|
称上海郊区人为“正宗上海人”个讲法弗妥
（嘉定·华亭话原文，附音频）
嘉定县·华亭乡
汉藏语系·汉语族·汉语支·汉语言（汉语）·
吴方言（吴语）·太湖片·苏沪嘉小片· 太仓方言大区·嘉定方言区（疁语）·华亭方言点
本文用字仅供参考。部分词暂用吴语拼音表示。
常有人话：“上海郊区人是正宗上海人。”但昰种讲法应该讲来是弗大妥当个。
昰种观点个意思是：“在今朝个上海市范围内，上海城区人祖籍普遍是外地个，因此弗是正宗个上海人；上海郊区人祖籍普遍就在本地，keh leh是正宗个上海人。”从昰个角度看，该观点弗是一点道理也呒没个。但是，纵观今朝上海地区个历史沿革，昰种观点还是需要斟酌个。
1292年上海县建立个辰光，领有包括今青浦北片、闵行、浦东、南汇个地部。
晚间来随得青浦、南汇、川沙三县个建立，到19世纪中叶上海县开埠个辰光，上海县独剩相当于今闵行区搭吴淞江—黄浦江交汇he ten 个区域。
1843年上海县开埠之后，在原上海县城搭租界个基础上，一座相当规模个上海城逐点形成。
1927年7月7号，上海特别市成立。1928年7月1号，上海县、市分治。
在儿昰个过程当中，上海县搭上海特别市行政范围略有变化，但总体原旧搭清末个上海县范围偏差弗大。
昰里，值得注意个是：
一、
上海城一直只是上海县搭上海市范围内个一小部分。上海城有大量移民涌入，外加因移民而兴，移民成为上海城区人口个主体。但在上海城外、上海县搭上海市个行政范围内，基本原（旧）是原有乡镇个土著居民。昰上一定要区别上海城昰个城个实体范围搭上海县或者上海特别市昰个行政区个范围。
二、
尽管，行政边界略有变动，但崇明、嘉定、宝山、青浦、松江【原名
华亭（县）】、金山、奉贤、南汇、川沙昰九个县搭上海县、上海特别市原旧呒不行政隶属关系，是弗同个几个县。其中，上海特别市已脱离江苏省，包括上海县在许个十个县原旧属于江苏省。
1958年是上海市行政范围变化最大个一年，也最终确定得今朝上海市个行政范围。昰年，崇明、嘉定、宝山、青浦、松江【原名
华亭（县）】、金山、奉贤、南汇、川沙搭上海县昰十个县从江苏省划归上海市，使上海市个面积达到得六千多平方公里。但值得注意个是，昰个只是上海市行政范围个扩大，弗是上海城个扩大。1958年前头，上海城只是上海市范围内个一小部分，1958年十县划归上海市之后，上海城个面积在上海市范围内所占比例愈加小著。
但弗管是1958年行政区划大变化之前还是之后，上海城搭上海市境内其他地方侪有一定个差别。上海城是大都市，其主体人口为外地移民，并因移民而兴；上海市境内其他地方是广大个农村搭小城镇，其主体人口为本地土著。
外加，随得上海城昰座大都市个出现搭崛起，随得移民个涌入搭上海本土化，形成得一支富有鲜明特征个人群——上海城区人，上海都市人，也就是常庄提着个狭义个、特指个上海人。
昰支人群以上海城区为主要居住地，也有部分出身上海城区但迁居上海城外其他地方甚至远在外地，但侪具有一个标志性特征，就是以上海城区方言为母语或身份语。昰个地点方言是以老上海县中心地区个方言为基础，tshian得一定移民原居地方言成分发展起来个。同时，昰支人群带有上海大都市环境赋予个交关特色。
总数，昰支人群是上海城区、上海大都市个主人，也是【亻渠】【土耷】最直接个参与得上海大都市个形成，并具有在此过程当中及都市环境赋予个鲜明特征。因此，无论在儿上海城区、上海郊区还是外地，侪存在寔恁一种狭义个特指或者概念，即话着“上海人”，常特指上海城区人，或者马上想着个就是上海城区人个形象。
从上海城区人来看，【亻渠】【土耷】话着“上海人”，毫无疑问是指自家，或者是包含自家个或以自家为典型甚至标准个上海市人个概念。前者是明确个特指上海城区人，后者看似是泛指上海市行政范围内人群个概念，但实质上也带有明显个特指意味，言下之意即“像我伲寔恁具有大都市气质，讲上海城区闲话个人么是典型个上海人”，
有个典型表现就是上海城区人碰着人家常会话“（沪语）侬也是上海人啊！个讲上海闲话好嘞？”昰里就带有明显个特指性。因此从意念上讲搭上海郊区居住在广大农村搭小城镇个讲其他地点方言个人群还是有区别个。有个有意思个现象是，上海城区人有寔恁一种称法——称自家是“上海人”，称上海郊区人为“本地人”。昰里“上海人”个概念也明显个特指上海城区人。
从上海郊区人来看，我伲话着“上海人”个辰光，也往往是特指上海城区人昰支具有鲜明特点个人群个。我伲自称可以是一个泛泛个名称“本地人”，也可以以县名自称崇明人、嘉定人、青浦人leh thin 。事实上，在儿我伲县里，我伲常用乡镇名自称，例如（嘉定）娄塘人、徐行人、南翔人、安亭人leh thin 。只有在表示整个上海市范围个辰光我伲还称自家上海人。特别有意思个是，有本《上海西南方言词典》，收录个是老上海县西南地区个方言，记得其中“上海人”昰个词条，注释个就是“上海市区人（即上海城区人）”。可见在上海县其他地方，话着“上海人”也常庄是特指上海城区人昰支人群个。
从外地人来看，为tshy 得距离关系，无论是上海城还是整个上海市，对【亻渠】【土耷】来讲只是一个点，keh leh【亻渠】【土耷】一般弗会区别上海城区人搭上海市人个概念，对上海市境内个城乡居民统称“上海人”，对上海市境内各个地点方言统称“上海闲话”。但在【亻渠】【土耷】个概念里常带有一定个特指性，譬假认为“上海人”就是街上人，弗是乡下人，昰个就实质上弗包括上海郊区几百万农村人口；譬假认为“上海闲话”就是一个地点方言，或者自家话要学上海闲话就是指要学上海城区闲话，昰个当然也就弗包括上海市境内其他交交关关个地点方言。
综上可见，特指“上海人”为上海城区人、上海都市市民个情况是蛮普遍个，昰个侪是基于上海城区人个人群特点归纳出来个，搭基于行政区划泛指上海市境内所有居民为“上海人”个概念是弗同个。
虽然上海县从1292年就已建立，但从19世纪下半叶上海大都市产生起，“上海人”个概念已经发生了一定个变化搭转化。1843年上海县开埠之后，一支主要由移民组成个上海大都市个缔造者搭建设者在弗断上海本地化之后成为一支崭新个人群出现在中国个历史舞台上。【亻渠】弗同于曾经个上海县民，也弗同于之后上海县其他地区个原住民，更弗同于1958年起划拨上海市个崇明、嘉定、青浦、金山leh thin 县个居民。【亻渠】是一支新生个力量，【亻渠】一手缔造得特大个上海城，昰座城弗再是曾经个小县城，而成为得本地区个中心，从而打破得松江府搭苏州府个格局，松江城弗再是原松江府个中心，而拨迅速崛起个上海城取代。在因城设市31年之后个1958年，上海市最终划进得原松江府个全部地域，包括松江（原名华亭县）、青浦、金山、奉贤、南汇、川沙、上海七县，搭原属苏州府太仓州个崇明、嘉定、宝山三县。
由此可见，普遍由已上海本地化个移民组成个上海城区人弗单是上海大都市个直接缔造者，外加直接导致得上海县升格为上海市，并最终导致得多个县个划进搭上海市行政范围个扩大。可以想见，若然呒不移民个涌入搭特大个上海城个形成，上海县可能原旧是一个普通个县，搭崇明、嘉定、青浦、金山leh thin 呒得几许大个差别。若是寔恁，个么原松江府今朝可能就是松江市，以松江城为中心，松江府上海县则变为松江市上海县或者松江市上海区；崇明、嘉定、宝山则可能原旧属于苏州地区，像太仓、昆山一样，成为苏州地级市下辖个县或者县级市。
因此，今朝上海郊区个居民成为行政区划概念上泛指个“上海人”，只是随得上海城区崛起之后上海县、上海市行政区划大调整产生个结果。若是话上海郊区人是正宗个上海人，个么若然明朝上海郊区几个县划出上海市划回江苏省呐？阿是一夜之间从所谓“正宗个上海人”变得连当“上海人”也弗是著呐？若是明朝南通地区个启东、海门，苏州地区个太仓、昆山，嘉兴地区个嘉善、平湖侪划进上海市个说话，阿是话当地居民一夜之间就从“非上海人”变成功得“正宗个上海人”呐？
Kaoh laoh，个人认为，关键还是在于分清特指搭泛指个区别，是特指伊支具有鲜明特征个上海城区人、上海都市市民，还是泛指上海市行政区划内所有个城乡居民。相比起来，应该讲，前者个概念更加稳固，特征更加鲜明，后者只是一个上海行政区划调整搭其他县共戴“上海”昰个名称个产物。崇明人就是崇明人，嘉定人就是嘉定人，金山人就是金山人……昰个是最根本个。我伲只是跟得我伲个县划拨某一个地级市或者直辖市而已，划拨苏州市就是苏州市人，划拨嘉兴市就是嘉兴市人，划拨上海市就是上海市人，呒能话我伲划拨某个市就是“正宗个某市市民”。
总数讲来，“上海郊区人是正宗上海人”个观点，从当前已经稳固得半个世纪个上海市行政范围内居民个祖籍来看，有一定合理性，但毕竟弗甚妥当。从还一个角度看，弗相可以寔恁话，从某种意义上来讲，上海城区人倒是真正个上海人。弗管哪儿恁，部分上海郊区人标榜自家是“正宗上海人”个做法是弗适宜个。
以上就是本人根据现有个浅陋认识发表个一眼观点，可能部分用词有失精准，部分观点弗甚妥当，还敬请各位指教！
附：
[地图资料]上海行政地图（前221年-现在）
http://www.longdang.com/bbs/showtopic-5810-1.aspx |
发表于 2009-5-19 18:25:12
提升卡
置顶卡
沉默卡
喧嚣卡
变色卡
显身卡
发表于 2009-5-19 19:51:18
发表于 2009-5-21 23:17:04
楼主