吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 10894|回复: 14

说说我自家格故事(一)

[复制链接]
发表于 2009-6-20 15:49:45 | 显示全部楼层 |阅读模式
说说我自家格故事(一)
我是一个畀人从阎罗王箇搭抢转来格人
我小辰光格事体,好像就勒眼睛门前,叫啥转眼之间,我就要变成功一个年近七十格古稀老老头哉!日脚过得啊要快。“光阴似箭,日月如梭”,箇句老话么说得真格一点也勿错嘅!
“我是一个畀人勒阎罗王箇搭抢转来格人!”箇句闲话讲畀勒恁厾听,恐怕呒不一个人会相信有实梗格事体。既然呒不人相信实梗格事体,箇末,就让我来拿我出世辰光格经过讲畀勒大家听听。当然我自家是勿可能晓得自家出世辰光格经过嘅,下面箇点事体也侪是爷娘勒我记事之后反复告诉我嘅。
我姓朱,生勒吴县黄埭镇(现在属苏州市湘城区管辖)。姆妈生我格年是1941年,箇辰光称“民国三十年”,是东洋人侵略伲中国,苏州、上海、无锡一带到处兵荒马乱。勒浪生我之前,因为日本鬼子勒离开伲祖屋后头约摸二三十公尺以外,一个名叫后仓场格场化掼仔只炸弹,吓得伲爷娘勿敢再登勒屋里向哉,就带仔我一个阿哥、一个阿姐一道出去逃难。后首来,一则,是听说呒不东洋人下来扰民,老屋里也比较安定哉,二则之间,我勒伲娘胎里,也接近要临产哉,再加上我勒伲娘胎里的胎位弗正,像是个难产个样子,伲爷觉着勿能再让伲娘勒外世奔跑颠波哉。就实梗,一家四口重新回到仔黄埭格自家屋里。
伲娘生我是勒浪阴历六月心里,天气最最热箇辰光。本来黄带街浪有一个科班出身格姓陈格女助产士,可以请转来搭伲娘接生。为避兵荒马乱,逃难出去仔还朆转来。伲爷已经托人畀信畀箇位女助产士,无论如何请俚早点转来,搭伲娘接生。啥人晓得我格出生日脚提前哉!伲娘生我箇日,临产格阵痛从大清老早就已经开始,断断续续,直到吃过仔夜饭之后,阵痛一阵接一阵,越来越稝(读作“猛”,密的意思)。看看伲娘实在熬勿牢哉,请新法助产士来接生已经呒不希望,伲爷只好咬咬牙子,从几里路开外格乡下请仔个会老法接生格“老娘”来搭伲娘接生!
“老娘”四五十岁年纪,一双小脚,虽然走起路来身体一拗一拗,做起事体来倒是一点也勿拖泥带水,来得格爽快。看俚一歇歇辰光,要做格各种准备侪舒齐哉。箇歇辰光格规矩,家主婆生小人,自家男人是勿可以登勒旁边嘅。“老娘”对伲爷说:“大少爷,你(黄埭土话读作“呐”,苏州市区用“倷[读‘奈’,你]”下同)登勒旁边勿方便嘅啘,你先出去兜个圈子,散散心,转来包你抱个大胖儿子。你放心去末哉。”等伲爷跨出房间,俚就拿房门摇摇上。
箇辰光伲格爷哪里还有心思出去散心白相呢?家主婆生小人自家勿好登勒旁边格规矩,俚哪亨会勿懂?俗话说,女人生小人,一只脚勒棺材外头,一只脚勒棺材里向。对女人来说是性命交关个大事体,作为男人,伲爷心里也勒浪急。伲爷心里清爽,除脱仔耐心等待,呒不别个办法!先勒楼中间等仔歇,又到楼下一面看书一面等消息。从房间里闯出来伲娘格叫喊声,就像锥钻勒心浪戳。伲爷拿手里格书王太子浪一厾重新上楼勒楼中间里格坑床里坐下来耐心等待。
伲爷从夜饭后八点钟前后,请来格小脚“老娘”进门格辰光等起,一直到街浪巡更更夫格更锣敲过两更,依旧一屑屑动静也呒不。心里有仔事体,巴望仔想要格物事,就觉着辰光过得特别慢。一直到深夜十点多钟,仍旧声息全无,但是房门开哉,从房间里闯出来个口信,少奶奶平安无事,小人也生出来哉。箇末哪亨听物件小人格哭声嘅呐?传信人走上两步,勒伲爷耳朵旁边轻声耳语道:“小人一出娘胎就呒不气嘅哉。”爷一听说养格“死小干”,马上跨步进伲姆妈格产房,先要紧进去看看伲姆妈,安慰安慰俚自家格家主婆。看见箇位“老娘”还勒浪弄箇个呒不气“死小干”,就说:“小人死脱么就厾脱俚哉,覅再去弄哉。”
“箇是舍勿得吤。蛮好一个男小干!”小脚“老娘”说道,“我想办法一定要救活俚嘅。请大少爷,少奶奶放心么哉。”
“乃要救得活箇个小人,我一定加倍重赏。”伲爹爹对“老娘”说。爹爹勒旁边看箇位“老娘”拿个刚生出来格呒不气格小囡,一歇歇拎仔双小脚,那个人提起来,勒屁眼浪拍打,一歇歇搭个小囡嘴对仔嘴拼命吹气,一歇歇拿自家格嘴对准字小人格屁眼一吹一吸,就实梗来来回回,反反复复弄仔足足四十分钟,终于“哇——”格一声,响亮格小人哭声划破寂静格夜空!已经死过去格我,畀箇位貌不惊人格小脚女人从阎罗王手里拿我夺仔过来。
“老娘”第一要紧拿嗷嗷待哺格我传畀伲姆妈。让我吃娘格奶。爹爹马上从袋袋里挖出廿块银洋钿交畀接生个“老娘”,实行仔伲爷对“老娘”答应格重赏。“老娘”千多万谢,高高兴兴离开伲屋里。
发表于 2009-6-20 16:02:40 | 显示全部楼层
搿个吴语小说写的真好,我是话吴语
发表于 2009-6-21 22:38:41 | 显示全部楼层
慢慢看,基本能看懂。
    介词“勒”的用法与浙西建德(严州话)的“来”很相似,又有点不同。建德的“来”一定要放在动词后,而不能直接作谓语。即,“生勒吴县黄埭镇”、“吓得伲爷娘勿敢再登勒屋里向哉”这两句中的“勒”可以直接换成“来”(我很奇怪的是,相隔遥远,表“stay in/at/on”的这个“登”,建德和苏州是竟然一样的),但“好像就勒眼睛门前”这句中的“勒”要先加一个动词“落”才说“勒”。
    “小人”这个说法也一样,只是字不同,建德说“细侬”,也是“小孩”的意思。
    苏州除了说“最”外还用“顶”不?建德一般不用“最”的。
发表于 2009-6-22 00:24:37 | 显示全部楼层
3# cqdanielzh

用的。顶好,就是最好
发表于 2009-6-22 00:26:59 | 显示全部楼层
一歇歇拿自家格嘴对准字小人格屁眼一吹一吸
================
对准“字”?黄埭大多说“仔”也可说“字”的吗?

+++++++++++++++++++++++
黄埭土话读作“呐”
==============
这个事黄埭镇上的话吗?北桥是全部说“呐”的,那你们怎么说的呢?
谢谢
发表于 2009-6-22 00:27:38 | 显示全部楼层
苏州白话写得相当精彩~
 楼主| 发表于 2009-6-22 09:26:07 | 显示全部楼层
一歇歇拿自家格嘴对准字小人格屁眼一吹一吸
================
对准“字”?黄埭大多说“仔”也可说“字”的吗?

+++++++++++++++++++++++
黄埭土话读作“呐”
==============
这个事黄埭镇上的话吗?北桥是全部说“ ...
人人头 发表于 2009-6-22 00:26


倷是北桥人吗?南、北桥离黄埭蛮近嘅。
谢谢倷格指正“字”应该是“仔”。因为用拼音输入,经常发生箇种错别字各情况。
你读作“呐”是道道地地格黄埭闲话。北桥人对黄埭闲话应该是勿陌生嘅。伲黄埭就有勿少北桥人。49、50 年格辰光,伲大阿姐就勒北桥小学教过书。
发表于 2009-6-22 19:15:46 | 显示全部楼层
7# laosuzhou

我弗是北桥人,上礼拜刚巧到北桥去转仔一埭,听俚笃讲闲话,茄拉晓得,呵呵

今朝刚刚发现,你说“呐”望南一直到长青的新渔;隔开条马路,申庄就不说,申庄就说nei或者nI,真真几步路个距离。
 楼主| 发表于 2009-6-23 23:48:23 | 显示全部楼层
7# laosuzhou  

我弗是北桥人,上礼拜刚巧到北桥去转仔一埭,听俚笃讲闲话,茄拉晓得,呵呵

今朝刚刚发现,你说“呐”望南一直到长青的新渔;隔开条马路,申庄就不说,申庄就说nei或者nI,真真几步路个距离。 ...
人人头 发表于 2009-6-22 19:15


方言就是实梗,一个地方,一种勿同格语音语调。勒苏州城区东、南、西、北,六个城门去转一圈,倷就能够听见六种勿同苏州闲话!现在格苏州市,拿原来团团围牢苏州城格吴县也侪围仔进来,苏州一市格地方语言就更加丰富哉!
发表于 2009-6-24 00:20:24 | 显示全部楼层
原来laosuzhou已要年近七十了,我也四十多了,颇有同感哪。
发表于 2009-6-24 00:21:43 | 显示全部楼层
倷是北桥人吗?南、北桥离黄埭蛮近嘅。
谢谢倷格指正“字”应该是“仔”。因为用拼音输入,经常发生箇种错别字各情况。
你读作“呐”是道道地地格黄埭闲话。北桥人对黄埭闲话应该是勿陌生嘅。伲黄埭就有勿少北桥人 ...
laosuzhou 发表于 2009-6-22 09:26

我一个阿姨在东桥教过书
发表于 2009-6-24 01:44:12 | 显示全部楼层
本帖最后由 乌程仔 于 2009-6-24 04:10 编辑
说说我自家格故事(一)我是一个畀人从阎罗王箇搭抢转来格人我小辰光格事体,好像就勒眼睛门前,叫啥转眼之间,我就要变成功一个年近七十格古稀老老头哉!日脚过得啊要快。“光阴似箭,日月如梭”,箇句老话么说得真 ...
laosuzhou 发表于 2009-6-20 15:49

死而复生哪
发表于 2009-6-26 10:47:14 | 显示全部楼层
楼主小我一岁,写得好!读起来交关亲切,奈么要一篇篇读下去哉。
 楼主| 发表于 2009-6-26 17:27:12 | 显示全部楼层
楼主小我一岁,写得好!读起来交关亲切,奈么要一篇篇读下去哉。
大椿 发表于 2009-6-26 10:47


请多指教!
发表于 2013-4-20 17:04:01 | 显示全部楼层
楼主老先生格文章写得着实精彩,好像一下子拿吾带到仔七十年前头格辰光,讲得有声有色,引人入胜。一口苏白让吾箇格后生如痴如醉。吾是苏州闲话格铁杆护卫者。吾本人是陆慕人,勒浪吾伲伟大首都北京工作仔将近三十年哉,再过十年就要退休哉。一退休肯定回苏州安度晚年。因为苏州是吾格家乡,树高千丈,终究叶落归根。吾虽然一直蹲勒北京,但苏州闲话绝对不会忘记。我是廿一岁出来格,讲普通话讲得快仔还带出苏州口音。说畀嗯笃听也可能不相信,吾平常格语言环境别人侪讲普通话,吾讲么虽然讲普通话,但脑子里向想格侪是苏州闲话。实梗点年数过去哉,吾每趟回到陆慕自家屋里,觉着实在亲切得不得了,搭伲好婆、姆妈、嬢嬢搭仔几个兄弟一道讲起苏州闲话来,真格一点点语言障碍也呒不,拿出来就是。吾回到苏州有一点特别不舒服格场化,就是现在苏州市里向格后生家讲起苏州闲话奈哼侪变仔叼嘴哉,洋不洋乡不乡,完全走仔样哉,一听俚笃讲么,害得吾背心浪要起精肉痱子,实在听不下去,恨不得要冲上去畀俚笃两记耳光搭搭。至于市里向出生格男小倌、小娘鱼,干脆苏州闲话也不讲哉,直接讲普通话,可能是受学堂里向格影响,另外还有外地人格影响。吾坚决反对走样格叼嘴苏州闲话。吾最欢喜听说书先生讲格苏州闲话,标准,软糯,是世界上最好听格声音。金声伯老先生说大书,说《白玉堂》,箇种艺术享受么,不单单是用三两句闲话能过概括格。多听听评书搭仔评弹,绝对对保护苏州方言有极大格帮助。奉劝箇种叼嘴朋友有空去听听大书小书。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-28 17:19

Powered by Discuz! X3.4

© 2001-2017 Comsenz Inc.

快速回复 返回顶部 返回列表