[文章翻译]晋毕阳之孙豫让（已更新加入音频）

姬远清

第一次翻译，选自《战国策》。

第一段：

  豫让是晋国人毕阳个孙子，曝开始呐佗是效忠晋国个范氏搭仔中行氏两家头咯，弗过因为得弗到重用就去侍奉知伯，知伯倒是蛮看好佗咯。等到赵、韩、魏三家联手灭落仔知伯，得到佗个土地后。赵襄子因为怨恨知伯竟然拿佗个头骨做酒器。个个辰光豫让齐巧伏勒个山里向，听见仔箇件事体就说咧：“啊呀！士为知己者死，女为悦己者容。我一定要为知伯报仇！”乃么佗就改名换姓，假装是个受刑个罪犯，到赵襄子个宫殿里向粉刷厕所墙壁，趁伊个机会去刺杀赵襄子。赵襄子去上厕所，着蓦头里心里吓着吓，结果就捉牢仔豫让。豫让指指箇把刀就说：“我要帮知伯报仇！”赵襄子个手下想要杀落佗。赵襄子说：“佗是个忠义之人，下二三介我用心点就好咧。再说知伯已经死落咧，呒不后代，弗过佗个臣下会来替佗报仇，也算是天底下难得个贤士。”后歇来就拿佗放落咧。

[ 本帖最后由 姬远清 于 2007-10-2 14:53 编辑 ]

姬远清

第二段:

  放出来仔以后，豫让就用漆涂得身上赛过长癞一样，还剃落自家个老牙须搭仔眉毛，自家毁自家个容，假装成讨饭叫花子转去，弄到连仔佗个妻子还弗认则佗。后歇来佗亦吃炭，就为仔让自家个声音听上去哑点。佗个朋友对佗说：“你个方法忒难，亦弗容易成功。有志气弗过弗算有智谋。以你个才能，若去侍奉赵襄子，我笃定佗会重用你咯。等到你可以接近赵襄子再动手，个么就容易咧，肯定是会成功咯。”呒不想着豫让反却回答说：“尔号得做是帮老早个知己去报复后歇来个知己，帮原来个主人去杀落新个主人。就算是逆臣还弗会尔号得做咯。我去刺杀赵襄子，只不过是要表明我侬两个人之间个君臣之义，弗是单单就为仔报仇。再说咧，拿礼物去献拨主人亦要去杀落佗，伊个是怀得二心去侍奉佗。我弗想尔号得做，也是为仔让天下怀有二心个人觉着难为情。”

姬远清

第三段:

  过仔段辰光，赵襄子要出去咧，豫让就伏勒佗要经过个桥底下。赵襄子过桥个辰光，佗个只马突然之间受到惊吓。赵襄子就说：“肯定是豫让啘！”派人去一查，结果真个是豫让。赵襄子当面责怪佗说：“你弗是老早侍奉过范氏搭仔中行氏个嘛？知伯灭落仔佗侬两个，你弗帮佗侬两家头报仇，反却要替知伯做事体。现在知伯死落仔你倒喃要来替佗报仇嗄？”豫让说：“我的确是侍奉过范氏搭仔中行氏咯，弗过佗侬两个赛过对待普通人个样子来对待我，所以我要像普通人一样去报答佗侬；而知伯就弗同咧，佗拿我当国家难得个人才，所以我要好好教报答佗。”赵襄子听仔箇星闲话后，叹着口气，说：“啊呀！豫让！你肯替知伯报仇，已经成就你自家个名声咧。我放仔你一介，也应该够咧。你说说看，我应该奈何，我呒处再放落你个咧也。”所以佗就派人拿豫让围出来。豫让看事体弗成功，就说：“我听说凡是贤明个君主绝对弗会阻止别人个义举。今伢个事体么我本来应该马上就死咯，弗过我希望可以拿刀斩你个衣裳。尔号个闲话么即使我死落仔，我也弗会有遗憾。虽然说我的愿望弗一定会实现，我还是说出来咯。”赵襄子就派人拿自家个衣裳拨佗。豫让喊着声：“我可以替知伯报仇咧！”拿衣裳斩成两半段后就自杀咧。

吴人

蛮好，做成音档，来说书。。。

姬远清

录得不大理想……覅笑我……

吴人

顶出来， 无锡人口音克气到到来

cocolzq

应该说清清个声音克起到到来

姬远清

不会吧……