吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4615|回复: 2

的说说我自家格故事(八)

[复制链接]
发表于 2009-7-21 09:28:33 | 显示全部楼层 |阅读模式
本帖最后由 laosuzhou 于 2009-7-23 09:10 编辑

说说我自家格故事(八)

“鬼”格故事

勒我小格辰光,哪里像现在实梗,家家户户侪装仔冷暖空掉,夏天开冷气,冬天开暖气,人登勒屋里,夏天热弗着,冬天冷弗着。箇晨光,勒黄埭箇种小场化,赅(苏州白话读作[kai],拥有)电风扇格人家相当少,简直可以用“屈指可数”来形容。屋里就是赅仔电风扇,也舍弗得一日开到夜,让俚弗停吹嘅。所以箇个辰光,一到夏天,家家人家格大人、小囡,吃过仔夜饭侪会带仔扇子、矮凳到桥面浪,或者空旷格场化去吹风凉。伲屋里也一样,吹风凉格场化就是笡(苏州白话读作[tshia],斜)对面格芳桥面浪。
当然,倒房桥面浪吹风两格还有弗少乡邻:东隔壁格擅长搭小干儿推筋格阿二倌厾、西隔壁席行格王家里、对过洋袜摊格王老板厾、西面六房墙门口镶牙子格程先生搭仔俚格两个儿子,大坤、小坤。还有芳桥下塘桥堍浪个几家人家格小干。最受伲箇辈小囡欢迎格,也就是箇位程先生!原因就是俚讲格故事特别吸引伲箇辈小干。俚讲“三国志”、“水浒传”、“封神榜”里格故事畀伲听。俚最拿手格,是讲“鬼(苏州白话读作[tcu])”格故事。
程先生讲故事格辰光,对听俚讲故事格人是有要求嘅。俚要求听故事格人要围牢交仔俚;两只眼睛也要盯牢交仔俚;弗许人追问;弗许打断俚格闲话。程先生讲起“鬼”故事来,绘声绘色,声音也是抑扬顿挫,每一个听俚故事格人弗由得弗跟仔俚故事情节格延伸而精神紧张、眼睛结出弗敢旁顾、浑身汗毛竖起。有辰光,讲到关键时刻,俚也会问大家:“恁厾啊怕?怕末我就讲到该搭。”箇晨光,伲箇辈销难就会异口同声回答:“弗怕!”不过回答格声音明显就是强装出来嘅。为仔听俚格“鬼”故事,每每弄到深更半夜方才或唱歌,或吹口哨来壮仔自家格胆子回转屋里去。一只搭苏州养育巷有关格贼骨头想到有铜钿人家去偷物事碰着“鬼”格故事,我至今记忆犹新。
我勿晓得看我该只故事格朋友,倷小辰光啊曾白相过扮“鬼”格游戏?假使倷朆白相过,箇末,让我来告诉畀倷厅。
勒黑黜黜格环境里,倷对好仔镜子,拿只电筒,放勒下巴(苏州白话读作[ngebo])底下,让电筒光从下朝上照,倷啊想得出倷镜子里只面孔会是啥个样子?假使倷再拿条舌头伸出来,拿面孔浪格肌肉再往下拉一拉,倷箇只面孔就是活脱脱格传说当中个“鬼”面孔!镜子里箇之面孔让倷觉着更加恐怖。箇种扮“鬼面孔”格方法,我也是勒浪白相“官兵捉强盗”游戏格辰光,从比我大格淘伴搭学得来嘅。
学会仔扮“鬼”面孔之后,也会得拿仔电筒学畀自家格弟弟、妹妹看,还教俚厾也来扮“鬼”面孔。有辰光还会得搭仔几个淘伴一淘,吃过仔夜饭,拿仔只电筒,扮仔“鬼”格面孔,勒黄埭街浪,从上塘到下塘,从东横头到西横头,满街格跑来跑去。有辰光也会取吓吓比自家小格小干儿或女小娘。吓得小干哇哇哭。也有辰光会畀别人捉牢仔拖倒爷娘搭去“告状”。箇辰光,爷娘会代替自家搭别人家赔弗是,自家也难免遭到爷娘格一顿训斥。
倷啊曾听见过“鬼”叫?
记得是一个新学年刚开始弗久,吃过仔夜饭,跟仔爹爹勒厅浪踱仔歇方步,稍微活动活动之后,我就拿当日学堂里先生布置功课拿出来做。爹爹就勒旁边陪我。我小辰光,算术格学习成绩是非常退扳嘅。所以功课里向只要一有算数,我格功课做起来也就特别慢。几个算术格应用题,足足拉腊做仔两个多钟头。爹爹也耐足性子勒旁边陪我,停停走到我背后头来看看我,歇歇走到我身边来望望我,然后再一个人勒厅里踱步。因为爹爹讲过,做功课一定要靠自家动脑筋,教出来格功课,到下转碰着,仍旧弗会做,反而害仔俚。所以爹爹勒旁边陪我,我决计弗敢去问俚,只好一个人苦苦思索,直到想出来为止。实梗一来二去,弗知弗觉之间,辰光已经到仔深夜十点多钟。
就勒箇辰光,老远隐隐约约传来几声“嘘嘘”,“哈哈”格声音。听见箇个声音,爹爹格脚步忽然停仔下来,原地立停,听仔一歇,亦传来几声“嘘嘘”,“哈哈”格声音。爹爹格弗逊场举动,也引起仔我格注意,而且箇个声音也听得清清爽爽,我带着疑问格神情对爹爹望。
只听见爹爹说:“刚刚格声音倷啊曾听见?”我点点头。
爹爹说:“倷啊晓得箇是啥个声音?”我摇摇头,说:“弗晓得。”
爹爹忽然神秘兮兮格,压低仔声音对我说:“箇个就是鬼叫格声音!”俚实梗一说,我只觉着一股凉气勒我背心浪升起,身浪汗毛也竖仔起来哉,我马上立起身来,盼到爹爹跟前,拿俚格身体抱得铁紧,我说闲话格声音也变脱哉,身体也抖抖索索。
爹爹晓得我心里极度恐惧。俚摸牢交仔我格头,说:“我闲话也朆讲完呢,倷就吓得实梗则啊,倷格胆哪亨能格小吤!倷覅吓,箇种声音其实呒啥吓头。世界浪哪苏州白话读作[lo]搭有啥格‘鬼’呢。我刚刚说格‘鬼’叫,其实根本弗是啥个‘鬼’叫,是一种鸟苏州白话读作[tiao雕去声]格叫声。箇种鸟最欢喜夜里勒亮月底下一面飞一面叫,叫格声音末阴落落格,咋生头里听见,人家侪当是鬼叫嘅。”说完,亦勒我头浪摩摩。
爹爹格一番解释之后,我弗吓哉。重新回到台子旁边,拿最后一个题目个最后两个字写完,然后跟爹爹一淘到楼上去睏觉。
发表于 2009-7-21 11:37:42 | 显示全部楼层
是不是猫头鹰?那个鸟你们叫啥的?
发表于 2009-7-21 20:35:26 | 显示全部楼层
这种鸟叫都是晚上才听得得见,由远及近地,好像是“哇哇”两声,从小就听到,听了好多年了,在家,在外地住宿时都听到过,一直不清楚是什么鸟。不过后来搬家后倒没听到过这种鸟叫了。
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 14:36

Powered by Discuz! X3.4

© 2001-2017 Comsenz Inc.

快速回复 返回顶部 返回列表