吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4617|回复: 5

说说我自家格故事(十五)

[复制链接]
发表于 2009-9-22 09:27:45 | 显示全部楼层 |阅读模式
本帖最后由 laosuzhou 于 2009-9-22 09:30 编辑

说说我自家格故事(十五)

说说乡下头格牛车棚

        牛车棚也算是伲苏州乡下头格一道特色景观,倷现在再到苏州乡下头去,恐怕已经难以寻觅。勒我童年格记忆里向,牛车棚也是伲经常光顾白相格场化。
        勒伲苏州乡下,河浜密布,纵横交错。水稻格种植也算是伲苏州乡下农民格主产作物。一到田里格冬小麦、油菜收割登场,种稻格水田就要车水泡田。箇辰光,只要到伲苏州乡下头来,就能看得见野田爿里格一只只牛车棚,从早浪到黄昏头老牛车水格忙碌景象哉:一只戴上眼罩格水牛套上架,牵动牛车盘勒牛车棚里兜圈子。转动格牛车盘勿停发出格“盎里里,盎里里”格响声,老牛时勿时格“哞哞”鸣叫声,听起来格味道就像是老牛搭牛车勒浪对唱山歌一样,相当悦耳,十分动听。牛车盘周边格齿带动地轴格转动,连勒地轴另外一端格是一部车水格水龙,一头伸勒河浜里,一头搭勒水沟浪,随着牛车个转动,河浜里清澈格河水源源勿断格畀水龙车浪格戽水板提上来,“哗啦啦”格流进灌溉稻田格水沟。一个头戴箬帽,一手挡牢仔嘴浪格旱烟管,一手拿好仔一把平头起土铲格农民,一面喷云吐雾,一面沿水沟巡视,看看水沟两边一丘丘田里向水格深浅,要拿水够深箇丘田头格缺口用铲挖泥土填塞起来,还要搭还朆放水箇丘田格田头开口放水。老牛也勿能一径让俚勿停格勒牛车棚里转圈车水,做两个钟头生活下来,也要拿牛解(苏州白话读作[ga])下来,让箇只牛休息休息,喂(苏州白话读作[yu])俚吃吃草。假使天气忒热,还要拿箇只牛牵到河浜里,让俚勒河浜里淴(苏州白话读作[hue],沐)脱个浴。
        勒箇段辰光里,我会得勒下晚昼放仔夜学,揹仔书包,兜到附近各乡下头去,坐勒牛车棚边浪,一面看老牛车水,一面做功课。做好仔功课,或者勒水沟里淘水白相,或者勒礼拜日,结仔淘伴,一淘到附近的乡下头去,一面看老牛拉牛车盘车水,一面白相,或者听管水车格老伯伯说山海经讲故事。有辰光也会得偷偷摸摸,手抓紧仔牛车盘浪格斜杠,或坐,或立,登到转动格牛车盘浪,享受趁牛车兜圈子格乐趣。箇种举动,一是有危险,二则会增加老牛拉牛车盘个力量,所以管车人看见,就会畀俚赶下来。
        造勒小河浜岸边浪格牛车棚,看上去搭得像只亭子一样:四根一人多高格花岗石石柱浪,架一个或圆或方格尖顶棚棚,棚顶浪是层层柴草铺设得蛮蛮厚格,太阳也晒勿透格顶棚屋面。周围还种几棵绿莹莹,高高大大格垂丝杨柳。牛车棚里格车盘虽然侪是用木头做成功嘅,但并勿是每日天侪要用牛来车水嘅,因为牛车盘十分笨重,装好以后,也勿会经常装装拆拆,一般勿到秋天晏稻收割登场,田里勿需要大规模用水嘅辰光是勿会拆嘅。
        骄阳似火格盛夏,登勒箇种乡下头格牛车棚里,感觉吹进来格风特别凉爽。所以也是伲夏天头经常想要去白相格场化。每逢礼拜日,或者带仔兄弟姊妹,或者搭白相淘伴结仔淘,吃过仔中饭,赤仔脚一淘奔跑勒晒得滚烫格田岸头浪,一直奔到乡下头格牛车棚里,然后抢占牛车盘浪格位置。因为一只车盘一般只有四根斜杠,每根斜杠旁边坐两个人,最多只能坐八个人。勒车盘浪坐好之后,手抓牢车盘浪格斜杠,然后用一只脚勒地郎一踮一踮,使车盘转起来。车盘一转,风吹到身浪,感觉更加凉爽。假使车盘转得过分快,坐勒浪格人有辰光会有头昏格感觉。一淘来白相的人多格辰光,大家就轮流白相。就像现在儿童乐园里格箇种电动转盘一样。
发表于 2009-10-5 10:40:07 | 显示全部楼层
来拉本地养出来就弗曾看见歇牛。。。。对车水更加无不概念,只晓得锡剧《双推磨》里唱:一人牵磨像牛车水。。。
发表于 2010-8-3 14:56:55 | 显示全部楼层
牛车水是啥么事呀
发表于 2010-8-4 16:04:45 | 显示全部楼层
我看到过牛耕地,也看到过拖拉机耕地
水车佬啥,因为上海郊区老早就用马达抽水,呒没看到过
发表于 2010-8-6 16:39:53 | 显示全部楼层
我小學時期(90年代以前)還看到過近郊(那片地方現在已經儕是商品房成爲市區一部分)田頭人撒種、牛犁地
发表于 2010-8-6 20:20:48 | 显示全部楼层

天工开物中的牛车

近代牛车一种的模形

本帖子中包含更多资源

您需要 登录 才可以下载或查看,没有帐号?开只户头

x
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 00:36

Powered by Discuz! X3.4

© 2001-2017 Comsenz Inc.

快速回复 返回顶部 返回列表