乌程仔 发表于 2014-8-26 12:14 
霜竹你那难听的嘉定华亭话说得够了吧？能不能说说吴越其它地方的？
嗯，我觉着一般不大适宜去评价一种闲话好听或者难听、高贵或者卑贱，因为递个常常会忑对人群个主观印象有关。有排街上人觉着乡下闲话难听，实质上通常是因为【亻渠】【土耷】本来就看不起乡下人；交关外头人讨厌上海闲话，实质上常常是因为对上海人个刻板印象忑偏见导致个。
松江发达，上海县民也以府城为重；上海崛起，松江府民也效仿新兴沪语。本质上不是老早么松江闲话好听，现在么上海闲话好听，只是经济、政治、文化地位个变化垃人们心中个投影。就像一样是境外方言，为啥大家像煞有介事个学习美式英语，拿印式英语、新加坡英语就作为蹩脚英语看待，也是递个道理。
我觉着啊，作为大都市个市民，作为万众瞩目个焦点，上海人来得个需要注意自家个言行，特别是垃语言递个涉及人群身份个敏感问题上，像 难听 嘞 难以接受 嘞递类词眼是不适宜使用个，容易惹人厌个，人家要想法个，想：“佷上海人了不起煞啧啊？算佷上海闲话好听煞啧啊？”大家侪是世界语言宝库里个一滴水，侪是语言文化多样性个组成元素。
上海现在蛮有优势个，经济发达，上海闲话人口众多，外加相对讲来母语自豪感比较强，关心个人也比较多，相关个资料更是数不胜数。上海人若然垃姿态、言行上也侪做得好个说话，不单可以团结各地个吴语人群共同做好吴语传承忑保护工作，也可以吸引更多垃上海个外地人学习上海闲话，壮大吴语人群。但若是跳不出自家大都市个窠臼，还塱“递种闲话么难听，伊种发音么难以接受”，容易孤立自家个。
不过，我觉着乌程兄倒是蛮真实个，有一句话一句，是哪恁想个就哪恁话，递点我蛮欣赏个。从总体上看，郊区、农村里个人容易有母语自卑感，倾向于以街上闲话为荣，城区、都市里个人母语自豪感比较强，但也容易看不起郊区、农村个闲话，递个侪是蛮正常个，也是政经文化地位垃语言上个反映。我老早对递种现象蛮看不过个，后首来也逐点理解忑包容啧，毕竟也是蛮自然个事体。
当然，若假上海人有能克服自家都市优越感造成个语言偏见，乡下人也有能克服自家个地域自卑感弘扬自家个乡音，个对于语言文化多样性肯定是再好不过个啧。
|
发表于 2014-8-25 18:08:23
提升卡
置顶卡
沉默卡
喧嚣卡
变色卡
显身卡
发表于 2014-8-26 09:08:57
楼主