吴语协会

标题: 说说我自家格故事（七） [打印本页]

作者: laosuzhou 时间: 2009-7-4 16:56
标题: 说说我自家格故事（七）

说说我自家格故事（七）

放鹞子

风筝，又名纸鸢。勒苏州人格嘴里称鹞子。鹞，是鹰的别称。鹰有非常高超格飞翔能力，鹰勿仅飞得高，能飞得很远。鹰张开翨{革羽}（读作[ji基 kaq甲]，翅膀）定勒浪勿动格样子，就像放飞格风筝一样。我想苏州人大概就是因为实梗格原因，所以称风筝为“鹞子”。
每年过过农历格新年，或吃过元宵节格汤团以后，一直到清明，是放鹞子格最好时节。勒箇个时节，只要天空晴朗，抬头仰望，蔚蓝格天际侪是大大小小格鹞子，有蝴蝶、有蝌蚪、有百脚、有圆月（苏州白话里读[nge厄]）、有菱形、六角形、八角形……各种各样，不一而足。
记得，黄埭街河渎桥格东堍，有一爿名叫“永康”格老字号酱油店。箇爿店是黄埭街浪最大，也是牌子最老格，专门做油（食用油）、盐、酱、醋、各种腌制酱小菜格店铺。俚格后头也就是酿造酱油搭腌制各种各样酱小菜格作坊。俚厾店里有一只百脚（“蜈蚣”勒苏州、无锡、上海一带格俗名）鹞，每年到箇个辰光，就会勒后头格作坊里放上天去。箇条大“百脚”放上天仔之后，一直要登勒天浪几十日天，过仔放鹞子格季节后，方始收转来，到来年再拿出来放。
勒箇段辰光里，黄埭街浪、附近乡下头个人，老远就可以看见一条活灵活现格红头“大百脚”勒天浪悠悠交格游动，每日天到垂夜块格辰光，还会搭百脚鹞挂一盏灯笼。就是天完全黑下来仔之后，方圆几里路之内格人就能看见天浪箇条“百脚”散射着幽幽格淡黄色光芒。箇条“百脚”勒箇格时节，就是黄埭街浪一道特有格风景！
我听说，“永康酱园”箇只大“百脚”年年放上天，已经放仔勿少年数哉。百脚鹞除百脚格头以外，百脚格身体是用一只只个月亮鹞串联起来做成功嘅，不过是月亮格两旁边各伸出一根竹梗梗，竹梗头浪再扎上一束鸡毛算是百脚格脚。听说箇只百脚鹞非常巨大，作为身体个每一只“月亮”，就像人家屋里格圆台面一样大！放箇只鹞子用格麻绳也是特制嘅，大约有小人个手指头实梗粗。放箇只鹞子上天，差勿多酱园里几十个职工要全体出动！
芳桥下塘箇块名叫“埭基坟”格场化，是一片大约有半亩地大笑个空地，东面四分之一突起，高出西侧个平地一尺半到两尺，高墩墩顶浪也老早变仔一片平地哉。埭基坟东面二十公尺开外是一条小河浜，南面、西面是一淌平洋，侪是格连片麦田、菜地。只有北面是一条踏出来格便道，沿便道北面有一廗（读[da大]）顾姓人家后院格围墙。箇搭视野开阔，行动方便，就是伲黄埭街浪人放鹞子天生格最好场化。每到放鹞子格时节，从早到夜，放鹞子格人络绎勿绝，下晚（该搭读[mei煤]）昼人最多，碰着礼拜日，人多得轧勿落。箇辰光，后来格人，也回到西偏南三四十公尺开外格一小块名叫“长坟”格高墩墩浪去放鹞子。
我只要一有空就会跑到埭基坟浪去看别（读作[beq勃]）人放鹞子，有辰光也会得搭搭下手，拿鹞子往天上送一送；或者帮别人个忙，绕绕放鹞子格线、或绳之类。一经想要自家也能够有一只鹞子，最好是蝴蝶样子格鹞子。当然也想着过自家动手做一只蝴蝶鹞，虽然我也晓得做鹞子需要点啥格物事，但是呒不人教我哪亨做鹞子，尤其是做鹞子格辰光要掌握个窍门，否则做好仔也放勿上天嘅。
有一日天下晚昼，阿哥带仔我到西横头俚格同学，景辉阿哥厾屋里去白（白话读作[beq勃]）相。据说两家人家还是世交，伲爹爹搭景辉阿哥格爹爹也是蛮要好格朋友，两个老人家也常常勒一道聚会、听书、看戏。一到俚厾屋里，只见客厅格墙头浪挂着几只鹞子，有蝴蝶形、八角形。俚呐受狼孩勒浪搭一只差勿多像一个小干儿（该搭格“儿”读作[ng五]）实梗大格大蝴蝶形鹞子糊纸头。我就凑上去，叫仔俚一声：“景辉阿哥，倷会扎鹞子嘅啊？倷啊好教教我吤？我也想搭自家做一只蝴蝶格鹞子。”
“做鹞子末，倷现在还小，用刀削竹头蛮危险嘅，一个勿巧，就会削勒倷自家格手浪向嘅！等倷再大一点，我再教倷，啊好？”景辉阿哥默默我格头，对我说，“倷想要只鹞子么，勿难嘅，倷看，我墙头浪挂勒浪格箇点鹞子里向，倷看中哪只，我就拿俚送畀倷。啊好？”
我一听里格闲话，心里向是满心欢喜，开心得勿得了，面露笑容，点点头，说：“啊是真格吤？倷无能骗我嘅啊！”我故意加上一句，拿箇桩事体敲敲实。
“我啥辰光骗过歇倷？倷说，倷想要哪只鹞子？我现在就去拿丫杈来探畀倷！”景辉阿哥说。
我马上用手指指墙头浪箇只“蝴蝶”，说：“我就想要箇只‘蝴蝶’！倷啊肯拿俚送畀我？”
“好。”景辉阿哥说，“我马上探畀倷。”话音刚落，俚就到后面拿仔只丫杈来，拿墙头浪向格箇只蝴蝶鹞探仔下来。说：“等歇恁厾转去格辰光，我来交畀倷阿哥，让俚呐来搭倷拿转去。”
“好格。谢谢，谢谢倷。”我马上说。
勒景辉阿哥屋里白相仔歇之后，就回头仔俚厾大人，说要回转去哉。景辉阿哥拿只蝴蝶鹞交畀伲阿哥格辰光，交代我：“箇只鹞子比较大，方鹞子格绳勿能忒细，起码要用扎制点格麻线。勿然绳子一断，鹞子要飞脱吤！”“喔，晓得哉！”我答应一声，伲弟兄两家头亦谢仔俚一声。俚让伲阿哥拿勒手浪。伲阿哥拎仔只鹞子对我说：“那是好哉，倷转去仔夜里向格觉也睏勿着嘅哉！”我笑咪咪嘅勿响，高高兴兴格跟勒俚后头，望自家屋里转去。
自家有仔只称心如意格鹞子之后，就一心想拿出去放。第二日，我就开始为放鹞子做各种准备。
我先问姆妈：“伲屋里啊有放鹞子格麻线？”
“屋里哪搭来麻线吤！”姆妈说，“要末到麻线店里去买啘。”我就嬲牢胶仔姆妈要去买麻线。姆妈畀我嬲得呒不办法，只好答应。
勒伲屋里搭西面。隔开五六间门面远格六房墙门口，有爿专门卖麻线、麻布（俗称“夏布”）格店铺。姆妈搀仔我，就勒箇爿麻线店里买仔两绞麻线畀我。姆妈叮嘱仔我几句：“我麻线么买畀倷，箇只鹞子实梗大，倷一个人放箇只鹞子吃弗住吤！倷一家头弗能去放吤。要放，一定要搭阿哥一道去。啊晓得？”
我虽然嘴里答应，心里恨弗得马上就到埭基坟朗去，拿箇只鹞子放到天浪去！
回到屋里，亦问姆妈拿仔根竹筷儿（读作[ng五]，下同）。我先拿两绞麻线拆开来、绕成两团。先拿一团麻线格一头勒筷浪绕几圈系系（勒苏州白话里读作[ji结]，下同）牢，那末再用绕“8”字法，拿箇两绞麻线侪绕到箇根竹筷浪。勒浪即将绕完格辰光，搭另一个麻线团格头接起来，等到拆绕道筷浪，箇些麻线勒箇根竹筷浪就像一粒大橄榄，竹筷勒麻线两头还露出大约摸一寸长个光景。我实梗格绕法也是勒浪做别人帮手格辰光学得来嘅。因为我看人家实梗绕起来格绳，勒浪放鹞子辰光，放线、收线侪蛮方便。
亦过仔两日天，一经等勿着伲阿哥格人，心里放鹞子格念头实在熬弗牢哉，一日下晚昼，学堂只有一节课，刚一下课，我连忙拿书本、簿子、铅笔盒望书包里一塞。先生千脚跨出课堂格门槛，我拿书包望肩胛浪一掼，后脚也就跟仔出去。一出课堂们，直奔校门外，一路快跑。䟅（？读作[zia斜]，疾速奔跑）到屋里，书包望茶几浪一厾。一只手里拎好仔只鹞子，一只手浪拿好仔放鹞子格麻线，拔脚就往埭基坟浪跑去。
到埭基坟浪一看，还好，放鹞子格人弗多，蓝蓝格天浪只有七八只鹞子，准备要放飞格鹞子，连我在内，也只不过三四只。地浪，放鹞子格搭来看热闹格人，加起来总共也弗满廿个。再一看，别人格鹞子大多数侪是箇种勒摊头浪有得卖格，普通棉纱线就可以放起来格，像“瓦爿”一样四四方方格小鹞子。相比起来，我手里箇只“蝴蝶”亦是大亦是漂亮，非常抢眼，大家侪勒浪对我手里箇只鹞子相。
一看实梗格情形，我觉着心里来得格得意。我先跑到东面高墩墩浪，寻仔一块比较大格空地，拿放鹞子格麻线搭鹞子浪格根千斤总绳系牢。一只手拿好仔麻线团，一只手拎好仔搭鹞子系好的麻线，想一家头来放箇只蝴蝶鹞。就勒箇个辰光，我远远叫看见一经勒一淘白相格格圆圆立勒浪俚屋里格后门口。俚比我大几岁，我格手对俚一招，俚就跑到我们前。说：“倷也来放鹞子啊。箇只蝴蝶真漂亮！那搭来嘅吤？”
我说：“伲阿哥格同学送畀我嘅。倷呒不啥事体么过来帮我个忙，啊好？搭我一淘拿箇只蝴蝶放上去！”
“好嘅啘（可以连读作‘呱’）。”俚答应一声。
因为吹格是东风，所以俚接过我手里箇团麻线以后，你两家头一淘跑到最西面。俚让我拿仔鹞子立勒一丈开外格西面，拿鹞子往天浪擉（读作[zoq蜀]，送；射）。只听俚一声“放！”，我就拿鹞子用力望上一擉，跟仔俚一淘往东面奔跑，一面奔一面放线，直跑出去两三丈，只见箇只鹞子摇摇晃晃往天浪直窜。箇团麻线交还畀我格辰光，俚教我两只手一定要拿牢麻线团两头格筷儿，线要慢慢交放，要放放停停。我接过麻线，只觉着两只手浪分量重得吃勿消。我只得马上招呼圆圆，赶快过来帮忙。俚过来捏牢我拿筷儿格两只手，两个人一淘扳牢仔鹞子格麻线，一步一步退缩着往东面格高墩墩浪走过去。一面走一面放线。放线格辰光，鹞子会往下头沉，格辰光，放线格手就要停下来，腾出只手来，扳扳牵鹞子格绳，箇只鹞子就往天浪升。鹞子一往上升，就再拿线放出去。线一放，鹞子就落，鹞子一落，再停手扳扳手里格鹞绳，扳几扳，鹞子再上升。就实梗反反复复，放放停停，只看见箇只“蝴蝶”鹞子越放越远，越放越高，也越来越小。我只觉着两只手浪格分量也越来越重，往高墩墩浪走起来，脚浪格步子越来越吃力。也只有一歇歇格辰光，筷儿浪格麻线侪放光哉。
两家头走到高墩墩浪，勒草地浪坐下来，放鹞子格成功，我格心里乐滋滋，格外开心。圆圆告诉我，勒鹞子浪绑一张鹞弓，鹞子放到天浪去仔之后，鹞子还会发出“嗡嗡”格响声。俚还答应做一张送畀我。俚搭我白相“搭鹞子送饭”：就是拿一张纸头，戳一个洞，穿到放鹞子格绳浪，稍微抖抖鹞绳，各张纸头就会沿着鹞绳往上升，可以一直升到鹞子门前。
后来，俚教我：拿系麻线格筷儿插勒泥地浪，弗必要一经守勒旁边嘅，腾出身体来还可以白相别格物事。我一想实梗也弗错，我让俚帮仔我拿筷儿插勒泥地里，一直插到系麻线格场化碰着地面，差弗多有半根筷儿深。为仔保险起见，我勒碰着地面格麻线浪再压仔半块砖头。
就勒箇辰光，原来格东风突然转仔偏北风，我箇只蝴蝶鹞也从西面转到仔偏南面格方向，鹞子转方向格辰光，乐天空浪翻仔几个跟斗。我问圆圆哪亨弄法，只见里走过来。拿筷儿从泥地里拔出来，对我说：“先收一收鹞绳，等鹞子平稳下来再放线。”俚拉麻线，拿线收转来，叫我拿收转来个先绕勒筷儿浪。等仔歇，鹞子了偏南面格天空浪稳定仔下来。
“现在可以放线哉！”圆圆对我说。俚马上亦帮仔我拿麻线重新侪放出去，等到麻线放完，拿筷儿勒原先插筷儿格洞洞眼里插好，还用原先箇半块砖头压好勒线浪。俚立起身来到别人搭，看别人放一只弗大格老鹰形状格鹞子。我也想跟过去看，勒我立起身来格辰光，因为勒地浪孵（读作[bu匍]，蹲）格辰光忒长，脚里发麻，起身辰光有点立脚弗稳，去碰着仔插勒地浪格竹筷，筷儿畀鹞子格麻线从泥地里袋子出来，我一把呒不抢着，鹞子连麻线带仔根竹筷马上往南面飞出去。我一面喊：“圆圆，鹞子飞脱哉，豪{}帮我追！”一面跟仔鹞子吠陀格方向跑，
圆圆听见我箇叫喊，也追仔过来，俚比我跑得快，几步就已经超过我，伸手去抓鹞绳搭筷儿，但是，箇根离地面最近格筷儿畀鹞子拖着一直朝前飞，越飞越快，越拖越高。转眼之间，连鹞子影子已经完全看弗见哉。圆圆追过仔几块麦田也终于朆追着，只好气喘咻咻垂头丧气格跑转来安慰我。
是我自家格疏忽，眼睁睁格看着自家心爱格“蝴蝶”费的无影无踪。我心里难过至极，但是却欲哭无泪，回转屋里怕别人埋怨所以只好瞒牢仔弗讲。直到现在，想着箇桩事体，心里还勒浪懊悔。
也就是箇种悔恨格滋味，使我写箇只故事格最后几段格辰光，弗快活格心情一直让我呒不办发快速写成，只好写写停停，拖拖拉拉仔好几日方才完成。

作者: 学讲吴语 时间: 2009-7-8 14:32
看的眼花了~~不过初学的读下来会感觉明白很多~~

作者: 人人头 时间: 2009-7-8 16:18
写得真个蛮好。
就当俚是放断鹞吧~

看仔过后有两滩场化要问声：
1.西面、南面是一趟平洋。
平洋是平地的意思？黄埭宽阔的河面怎么叫法哒？

2.倷无能骗我嘅啊
黄埭说“无能”？还是“无处”？

作者: laosuzhou 时间: 2009-8-5 09:25

写得真个蛮好。
就当俚是放断鹞吧~

看仔过后有两滩场化要问声：
1.西面、南面是一趟平洋。
平洋是平地的意思？黄埭宽阔的河面怎么叫法哒？

“宽阔”，苏州闲话叫“开阔”。

2.倷无能骗我嘅啊
黄埭说“无能”？还是“无处”？ ...
人人头发表于 2009-7-8 16:18

“无能”，是“勿能”之误。因为我习惯用拼音输入，“无”、“勿”两字格拼音键是一样嘅。稍勿检点就会出实梗格错误。真是对勿起大家。

欢迎光临吴语协会 (https://wu-chinese.com/bbs/)