吴语协会

 找回密码
 开只户头

扫一扫,访问微社区

QQ登录

只需一步,快速开始

搜索
查看: 4130|回复: 2

富阳叹头:《朱元龙大杀厨师》

[复制链接]
发表于 2009-5-17 13:03:35 | 显示全部楼层 |阅读模式
富阳叹头:《朱元龙大杀厨师》
  伢活,朱元龙吃勒败仗走过常安,到勒月山弯村,搿是个千把户人家格大村档。朱元龙逃勒搿里,肚皮实别饿煞勒,想起讨丢食司吃吃。村民见伊腰团里掛勒把宝剑,后头还跟勒兵卒,吓勒都关勒门躲勒起来。朱元龙弄勿着食司吃,发勒极,伊发誓:“我下卯子是或有出山之日,定规拨搿村档烧勒展展光!”
  呆勒煞,伊独落一人跚到山脚浪格一间草屋门口,望见一个老太婆徠底炖粥,鼻头子管闻闻毛香冒,伊唠约唠煞勒,就闷(向)老太婆讨勒碗吃吃。老太婆看勒伊介格饿煞相,桑可拨镬子里粥都抖勒大瓿头里捧勒出來、又得勒碗菜,朱元龙吃勒毛皮(味)道。伊闷(问)老太婆:“搿叫角儿粥?搿叫角儿菜?”老太婆看伊吃勒搭皮道,随口编勒两个蛮好听格名字,株着饭碗讲:“搿叫珍珠粥”。又株着菜碗讲:“搿叫凤眼菜”。朱元龙听勒记勒心里,心想介格好吃格东西我前生世亦咪吃着过。
  后歇來,朱元龙真搭果当勒皇帝。一日子,伊出里毛里间想起头场一卯兵败,经过富阳月山弯时光,搿时光饿勒饿煞,想起弄丢吃吃,挨家小户见勒伊就连快闩门躲起来,实別是气煞人。想到徠里心里车起一股子火,目浪派勒一个将军,带勒兵,一蓬火拨介大个月山弯村燒勒滑塌精光,变勒一块白地。
  烧勒月山湾之后,朱元龙总算出勒贼气。勿过过勒煞伊又记掛起搿时光山脚落搿个老太婆,拨伊吃格粥同淘菜蔬,真交子好吃,搿卯间回想起来,口里水或要哒哒沦勒出来。目浪传旨命皇宫里御厨烧“珍珠粥”、“凤眼菜”来吃。讲旦起来皇宫里大大小小厨师托托是,但都一头三千勿晓得搿是角儿东西?后歇來弄得要死才子晓得:皇上徠富阳月山弯山脚浪一位老太婆格里吃过“珍珠粥”、“凤眼菜”。就介,目浪派勒人起寻着勒搿个老太婆。闷伊:“‘珍珠粥’、‘凤眼菜’倒底是角儿东西?”老太婆话:“搿是我搿时光随口讲讲格。实话來讲,‘珍珠粥’就是大麥粥,‘凤眼菜’就是螺蛳肉炒腌菜。”大小厨师晓得勒,连忙采来大麦,螺蛳、腌菜,又配勒毛多调料,精心烹调。侃佴晓得,朱元龙一尝,目浪吐勒出来,难吃煞勒!一口咬定御厨要勿来,拨搿个厨师杀勒拨掉。换勒个,做旦出来或是勿对伊胃口,又杀拨掉,连笔连杀掉勒好几十个厨师。后歇來,皇后娘娘提醒伊,或是请儿带个老太婆来烧吧。
  朱元龙派人寻着勒老太婆,拨伊带勒京里,要伊做‘珍珠粥’、‘凤眼菜’。老太婆跪到讨饶。朱元龙话:“往日子佴勿是自家做咯?”老太婆话:“先目浪佴肚皮饥好吃食,眼目浪佴吃惯山珍海味,搿些东西嚡里吃得上口?”朱元龙才子晓得是介卯事体,从介后一直落拓再也勿提“珍珠粥”、“凤眼菜”勒。
注:
【伢活】——传说  
【朱元龙】——朱元璋  
【常安】——富阳地名
【村档】——村子。  
【腰团里】——腰间
【食司】——吃物,
【发勒极】——发了恨,
【是或】——副词,如果
【定规】——一定拨、定要
【独落一人】——独自一人
【跚】——动词,无方向乱走
【徠底】——在那里
【毛香冒】——香喷噴,
【唠】——饞
【闷】——(向),
【桑可】——索性
【抖】——动词,盛
【得】——动词,端
【角儿】——什么
【株】——动词,指着
【真搭果】——果真
【出里毛里间】——突然间
【头场】——过去、以往
【实別】——实在
【车起】——升起,
【目浪】——马上
【贼气】——恶气。
【同淘】——和
【菜蔬】——菜肴,
【沦】——淌
【讲旦起来】——说起來、虽然
【托托是】——很多很多
【一头三千】——一下子
【才子】——才刚、这才
【毛多】——许多
【作料】——调料
【侃佴晓得】——谁知
【要勿来】——无能
【杀勒拨掉】——杀掉
【换勒个】——换一个
【或是】——还是
【连笔连】——接连
【后歇來】——后来,
【儿带个】——那一个。
【讨饶】——求饶
【往日子】——过去
【佴】——你
【先目浪】——先前
【眼目浪】——现在
【嚡里】——那里
发表于 2009-5-18 12:24:50 | 显示全部楼层
吴越版格《珍珠翡翠白玉汤》
发表于 2009-5-19 07:14:23 | 显示全部楼层
小时候听老人讲过
您需要登录后才可以回帖 登录 | 开只户头

本版积分规则

手机版|Archiver|吴语协会 Wu Chinese Society ( 网友言论不代表本站观点 )

GMT+8, 2024-3-29 01:08

Powered by Discuz! X3.4

© 2001-2017 Comsenz Inc.

快速回复 返回顶部 返回列表