|
2011-10-25 15:58:46 来源: 新民晚报(上海)
2011年中央电视台春晚有一只小品,讲个是一个人拾到一只皮夹子要还拨人家,双方约好用一句唐诗“远上寒山石径斜”接头。搿句诗里向个“斜”勿读xié(鞋)读xiá(霞),告【和】上海话个发音差勿多。(垃搿搭,上海话里保留了古音。)戏里向失主先到,伊叫了两声后,偷懒省脱4个字,只叫“石径斜”、“石径斜”,像垃拉喊一位女士。后来伊干脆“霞”、“霞”乱叫,赛过垃拉寻伊拉女朋友,拨伊老婆埋怨了一顿,真好白相。
勿少语言文字专家讲,垃拉包括上海话在内个吴方言里向,保留了许多古音。交关年前我曾经读过王力先生写个《诗词格律十讲》搿本小册子。其中,王力先生讲到唐朝李益个《江南曲》,“嫁得瞿塘贾,朝朝误妾期。早知潮有信,嫁与弄潮儿”个辰光,就指出按照现在个读法,“期”字读qí, “儿”字读ér,勿押韵,交关勿和谐。但是,唐朝辰光“儿”字读作ní,跟现在上海话个发音一个样,搿能就押韵了,就和谐了。
前两天,读到五代北宋辰光孙光宪个《风流子》词:茅舍槿篱溪曲,鸡犬自南自北。菰叶长,水葓开,门外春波涨绿。听织,声促,轧轧鸣梭穿屋。一开始用普通话读勿大顺,“曲”、“北”、“绿”、“促”、“屋”勿押韵,有点拗口。后来,我无意当中用上海话一读,灵个!迭个五个字竟然侪是一个韵母,读起来顺口多了。我勿由得一阵兴奋,心里想,作兴宋朝辰光就是搿能读个。(编者注:搿个是上海话保留了古音当中个全部入声字音,而北方话在元朝辰光就“入派三声”,即古代个入声分别合并到平声、上声、去声声调里去了,韵母也改变了。)
现在,啥地方有得明清辰光个古建筑,就要保护起来,就可以弄出一个老街古镇来,就可以发展旅游事业。搿些当然蛮好。可是,对于上海话里向保留了朝代更早个唐宋,甚至更早辰光个古音,阿拉也要珍惜,勿注意保护,刻意垃拉学堂里向封杀上海话,硬性规定课余时间也要讲普通话,弄得交关上海小囡勿讲上海话,实在讲勿过去。上海话也是一份老祖宗留拨阿拉个宝贵个非物质文化遗产,千万勿要再让伊日渐消亡下去了!
作者:沈寿仁
该贴已经同步到 吴人的微博 |
|