吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 5607|回复: 5

拜年咯记忆

[复制链接]
发表于 2006-2-1 19:16:44 | 显示全部楼层 |阅读模式
  头场,年初一是弗拜年咯。初二后路上来来起起都是格人,大人扱着小人,或骑马拦拦拦徠膀肩浪,稍许大格跟徠前头后头。正月里更专门弗是碰着落雨,就是晴天格冻水烊,大家徠泥浆晃天格小路浪捂脚拔脚拣脚走着,因为路浪葛头是脚吾潭、搭头是脚吾墩呀,专门碰牢跌得旱身旱恼烂污泥格拜年人,还讲伊是[拈]勒元宝。外畈格路是又粘滋葛搭又是希滑铁搭,山里人毛怕势势咯。
  拜年要带个包,作为礼物。葛时光有桂园包、荔枝包、黑枣算是毛好勒,另外差弗多格是糖包勒,又分义乌糖、赤砂糖、白糖、冰糖四等,冰糖是送给顶遵敬格长辈格。要弗來格是糕包:桂花片、椒盐片、京枣 、麻疏糖、麻疏饼、连环糕葛些。包是一张蛮大毛草纸包格,包得的角肆直,用红纸一张覆勒面浪,再用蒲草或细纸绳缚好。随便格人弗大包得好,因此阿拉克底有介株滩头:“阿妹烂姆拆糕包”,喻拆了东西复不了原。也有人[脱見]穷,[米]法子包个罗卜絲包去拜年,红纸一贴,外面是看弗大出,反正拜完年要走咯时光,主人家必定客气格要把原包推回,葛时光装假拉乌推几下老老臉皮[担]转来就是勒。山里人去外畈拜年除勒带着包,还常常背着浪先桠枝、笤帚、火把、松明葛套山货,对外畈人来话着实是交关赞格礼物。
  小时光,我母亲带拉两姐妹到大源山去拜年,但山里格路也弗是好走,路是用一[记记]鹅卵石扣成的,七高八低强棱刚浪,走勒脚板底痛,葛卯外畈客人罪过相勒,走弗勒多少脚就起泡,廿來里山路阿拉十十足足走勒大半日,好徠葛时光一华里就有一个涼亭,好坐一坐。一头坐一头托顺路人带信进去。涼亭骑路而造,所以叫过路涼亭,修桥铺路建亭是阿拉宕里行事格做好事。涼亭外是密密麻麻格毛竹、石竹,日头蛮拉撕布穿过竹叶层才照勒到地浪,涼亭里外就阿拉三人,觉着角外孤清冷墩,我毛怕[散]出一只老虎角儿……。过了弗是蛮长时光大表哥挑着长环篮来半路上接拉,一头一个把拉挑着,山里人脚穿箬壳草鞋,走起山路來咯吱咯吱直响,一煞功夫就到勒伢宕里。
  只[孟]见山凹里烧飯烟头埄埄,树蓬窠里露出几间屋脊,村口格溪坑哗哗直响,溪坑浪搭梗木桥,整段树做格桥板、高高格桥桩,全用铁练[吊]着,[防可]大水[推]走。溪坑边、山浪一气落竹林、杉林,风一过哗啦啦直响,到大勒我才刚晓得葛叫林涛。诗中常用余知蜩叫、鸟叫衬托出山坞角里格幽静,我到介想葛[吞]水声、葛林涛声,不光是听旦起來象煞一首美妙格山林之歌,也越加叫人觉得出葛山里格宁静,就介,葛情葛景到葛卯我还一丢丢[米孟记]。
  到勒表母家头桩事体就是吃飯,葛时光吃飯到勒就吃,反正菜是现成的,飯高顶熯熯热就相干。菜端上来总是三三得九碗,齐齐整整排徠八仙桌床浪。有肉、有鱼、有鸡、有肉元子……。弗过葛些菜弗好随便吃咯,路高底母亲对拉交代勒好几卯勒。弗管表母捺格客气拣着肉元子[孟]拉碗里头塞,肉元子到后头总归回到了葛只碗浪那个拣开的空洞浪,空洞下头是角儿?罗卜絲呀,海带絲填底是后息来蛮迟勒。鱼也是一丢动弗得咯,叫看鱼,只好看弗能吃,如果一个不当心拨阿里个小人徠鱼身上拣了一筷,留落一个疤,那下卯就得拨鱼翻个身,弗过只介一卯呀。[划有毛极],山里头场买不起鱼,就用木头刻一梗鱼,上铺白头韮菜,的的刮刮格看鱼。葛些菜得进得出,直到正月半才好吃。弗过划是有好吃格菜,除勒青菜、粉絲葛种,就是各种冻了。冻有肉冻,弗多格肉(或猪头肉)加上油豆腐、骆笋煮上一镬打好冻,因为有一定后备,客人吃了可添满,所以这个可吃,葛个冻讲实话是蛮好吃咯,味道角交,交关年头米吃勒。在外划有豆腐为主加点鱼格鱼冻。
  吃好飯,得上格是一些炒货:蚕豆、御粟、年糕干、栗子、苦楮、番瓜子、化糕干、馒头干……。化糕干顶好吃勒,蛮松脆,弗象其它格些有点硬羌羌。水果吗,只有甘蔗、荸荠,吃上桔子毛难得勒。苹果是蛮后头来格事勒,我小时光听讲飞行员才有得吃,飯后一个,眼热煞勒。
  山里头蛮,顶好是溪坑石滩浪拣石子。葛时光山里头植被茂盛,一年到头溪水淙淙,清泏见底,可放木排、竹排。石子被终年格山水[瓦磨]得展光滑塌,滩上有各色各样鹅卵石,我顶欢喜拈白颜色格石子——火石,长大了晓得伊主要是二氧化硅组成的石英石,佗勒屋里躲徠门角落里[皮皮],会发出亮光。
  拜完勒年,小人佗勒亲戚塞进格压岁钱,虽则一千元、二千元,即今一毛、二毛,葛时光已是蛮蛮多勒。要走勒,亲戚回上一丢东西,当然我顶欢喜是用纸包着格化糕干,小人划要送几支红皮甘蔗。看路高底回去格小人背着蛮多甘蔗,说明他拜了好几家年勒。所以路浪走过小人背着甘蔗,路边浪调皮小鬼头常会尽从伊:“拜年、拜年,屁股朝天,摸支甘蔗(勿要)屄臉!”
  一九五六年八月八日葛场龙风,肆虐浙江。山洪暴发,表哥家村当遭到空前大难,由于乱砍乱伐,村坊上游溪坑边竹林、树林都砟勒滑塌精光,原先[淘]村近二百七十度格溪坑水[石勒近路],整个村当推勒只假一间屋,变勒废村。表母在水中推出十來里才刚逃命,后头去勒金华。从介之后再也米去n搭拜年勒。
  葛卯弗同勒,弗管外畈、山里村村通公路,拜年连脚踏车也懒得骑勒,礼物也不再是葛些毛纸包了,全是花花绿绿格现代包装,汽车一动,随便倷格远格路也一刹功夫就到勒。畅开吃飯、喝酒,看菜成为历史,主人家巴弗得客人拨菜吃光。小人头变得不欢喜吃菜、吃饭,徠大人再三催别下吃几口飯又去蛮勒,怕陌生好象只是阿拉这辈格专利,对现代小人头来讲见面就熟。时代真前进勒。


注:[拦la~]——小孩骑在大人肩上   浪先桠枝——晒衣杆与撑  火把——山里人在造纸皮鑊中用石灰处理过的竹蔑编成的火把,较不处理的燃烧持久,夜里外出照明之用。 松明——用老油松树之根劈成小片,晚上家中作照明之用。 箬壳草鞋——用箬壳编成普通草鞋,再用箬壳编成鞋邦,雨天当雨鞋穿用。长环篮——环很长的腰形大篮,成双挑着使用,可挑东西,也可挑小孩。冻水烊——早晨泥土结冰,太阳出来融化,此时泥土变得泥泞。专门——这里义为:经常、不断 [担ta~佗dθ]——拿 [划uo?]——还  [脱见]——特别  两姐妹——兄妹俩、姐弟俩、姐妹俩(只要有一个是女的均称)[ 熯hε~]——蒸热一下 [拈dzε~]——拾  [ 记记]——块块[ 防可]——防止 [推]——水冲 [散dza~]——突然扑出、跳出[米孟记]——没忘记 [吊]——系住 [孟]——望、看、往 、向  [划有毛极]——更有甚者 [淘t’﹞]——繞 [瓦ngo磨]——打磨 [石勒近路]——走了捷径  [皮皮]——擦擦  背——这里指扛  [米]——没有   村当、村坊——村子[拉]——我们  在外——另外、其它  [得]——端   扣——砌

[ 本帖最后由 富春山越 于 2006-2-1 19:49 编辑 ]
发表于 2007-2-22 10:33:00 | 显示全部楼层
咦过仔一年哉。。。
发表于 2007-2-23 20:18:09 | 显示全部楼层
现在我只去领导屋里拜年.
亲戚之间就是吃饭,给小孩压岁钱.
发表于 2007-2-23 22:54:54 | 显示全部楼层


一篇乡土气息浓郁的好文!长知识。

各地方言就是有所不同,“熯”字在无锡是在锅内用少量油煎一下的意思,而浙江居然是蒸热一下。

徠泥浆就是烂泥浆吧?

木鱼在电影里见过,那是第一次听说,唉,过去年代……

“包是一张蛮大毛草纸包格,包得的角肆直,用红纸一张覆勒面浪,再用蒲草或细纸绳缚好……”读着亲切,再现了儿时见过的情景啊。

 楼主| 发表于 2007-2-24 21:31:04 | 显示全部楼层
“就是晴天格冻水烊,大家徠泥浆晃天格小路浪捂脚拔脚拣脚走着,”
就是晴天地上的冰冻一化,大家在泥泞的小路上高一脚低一脚艰难的走着
徠——在
泥浆晃天——泥泞非常
捂脚拔脚——因泥泞粘鞋,走路时要高一脚低一脚
发表于 2007-2-25 20:54:09 | 显示全部楼层
弗好意思,句子也呒不读通,主要弗熟悉一方方言。如今懂了,谢谢。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-4-24 13:20

Powered by Discuz! X3.4

© 2001-2017 Comsenz Inc.

快速回复 返回顶部 返回列表