——又是一记惊得四妹奔上楼来，土儿用手指捂着嘴示意没事，别出声。
　　“中国足球队嘛也老早输脱哉，赛过女人养小人，伲也勿好相帮的，但必过输得实在太惨哉，勿勿少少人头大额角阔，两眼墨测黑，看比赛的辰光，心里会得肉骨肉髓格痒，捏鼻头做梦嘛也做过哉，头颈骨望长嘛也变短者，咸话呢总归讲勿出来哉，啥体呢？想勿落或。你看呢，格点后卫哪搭还是行当小伙子，活脱脱象个盘房小姐，骨头恩不三两重，才是绵羊颈骨做的，夹忙头里还要膀牵筋，碰鼻头就转弯，防线象蛀空格麻绳，一滴滴也勿中用；前锋嘛全本是眼木头一根或，赛过落水稻草，一点火性阿恩不，总归戳空枪，总归是瞎子吃面，推板一线，还要贼忒嬉嬉，还要看野眼，还要脱嘴落须说大话，嘴硬骨头稣，反正虱多勿痒，债多勿愁，多输几只么又哪享呢？俚笃到底勒嗨踢啥（拖长音）——格末事，伲困梦头里勿会想着，破锣破鼓，三十六板斧才用光，连头搭脑，一只球也勿进，缩是缩得来，弄得伲一个个象喷气癞团。唉，啥人叫伲吃饱仔清水白米饭，呒不啥事体做，偏偏要看足球。弯格叶老师的伲子根根，一只小老茄子，只有六岁了，俚讲俚瞎踢踢嘛横七竖八也会踢进一只，从人家裤裆里踢进去好了或，人家勿敢铲俚犯规格，保护儿童大家勿是勿晓得。这只小吹牛皮窝头，跟俚笃爷一样恩不正经。俚笃爷看见输哉就要唱歌，输得越多，爷就唱得越响，奈勿懂者或，该个就叫黄柏树下弹琴——苦中作乐或；叶老师笃家子婆还要好，原来勿起劲格，现在倒好哉，帮人家掮木梢，买卖足球彩票，讲好格，赚着分一滴滴，荐点小便宜。算哉，不谈俚笃一家门哉。伲还是讲讲中国足球队呶。”
　　“喔哟，笑煞人哉。”土儿早就笑得不成人样，我也忍俊不住，有些苏州老话真是好长好长时间没听到了。有劲。
　　啪！——叶知秋喝了口啤酒，继续道：
　　“中国队输归输，精神还是蛮好，据说现在正好勒海总结，还有人翻毛腔，当然勿关伲啥个事体。伲有点想不通，象有磨子在肚皮里牵该浪不适意，格点人靠两只脚白相格，书本老早呕不先生哉，哪亨还会勒比赛当口弄弄笔头子，文不能测字，武勿会冲米，字也写勿连牵，天天一篇报道，一篇日记，好象自家有一肚皮格《春秋》，倒蛮怪格，阿会足球先生不做，起做文学家哉，或者嘛想伸只后脚，佛面上刮点金，铜钿有得拿就拿点，呒啥勿好意思，该个就叫一等白相人，独吃自家人，想想有点激滚。伲要么拎勿清，里相有花头筋。伲也勿好怪别人家的，人家是代表国家的，球臭，伲可以勿看，省点电，做人家点。但必过，勿晓得格点队员阿清爽，瘪仔屁股嘛转来哉，阿学着点啥末事，勿要勒了伲面前以为你是猪圈里的黄牛——就你大？现在可以掂掂自家格斤量哉，换点臭衣裳就当扼着个黄金狗屎草，该个勿来三格，当心一个勿招架，连吃饭家生也要搬床，自家踢臭球，加一件臭衣裳，假使再闻勿出米道嘛算数哉，伲要讲奈是翁鼻头猪，最终一辈子苦恼子肯定勿是伲。看人家球队，伲才要馋唾水搭搭涕，勿服贴也要服贴。奈看有太阳旗格队，真格是踏勿杀格地扁蛇，硬劲劲轧到仔16强，人家讲，鸡咕咕格蛋勿好跟石卵子碰格，勿听，哪亨介，就象苍蝇见仔热血，一阵勃来风吓煞奈，叫奈俄罗斯买咸鱼放生，死活勿晓得，回过头来再拿突尼斯一记反抄耳光，该浪一来日本人可能会进8强格？吃不煞俚，有点吓人或。再看看太极虎呶，到底勿是吃蚊子老虎，嗨弯得勿得了，该种声势嘛叫声势呀，勿光光有点三脚猫，还有点人来风，经络勿要忒足哦，伲妒忌得要骂山门哉，俚笃跟葡萄牙踢是钉头碰着铁头，阿起管俚介，踢末好着或，勿箍头管脚，勿是虚花镜架，踢得葡萄人的眼里象一串串葡萄，连到美国佬也要鏖糟，呶，啥个亚平宁，啥格未爱俚，啥个秃地，啥个皮鞋路，勿认得格，到辰光先饶奈一只点球，再送奈恶涩涩格转起，再跟五大洲团圆团圆，起点黑心野心，胆大有官做，勿壳帐拿个冠军让天地世下人看看。看俚笃两个队，真格叫一拍一抿缝，到最后奈看呶，热灶哪搭还会怕湿柴，蛇自过，犬自行，意思懂格或，才要赢格或，作啥会赢？一个是蚂蚁勿叮无缝砖，另一个是杀人勿怕血腥气。伲勿是俚笃肚皮里格蛔虫，但伲晓得，只要有精神，才有力量。伲也勿会多讲，只希望中国队以后梦少做做，多练练本事，下一趟世界杯呶，看伲格队拿德国队弄得格格裂裂，象三脚猫衔牢一只死老虫该浪，假使格息辰光巴西队的三个耳朵还来嗨，保证戳聋忒俚笃。伲会得看见，中国队一路过关斩将，船到桥，直苗苗。世界杯，勿是活把戏。”
　　啪！——
………………
………………

吴人

结棍，新海上花。。

沈小三

原帖由 showay 于 2007-12-3 23:03 发表
两眼墨测黑，看比赛的辰光