吴语写不出来？——Wikipedia:吴语书写体系（草）

gojin

吴语书写体系指个就是吴语书面闲话个形式。此地就是要解决哪亨来写吴语个问题。

[编辑] 历史浪个吴语书写体系吴语作为一只方言，特别是长期以来作为一种汉语个口语形式，来历史浪，来中国个方言里向，是交关有影响力搭实力个。而吴语个书面浪个作品，来古代来讲也是各个方言里向相对比较多个，该个也是搭吴语地区个文化发展水平符合个。胡适来民国辰光还讲过，方言文学里向顶顶有希望个一只，是吴语文学。

古代辰光，多数个文章侪是用文言文写成个，多数个近代汉语口语侪无拨书面形式。北方白话因为俚一径扮演个官话个角色，蛮早个辰光（唐朝）就开始有白话作品出来。
现代意义浪个吴语头一趟来纸头浪写下来，该歇已经几乎考证勿出哉。必过，明代个冯梦龙收集过一只吴语个山歌集，叫《山歌》，记录个就多数是当时辰光吴中老百姓个口头山歌。基本浪俚直接就拿俚笃记下来，朆经过转译了啥，只有文言注解，好算是蛮早个一部吴语书面化个作品。个里向交关词汇，一径到今朝还来浪用。

要注意个是，从《山歌》一径到民国辰光个吴语小说，吴语个书面作品多数是拿苏州话写个，个搭苏州长期以来来吴语地区个文化地位也是蛮搭个。苏州话也是一径以来吴语个代表方言。

明清两朝，基本浪吴语直接写来纸头浪个机会还是交关少个。清朝末年上海个怪才张南庄写着一本小说叫《何典》个，来行文当中夹杂交关吴语词汇，形成一种蛮奇特个风格。该本书里向张拿吴语词汇用得交关熟练交关灵，叫人拍案称奇。

到仔民国，社会风气活泛来，再一个白话文运动个推动，吴语书面作品个创作咦进到一个前所未有个高潮。有一大批吴语小说面世，形式浪多数采用官话叙述吴语对话个形式。该个辰光个吴语小说，也多数是用苏州闲话创作个，作者有上海人常州人了啥。该个辰光个吴语小说个书面形式、用字用词已经交关接近当代吴语，有星常用字个写法也开始形成一定个共识，甚至造着一批吴方言字，像“朆”、“覅”、“啘”了啥，搭仔后来作家自觉新造个“倷”了啥，后首来多数侪拨拉收录到电脑用汉字字符集里向，侪好用输入法打出来。

还有一个值得注意个方面是外国传教士个吴语文献。外国传教士为仔传教，翻译着交关方言版本个圣经，像各地吴语个罗马字版本个圣经搭汉字版本圣经。

再有末，就是当代吴语研究者编个各种吴方言词典。像《吴方言词典》、《苏州方言词典》了啥。

[编辑] 维基百科浪个吴语书写体系吴语来历史浪有过自家个书写体系，为仔讲吴语个书面语勿是从零开始个，而是有一定个基础个。该个基础就是倪来此地写吴语个基础。假使勿尊重传统个说话，交关可能造成混乱个局面。有仔传统，乃末就有章好依哉，交关多个常用字侪有常用个写法，作兴该个写法勿是唯一个，必过来一定个历史时期，多数作品里向个字个写法侪有交关个一致性，个也好算是作家道里个君子协定或者默契。个也就方便倪后来个人，实际浪为倪提供着一只规范，好去整理来现代实用。

[编辑] 基础方言世界闲话个发展历史浪，文献个作用交关重要。像意大利个但丁写《神曲》，个当地方言就变成意大利语个标准闲话。马丁路德拿拉丁文个《圣经》翻成功德文，个就是现代标准德文个来头。

北部吴语个语法搭仔词汇个共同性是蛮大个，所以即便侪是写自家个本地方言（当然要除去一点特别“土”个成分）别人也是看得懂个。勿过，考虑到对历史浪向个吴语文学个继承性，建议大家个书写，侪往苏州言话搭仔中派以前个上海言话靠拢一点。另外，不推荐用杭州言话写，为仔渠写出来个文字连大多数助词、代词系统也侪是官话系统个，搭仔普通话差勿多。

[编辑] 正字法正字法末，就是要解决哪亨写个问题。一径有人讲，吴语是方言，是“土话”，写勿出来个；实际浪勿是写勿出来，是该歇无拨只规范。吴语文献就是吴语完全好写出来个证据。

吴语个正字法也要以历史文献为典范，避免混乱，个再有权威性搭仔继承性。该个是吴语来各个方言里向个优势。假使大家侪来搞发明个说话，一个搭吴语个文学传统割裂，再一个也作兴会造成混乱个局面。为仔讲成例比最新考证要好，更加比自家个发明要好。
个上头还提着，吴语个文献上至明，下至民国，以陆里只为准呐？此地推荐搭当代吴语更加接近个近代文献为准，也就是以《海上花列传》为代表个一批民国以来个文献。书面语可以适当脱离口语，但勿好脱离忒远，勿然就变文言文哉。

当然，近代文献里向个字有星是还好商榷个。鲁迅辰光个白话文到今朝看也有交关变化个场花。像第二人称，《海上花列传》了啥写“耐”，而后首来咦有人造着专门个方言字“倷”，后者字形浪也更加合适，还已经进仔计算机字库，个末就好用“倷”哉。