有許名字忖起覺得是人生个一部分,恰似是曾經得到過,實際從相朆揢勒手裡。所以一夜命夢做著,第二日爬起便會覺得哀愁,無可名狀,但是的的確確。
箇夏季是迷失个夏季,人詩性起總幻想穿越過時光森林,想想是要尋著解某物事。可惜時間如此單薄,像太陽晃照落來阿衹薄些些一層,嘸法伸手掌握箇一切。感覺上是搖擺弗定个,特別是昶朞回憶,當時坐沃屋裡三樓,望出迲是大片大片抽節个糖梗,會驀臨頭忖到自由。
雖然講爾從來弗自由,即便是為箇弗切實際个生活,輾轉走外地讀書,還是弗解脫。爾弗實心愛解片土地,爾衹是留心解蕩地个人;爾弗留心依底个人,爾關注故鄉名頭上个虛影。矛盾百出,像煞全部都好弗作數。
還是會魘起,手嘸掩胸頭窟个習慣,但是疲累个時候怪夢照舊走得來。箇夏天勒屋裡三樓午睡,先是做著一個女人,容貌姣好漂亮,笑起像一隻貓,嘸來路个覺得驚怕,一記寣。半醒半睏之間,望著一隻小猢猻走過來,恰搭要噢我爬起,來抓我手掌,隨底便掐我腰部頭進,確實感覺到痛。便替硬顫硬顫,層層迭起个夢裡向,醒到現實中。
再回想覺得箇烏影子候熟悉,接落來咦忖到小人箇記个顆星怪遇,是碰著一隻人形黑影,出現个筏數弗止一筏,末腳我成功畀渠諕沱起。為箇事幹,老娘當時撥我一捆柴,講我青光白大日白影影。而朞筏夏天,功勞還在我小外甥个吖吖叫,估計渠是肚餓爻,順帶便拔我一把。
箇命夢之後一段時間內都嘸膽提及,到昶仔總算寫落來爻。而夏曆已盡,諸事伊始。
2009-09-21 17:19 於溫嶺 |