吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 5233|回复: 1

又到风云激荡时 ——上海话前世今生之十二

[复制链接]
发表于 2014-7-20 15:12:51 | 显示全部楼层 |阅读模式
  文/钱乃荣
  假使讲,20世纪初年,老上海话以昂首阔步个派头无所畏惧个迈过一个充满变数个十字路口,以少胜多,展现出来个是伊个巨大个辉煌,葛末,100年以后21世纪初,上海话又到了一个新个十字路口,又面临着新个一轮风云际会,伊又拿哪能样子个姿态去接受新个洗礼呢?
  1852年,上海只有544413人;到1949年,已有5455007人,人口增长10倍,其中80%以上是外地籍人。1950年,市中心个黄浦区、老闸区,上海籍人只占4.8%,但是,辣辣黄浦区、老闸区个人侪讲上海话,来沪外地人尤其是从第二代个子女起侪学会了用相当标准个上海话来交际。辣搿个100年当中,上海也用国语,所拍个近2000部电影绝大多数讲国语,辣上海产生个大多数文学作品也用国语创作,上海个电台也讲国语,也有上海话个电台,上海话搭国语和平共处,互补双赢,国语因上海话强大了,上海话辣上海也强大了。
  现在,上海已是一个大都会,出生辣上海、以上海话为母语(从母亲搿搭从小传来个勿需学个第一语言)个人口少讲讲也有1000万,近年外来常住人口搭流动人口辣上海还是低于老上海人,而且来自五湖四海。但是为啥大家感受到上海话反而辣辣衰弱下去呢?
  上海辣50年代后,因为户口制度限制了外来人口涌入,上海话得到了几十年个相对稳定发展。由于一直是中国经济文化发展中心,上海年轻人又以上海人个身份为重,讲一口标准个上海话,要是有勿准个口音会老快个自动修正。因为海派文化个深远影响,辣上海个语言、文化个遗传中,含有现代城市个先天文化基因,上海话还是一直保持创新个活力,远胜于其他城市。
  语言总是要随着社会个发展而变化个,当然最好是顺其自然发展,顺其自然个变化带来个是语言个自然丰富搭仔健康发展,语言会自动择优除劣,用勿着人过于多操心,约定俗成本身就是优胜劣汰,上海话个发展历史充分证明了搿一点。20世纪从西方来个新概念新事物,上海话来一个就造一个新词语,一时来勿及造个就讲“洋灰、洋伞、洋风炉、洋囡囡”,以至群众造起洋泾浜英语来搭外国人交际。其结果是,辣上海好个语言要素侪传下来了,大量词语传进了通用语(当时叫国语),上海话搭国语侪生龙活虎。
  现今上海话确实是衰弱了,有人讲搿个是因为90年代以后来了大量个外地人,街浪向讲个侪勿是上海话了。
  搿个可能是一个误会。语言事实早已证明,并勿是外地人个比例增加,普通话场合多了,方言必然会削弱。上海话个历史浪外来者来得多于上海本地人,只要是辣各种语言顺其自然个环境下,上海话反而变得更加好。何况现今1000多万老上海人辣海讲个母语上海话,已经有雄厚个基础。
  有人讲现在社会浪交际场合中普通话讲得多,造成了上海话个式微。
  搿个也是一种误读。其实使用频率对上海话个传承影响勿会老大。一个人从小学会上海话后,只要伊有交际上海话个地方,伊讲个上海话就勿会有多少退化。像阿拉辣大学里,侪是讲普通话,但对上海人还是讲上海话,辣屋里上海话照样讲得老好。上世纪40年代去旧金山、去中国台湾个上海人,隔了50年回到上海,还是一口标准个上海话。现代世界浪讲双语三语个人邪气多。
  葛末,为啥辣上海,上海闲话近年来发生了传承个瓶颈了呢?且听下篇分解。



该贴已经同步到 吴人的微博
发表于 2014-7-22 09:28:45 | 显示全部楼层
民系比民族更有凝聚力
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2021-9-28 15:55

Powered by Discuz! X3.4

© 2001-2017 Comsenz Inc.

快速回复 返回顶部 返回列表