吳徽語言嗰捲舌音

鹦鹉洲散客

“翹舌音就是胡音”嗰說法，乃歇好像弗大有了，該大概也好算是民智漸啟嗰標誌。無錫，常熟，搭仔蘇州舊派吳語儕有交關正宗嗰捲舌音（與衢州嗰翹舌音有眼兩樣個），但是渠拉讀捲舌音嗰字基本上儕比北京言話少（北京嗰捲舌基本上包括中古嗰五類字，而蘇舊﹣錫是只有兩類）；祁門徽語嗰情況就各樣嘞：只要北京讀捲舌嗰字，祁門徽語基本上儕是捲舌，轄字嗰數量差弗多（除脫少數幾個平舌字，譬如“初”、“十”、“生”）。其實徽語裡頭該種情況也是少來希個，除脫祁門好像也弗大尋得出另外例子；另外嗰地方嗰分法一般儕比較接近於寧波、台州（也有一些兒方言是接近衢州嗰，弗管咋麼介分濁音儕變成清音了），“翹舌音”全部併入“平舌音”（吳語例：上海、杭州、紹興）嗰地方反而要少一眼。