【转载】门槛精

吴人

http://blog.eastday.com/qiannairong/art/1174911.html

            刊于2010年9月12日《新民晚报》“上海闲话”专栏


       搿搭讲个“门槛”，勿是祥林嫂“捐门槛”个“门槛”，而是一种处世识事个能力，计算得失个窍门脱仔本事。上海人讲个“老门槛”，是讲一种人，邪气精明内行邪气有办法，碰着事体会找窍门。上海拉开埠以后，外国人办个公园里向开始附设动物园，上海人看到最精明机灵调皮个动物，就是活狲【猴子】，就叫伊“活狲精”。“活狲”个英文名称叫monkey，写成中文就用“门槛”两字代伊，人们对处事精明个人，认为他“门槛精”。

      垃拉商业化社会里向，必须晓得各种“门槛”。上海滩浪，商品琳琅满目，货色多得常常叫不出名头，乃末【于是】要会得“识货”。阿里眼【哪些】是好货，阿里眼是蹩脚货、推扳货、大兴货、落脚货、水货，门槛勿精点就要上当，门槛精了就会搨到便宜。上海马路多，事体也多，节奏又快，要拉商业经营当中胜人一筹，要拉交往当中接翎子快，拎得清，也需要脑子精明。办桩事体伊门槛精，头子活【头脑灵活，善于交际】，懂经【精通】，伊就会有法道【办法门路】，来三【行】，花露水浓【花样多，藏有玄机】，tang得牢【档得住】。拉搿能一个竞争激烈、思想活跃个社会里，精明个人方才站得住脚跟。乃末上海人就门槛精了！何况门槛精，再会有创造发明。上海人门槛精得出奇，也就真个出了奇迹。英国杰出个科学预言家“克拉克三定律”个第三定律讲：“任何非常先进个技术，看来侪跟魔法无异。”第二定律讲：“要发现某桩事体是勿是可能个界限，唯一个途径是跨过搿个界限，跑到勿可能当中去。”只有老门槛可以破格闯到勿可能当中去，上海也就成了“冒险家个乐园”。

      对一点【一些】门槛欠缺个人，上海人是看勿大起个，“阿木林”、“阿土生”、“屈死”、“洋盘”，一大串贬称拿出来形容伊。

       不过真理走过去一步，就会变成谬误。上海人还有句闲话，叫“门槛精到九十六”，搿个是专门用来讽刺门槛精过头个人。一过头，人家就会吃勿消伊。对于老于世故，老谋深算，精通各种作弊诀窍，只想得私利丝毫不肯吃亏，或者善于“翻门槛【变换各种窍门】”损人利己个人，上海人会骂伊是“老刮铲”或“老刮铲拉娘舅”！

热度

我忘記9月12報紙上那個thaon是寫了哪個字了，摥？