吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 5536|回复: 2

改变称呼,有助保护(吴语·嘉定闲话北支 原文+音频)

[复制链接]
发表于 2014-5-3 20:26:07 | 显示全部楼层 |阅读模式
本帖最后由 霜竹 于 2014-5-3 20:33 编辑

http://www.tudou.com/programs/view/d0caMhHwkkA/#[url=http://www.tudou.com/programs/view/d0caMhHwkkA/]http://www.tudou.com/programs/view/d0caMhHwkkA/[/url]

改变称呼,有助保护
(吴语·嘉定闲话北支)
垃塱保护汉语方言个努力中,人们常庄使用“方言”忑“普通话”个名称,虽然现在人们个方言保护意识有所提升,但多少还是会觉着方言是比普通话低级个闲话,递个可能还是会对方言保护产生一定个阻力。若然,我伲垃塱提倡保护个辰光,拿称呼改一改,作兴效验还要好点。
对于交关人来讲,可能並不了解汉语忑普通话个概念,道著汉语么就是普通话,普通话么就是汉语。方言是啥?方言么就是不标准个闲话咾!甚至觉着方言么就是低等、龌龊、肮脏个物事。塱递种意识个影响下,交关人还是觉着方言是无关紧要,可有可无个物事。递个对于方言个保护,汉语个传承,自然是不利个。
汉语忑汉语各种方言个关系,是上位概念忑下位概念个关系。汉语是官话、吴语、闽语、粤语嘞铤各种汉语方言个统称,各种汉语方言共同组成汉语。递个就像“车”递个概念忑各种车子,“生物”递个概念忑各种生物一样。
普通话是以北京语音为标准音,以北方闲话为基础方言,以典范个现代白话文著作为语法规范个现代汉民族个共同语。不精确个讲,可以拿普通话看成功是北方闲话,甚至就是北京闲话。
各种闲话个差别,语音个不同是最显而易见个。人们塱比较普通闲话忑方言个辰光,垃交关情况下涉及个只是语音,譬如一个成语、一首古诗、一篇古文,用普通话读还是用方言读,实际上就是用北京语音还是其他地方语音个问题。但若然话“普通话”忑“方言”,人家难免有高低贵贱之分——一边是普通话呃,标准汉语!一边是方言喂,不标准个低级汉语!但如果话“北京闲话”忑“某某闲话”,个么从名称上来讲,就畀交关不明真相个群众一种平等个感觉——嚎,原来侪是用某个地方个闲话去读。寔恁就拿北京语音个实质从“普通话”递只神圣名头个庇护所里拖著出来,帮助大家从“普通话至高无上”个误解里走出来。外加寔恁一来,大家自然而然也会思考:“既然普通话轧实就是‘北京闲话’,个么北京闲话可以做个,我伲递上个闲话也可以做个咾!北京闲话可以读书,本地闲话也可以读书!北京闲话可以作报告,本地闲话也可以作报告!……”交关问题侪会迎刃而解。
当然,严格个讲,普通话虽然来自方言,但也已经不等于方言啧,【亻渠】至多忑北京闲话蜪划个约等号。但鉴于交关人根本不晓得普通闲话个方言属性,只当著是天外飞来个高大全语言,个嘞有必要从名称上予以改变,han大家一目了然。譬如可以用打引号个“北京闲话”表示,个么既突出著【亻渠】个方言属性,使得大家再也不觉着自家个方言母语有啥低等,又兼顾著严谨性——毕竟加著引号忑不加引号意义稍些有点不一样。
乃“方言”嗫,为此著交关人还是垃递只名称下头对自家个母语有自轻自贱个自卑心理,咯咾也可以换一种称呼。老百姓常常用个“闲话”可能就要傍“方言”容易提起自信——大家讲个侪是一种闲话,无非就是我话个是本地闲话,佷话个是普通闲话咾!特别需要注意个是,交关地方可能只是用“土话”递个词语来指称本地闲话,递只词眼容易使得人们始终处于一种自卑心理之中。垃呼吁保护个辰光使用“本地闲话”或者“某某闲话”个名称可能更加容易获得响应。
还有就是用“汉语”或者“汉语分支”来指称。譬如讲称“某某地区个汉语”可能就要傍称“某某地区个方言”容易引起人们个重视。寔恁人们就会了解着,嚎,原来我伲递个上个闲话也是汉语!毕竟,交关人甚至不晓得方言是否属于汉语。名称上个细微调整,可能也是普及知识个捷径。
汉语是丰富多彩个,是包括北京闲话垃许千千万万个地点方言组成个。现在“北京闲话”一超独大个格局从一定程度上可以讲是汉语个萎缩,因为除脱著“北京闲话”,广袤个汉语地区大多数地点个闲话侪出现著生存困境,面临著失传个危险!而塱递排地方个闲话里乡蕴藏著无数古今汉语个珍贵信息,若然递排地方个闲话侪绝脱啧,独剩“北京闲话”递粒沧海一粟,递个话特不是汉语个重大损失?个嘞,我伲垃【土耷】呼吁保护方言个辰光不相揵起保护汉语个大旗——递个不是保护、传承、发展汉语又是啥个嗫?虽然保护方言本质上就是保护汉语,但邋口号上保护汉语应该越加有能获得大众个重视。
希望汉语个各个分支侪有能生存下去,就像物种多样性一样。世界上若然只有一种动物是可怕个。同样,世界上若假只有一种闲话,也是单调个。
疁·浏河长江
2014-5-3  农历  甲午年  四月初五
发表于 2014-5-3 20:32:08 | 显示全部楼层
霜竹你不要太累了
发表于 2014-5-8 23:32:10 | 显示全部楼层
国外有人这样称呼的:Mandarin Chinese, Wu Chinese, Cantonese Chinese
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 02:32

Powered by Discuz! X3.4

© 2001-2017 Comsenz Inc.

快速回复 返回顶部 返回列表