本汉字版本转译自箇搭个罗马字版本。有星字词还弗曾译出个，则保留原版个罗马字。
马可传福音书
苏州土白
大美国圣经会托印
上海美华书馆印
1891
马可传福音书
第一章
神个儿子耶稣基督，福音个起头。像先知以赛亚所写个，说道：我打发我个差人，垃倷个面前，预备倷个路。荒野里有人个声音喊咾说，预备主个街道，筑直俚个路。约翰垃荒野里行洗礼，讲悔改个洗礼，以至罪孽得着饶赦。犹太全省，搭仔耶路撒冷个人，侪出来到俚场花，认仔罪咾，垃约旦河里受俚个洗礼。约翰着骆驼毛衣裳，用皮带束腰，吃蝗虫咾野蜜，讲咾说，有一个人垃我以后来个，比我更有能力，就是俚个鞋带，我也弗配伛下去解开。我末用水对俉笃行洗礼，独是俚要用圣灵对俉笃行洗礼。
当时，耶稣从加利利个拿撒勒来，垃约旦河里受约翰个洗礼。就从水里上来，俚看见天裂开来，圣灵像鸽子降到俚身浪。又从天浪有声音说，倷是我个爱子，我欢喜倷。圣灵就赶耶稣到荒野里，拨撒旦试法，同野兽一淘，又有天使来服侍俚。
约翰收监个以后，耶稣到加利利去，讲神个福音，说道：日期满哉，神国近哉，俉笃应该悔改咾相信福音。耶稣垃加利利海滩浪走，看见西蒙搭仔俚个弟兄安德烈，抛网垃海里，因为俚笃是捉鱼个。耶稣对俚笃说，来跟我，我要使俉笃去捉人像捉鱼。俚笃立刻离开仔网咾跟仔俚哉。朝前弗多点路，又看见西庇太个儿子雅各搭仔弟兄约翰，垃船浪补网。俚就叫俚笃，俚笃离开仔爷西庇太搭仔雇工人垃船浪咾跟仔俚哉。
俚笃进仔迦百农，耶稣就到会堂里去教训。众人稀奇俚个教训，因为俚教训俚笃，像有权柄个，弗像读书人。会堂里有一个附邪鬼个，喊咾说：拿撒勒个耶稣！倪搭倷有啥相干？倷来灭脱倪嗄？我晓得倷是啥人，就是神个圣传个。耶稣责备俚说：弗要响，出来罢！邪鬼就弄得个个人惊风。大声喊咾出来哉。众人hyæ-zhön，大家问咾说：个个啥事体嗄？啥个新道理嗄？个个人，用权柄来吩咐邪鬼，邪鬼也听俚个。俚个名声就各处传扬到加利利四面。
出仔会堂，耶稣就搭仔雅各、约翰，到西蒙咾安德烈个屋里。西蒙个丈母，生仔热病咾睏垃笃。有人就拿女眷个事体告诉俚。耶稣去捏仔俚个手，扶俚起来，热病就退哉，女眷末服侍俚笃。垃夜快，日头落山个时候，有人领拢总病人咾附鬼个，到耶稣面前来。合城个人，聚集垃门前。耶稣就医好仔多花有各样病个人，又赶出多花鬼，弗许鬼说话，因为鬼认得俚。
到早晨，天弗曾亮，耶稣极早起来出去，到荒野地方，垃个搭祈祷。西蒙搭仔一淘个人追俚。寻着仔对俚说：众人垃笃寻倷。耶稣对俚笃说：倪要到附近个乡镇浪去，垃个搭我可以讲道，因为我为仔个个咾来个。难末耶稣垃加利利各处个会堂里，讲道咾赶鬼。
有一个癞疯子来，跪下去求俚说：主，若然肯末，可以使我干净。耶稣爱怜俚，伸手摸俚说：我肯个，倷可以干净。俚个癞疯，立刻脱体仔咾干净哉。耶稣叮嘱俚，就叫俚去；又对俚说：当心，弗要对别人说啥，不过去拨祭司人看，并且为仔倷干净咾献奉摩西所吩咐个礼物，对众人做见证。但是俚出去，大大能讲咾传开个种事体，以致耶稣弗能堂皇到城里，只好登垃外头荒野地方，四面有人到俚场花来。
第二章
过仔几日，耶稣再进迦百农，人听见俚垃笃屋里，就有多花人聚拢来，以致门前也呒拨空地。耶稣么讲道理拨俚笃听。有人带一个瘫子来，是四个人扛个；因为人多咾轧弗进，就垃耶稣个上头hyao开仔屋面；拆开仔么，拿瘫子所睏个床荡下来。耶稣看见俚笃个相信咾对瘫子说：儿子呀！倷个罪饶赦哉。有几个读书人坐垃个搭，心里议论：个个人为啥说亵渎个说话嗄？除仔一位就是神，啥人能够饶赦罪呢？耶稣晓得俚笃心里实梗议论，就对俚笃说：俉笃为啥心里实梗议论呢？对瘫子说：倷个罪饶赦，还是说：起来，拿仔倷个榻床咾走，陆里一样容易？但是使俉笃晓得，人个儿子垃地浪，有赦罪个权柄，就对瘫子说：我吩咐倷起来拿仔倷个榻床咾转去。瘫子就起来，拿仔榻床咾，垃众人面前出去哉。众人侪hyæ-zhön，归荣耀垃神咾说：倪从弗曾看见歇实梗个。
耶稣再出去到海滩浪，众人侪到俚个搭来，俚就教训俚笃。耶稣走个时候，看见亚勒腓个儿子叫利未，坐垃税关浪，对俚说：来跟我。俚就起来跟仔耶稣哉。
耶稣垃利未屋里坐席个时候，有多花税吏咾罪人来搭耶稣咾门徒一淘坐席，因为俚笃多，而且跟仔耶稣。
读书人咾法利赛人，看见耶稣搭仔税吏咾罪人同席么，对俚个门徒说：俚为啥搭税吏咾罪人吃咾呷呢？耶稣听见仔么，对俚笃说：强健个人，弗要用郎中，不过有病个么，要用个。我来弗是召有义气个，是召罪人。
约翰个门徒，搭仔法利赛人垃浪禁食。俚笃来对耶稣说：约翰个门徒，搭仔法利赛人个门徒，侪禁食，独有倷个门徒，弗禁食么，为啥咾。耶稣对俚笃说：新官人还垃笃，陪新官人个，岂可以禁食呢？新官人搭俚笃一淘个时候，俚笃弗能禁食个。但是后来新官人lu-ts-ky'i个日浪俚笃要禁食哉。呒人拿新布（weh-tsoh sang ngæn pu）来补旧衣裳，恐怕新布缩仔么，旧布更加破哉。呒人拿旧皮袋来装新酒，恐怕新酒绷碎仔袋，酒要漏脱咾袋要坏哉。所以新酒总要装垃新袋里个。
安息日浪，耶稣走过麦田，门徒垃路浪，扚仔麦穗头。法利赛人对俚说：倷个门徒，为啥垃安息日浪，做弗应该做个事体。耶稣回答说：从前大卫搭仔跟俚个人，缺少咾我个时候，所做个事体，俉笃弗曾读歇嗄？就是垃祭司长亚比亚他个时候，俚哪亨到神个房子里去，吃摆设个饼，还拨拉跟俚个人吃。个个饼，除仔祭司，别人弗应该吃个。耶稣又对俚笃说：人弗是为仔安息日咾设立个，安息日是为仔人咾设立个。所以人个儿子，也是安息日个主。
第三章
耶稣又进仔会堂，垃箇搭有一个人一只手干枯个。众人冷眼看耶稣，垃安息日浪，阿医好俚，要想告俚。耶稣对仔干枯手个人说：起来，立垃当中。又对俚笃说：垃安息日浪，做善事，做恶事，救性命，杀性命，陆里一样应该呢？但是俚笃弗响，耶稣愁俚笃个心硬咾，周围看俚笃咾动气，就对箇个人说：倷个手伸出来！俚伸出来么，就痊愈哉。法利赛人出去就对希律一党个人 商量，哪亨杀耶稣。
耶稣同门徒离开仔箇搭，到海滩浪去；有多花人从加利利，犹太耶路撒冷，以土买，约旦河归边，来跟仔俚。还有多花推罗咾西顿人听见俚做个事体咾，也到俚场花。因为人多，耶稣就吩咐门徒预备一只小船，免得众人轧俚。因为耶稣已经医好多花人，所以有病个人，轧上去要摸俚。邪鬼看见仔耶稣，就俯伏垃俚面前喊咾说：倷是神个儿子。耶稣就念经叮嘱俚笃，弗要拨人晓得俚。
耶稣上山去，随意叫人来，俚笃就来。俚就设立十二个人，要俚笃搭俚一淘，还要差俚笃出去讲道。又拨权柄医病咾看鬼。题西蒙个名字叫彼得，西庇太个儿子雅各咾，俚个弟兄约翰，箇两个人，耶稣题俚笃名字叫半尼其，意思就是雷子。还有安德烈，腓力，巴多罗买，马太，多马，亚勒腓个儿子叫雅各，搭仔达太，西蒙iu ch‘eu Dzæ。还有以色加略个犹大，就是卖脱耶稣个。俚笃进仔房子。
众人又聚拢来，以致俚笃弗能吃饭。耶稣个亲属听见仔么，就出来要拖住俚，因为说：俚是发痴哉。由耶路撒冷下来个读书人说：俚附仔别西卜，又说：俚靠仔鬼王看鬼。耶稣叫俚笃来用比方对俚笃说：撒旦么哪亨能够赶脱撒旦呢？若然国度自相纷争么，箇个国度立弗住个。若然人家自相纷争么，箇家人家立弗住个。若然撒旦对敌自家咾纷争么，俚立弗住个，要灭脱哉。呒人能进有气力人个屋里咾抢俚个物事，必要先缚住有气力个人，然后可以抢俚屋里个物事。我实在对尔笃说，世界浪人弗论犯啥个罪咾说亵渎个说话么，侪可以饶赦个，独是亵渎仔圣灵么，永远弗饶赦个，是犯永远个罪孽：因为俚笃说俚附仔邪鬼。
耶稣个娘咾弟兄来，立垃外头，差人去叫俚。有多花人周围坐垃笃，有人对耶稣说：倷个娘咾倷个弟兄，垃外头寻倷。俚回答俚笃说：啥人是我个娘咾我个弟兄嗄？就周围看仔坐垃旁边个人咾说：看我个娘咾我个弟兄。因为万亿人朝神个旨意咾做么，就是我个弟兄，我个姐妹，我个娘。 |
发表于 2007-2-16 05:52:21
提升卡
置顶卡
沉默卡
喧嚣卡
变色卡
显身卡
发表于 2007-2-16 05:55:31
楼主