吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4652|回复: 1

说说我自家格故事(十三)

[复制链接]
发表于 2009-8-22 16:37:45 | 显示全部楼层 |阅读模式
说说我自家格故事(十三)
“牛屄阿荣”格绿豆汤
绿豆汤,可以说是一种人人晓得格,勒夏天头里,人人侪欢喜,大家常吃格清凉败毒、消暑解渴饮品。一般格绿豆汤就只是用淘干净格绿豆加水烧煮格豆少水多,吃格辰光再加白糖,或者勒烧格辰光就直接加仔糖一淘烧。绿豆汤里还可以加点百合苏州白话读作[an],就叫做“百合绿豆汤”。不过百合是生勒烂泥地里嘅,勒蒂里挖出来会带勿少烂泥。要放勒镬子里搭绿豆一烧之前,一定要一瓣一瓣剥下来,掐脱百合格尖,撕脱表面格一层衣,勒水里向汏苏州白话读作[da],洗干净,否则烧好格绿豆汤吃起来苦味比较重。
旧年夏天,我勒无锡碰着仔伲勒上海格大阿姐,搭俚讲起仔小辰光吃绿豆汤格桩事体。大阿姐告诉我,卖绿豆汤格人,也勿记得俚姓啥叫啥,不过大家侪晓得俚格绰号叫“牛屄阿荣”。
小辰光,我勒黄埭,每年格夏天头里,只要“牛屄阿荣”格绿豆汤担一上市,我每日天侪要勒俚格担头浪买一碗绿豆汤来吃嘅。箇辰光,全黄埭街浪只有“牛屄阿荣”箇一副卖绿豆汤格担子。俚格担头浪一面放几只放绿豆汤配料格盆子:一盆绿豆沙、一盆蒸熟格薏仁米、一盆蒸熟格糯米饭,箇个三支盆子浪哪一条汏得雪白格土白不盖好仔。担头浪还放仔一小瓶玫瑰酱、一只放白糖格罐头下头格一个放一桶用一种名叫“鬼馒头”植物果实格做出来格,切成一个个小方块格,用冰瀴格井水浸勒浪格“凉粉”,另一个担头浪放两幢青边碗搭仔十几把白瓷格抄,一桶勒井水里结过嘅烧绿豆格冰冰瀴苏州白话读作[jin],冷格汤,还有一桶汏碗用格干净井水。
倷要买俚格绿豆汤,俚就勒放碗格担头浪拿只青边碗,拿一把小抄,勒每只放配料格盆子里侪挖一堵放到青边碗里,因为叫绿豆汤。所以放到青边碗里格配料也是有多有少嘅,一般总是绿豆沙最多,蒸熟格糯米搭薏仁米要少点,再勒放玫瑰酱个小平利用像扒耳(苏州白话读作[ni]朵格“挖耳”一样格物事挖一小厾玫瑰酱,加到青边碗里,用一只竹头作格小笊篱,到放凉粉格桶里舀浅浅交一笊篱,大约十来块凉粉,从绿豆汤桶里拷一勺冰瀴个绿豆汤冲勒青边碗里,最后再加两小抄白糖。那青边碗传畀倷格辰光,乐碗里放一把白瓷格抄。
箇碗绿豆汤里格配料,按照中医格说法是侪蛮有讲究嘅:绿豆,味淡,性平,能解百毒;糯米,味微甘,性温,有补中健脾胃格功效;薏仁米,也是一种禾本科植物薏苡格种子,味淡,性平,有特别好格利尿祛湿作用;玫瑰酱,使用玫瑰花加白糖腌制出来嘅。玫瑰花就有润肤美容格功效,直到如今也有人推崇拿俚泡水当作护肤美容格饮品来经常饮用。做凉粉格“鬼馒头”,是一种桑科格能够攀缘格藤本植物,薜荔格果实,形似无花果。用俚做出来格凉粉吃勒嘴里感觉到特别爽滑。所以夏天头里吃箇种绿豆汤勿单是清凉消暑,还有健胃祛湿护肤美容等格食疗功效。
像实梗好格绿豆汤,自从我离开老家黄埭之后,直到如今,还真是从来也朆吃着过。就是瞪了苏州市里格几年,也朆碰着过,到仔南京来,南京人听也朆听见过有实梗做格绿豆汤!现在连黄埭也呒不各种绿豆汤卖哉。看来箇种绿豆汤已经成为仔历史格过去哉!
发表于 2009-8-23 07:41:40 | 显示全部楼层
做功丈道地个绿豆汤朆吃过~
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 02:01

Powered by Discuz! X3.4

© 2001-2017 Comsenz Inc.

快速回复 返回顶部 返回列表