|
上海个马路,大多数侪是用中国各地个地名命名个,一般侪晓得名气最响个是南京路(neucin lu),不过,用南京命名个马路是最多个,好像晓得个人就勿多了。。
就勒拉正宗个南京路勿远个地方,就有另外一条名气也蛮响个马路,金陵路(cinlin lu),有道是“六朝金粉地,金陵帝王洲”,不过,南京真正叫金陵个辰光,倒是五代十国,吴(淮)搭仔南唐,侪拿首都叫金陵。
从外地乘火车到上海,出火车站,到仔南广场,就碰到另外一个南京路哉——“秣陵路(maqlin lu)”,秣陵,就是南京顶顶早个名字,秦朝统一天下,江南建立两个郡,会稽搭仔彰郡,秣陵就是彰郡个一个县。
人家讲狡兔三窟,不过南京路还不止迭三条,“上海大舞台”,就蹲勒江宁路(kannin lu)旁边,江宁也是南京比较悠久个名字,不过好像侪是比较吃瘪个辰光用个,比如讲满清“扬州十日”以后进仔南京,马上就拿南京个名字改成江宁哉,迭个叫作:天无二日,国无二“京”
讲仔介许多南京路,南京历史浪最最风光个辰光,堂堂六朝古都个名字好像还没寻到么,勿要急,勒拉浦东个川沙乡下角落头,就有仔一条建业路(ci’niq lu),当然迭条马路搭仔南京比较牵强,因为旁边个路名侪是创业路、置业路,好像勿是地名,不过,当年江东孙氏,勿也是想勒拉石头城“建立基业”个么,所以,大错么也勿错个,呵呵。只可惜,迭条南京路,名头是南京历史浪最最辉煌个辰光,实际却是顶顶没名气个一条。。。。。。。 |
|