说说我自家格故事（十二）
本帖最后由 laosuzhou 于 2009-8-17 20:44 编辑说说我自家格故事（十二）
毛豆荚干、笋豆、盐金豆——三种传统格家庭自制零碎食
毛豆荚（苏州白话读作吉]）干、笋豆、盐金豆，是伲小辰光屋里勿断格自备零碎食。每日天下晚昼（苏州白话读作夏mai蛮tsou州]，下午），学堂里放仔夜学，回到屋里姆妈看见仔伲，第一句就会问：“肚皮啊饿？”然后就勒专门放零碎食格果子桶里抓一把毛豆荚干，传畀伲。让伲一面做功课，一面吃毛豆荚干。有转把，伲也会主动提出来：“姆妈，毛豆荚干啊有嘞呀？”只要听见姆妈肯定格答复，就会自家用小手到果子桶里搲两把毛豆荚干，塞勒自家格衣裳袋袋里，慢慢交剥来吃。
我小辰光，伲屋里每年到入秋，乡下格毛豆田侪要拔毛豆箕，改种别格物事格时节，也就是到毛豆要下市格时节，因为箇辰光个毛豆价钿已经跌到仔最低。伲姆妈就会到街浪拿乡下人卖格毛豆一担一担格买转来。然后叫人拣一拣，留下豆粒饱满格毛豆荚，到河滩浪汏干净，稍微沥沥干水，倒进大镬子里用水加盐烧熟。用笊篱那烧熟格毛豆荚从镬子里撩出来，勒大格匾里摊开，放到屋面浪向，勒太阳头里晒干。伲屋里每年晒格毛豆荚干，差弗多箇种三尺头格大匾，足足要摊满两大匾。等到毛豆荚晒干格辰光，两匾就剩一匾哉。箇个一匾收转来，大格果子桶揿揿实质放满仔一桶还多，多出来格再放勒一只小一点格果子桶里。小桶里格就是畀伲勒平时辰光拿来吃嘅。小桶里吃脱仔，姆妈会拿大桶里格毛豆荚干放点到小桶里。姆妈始终弗会让伲自家到大桶里向去搲毛豆荚干吃嘅，实梗一来，大桶里格毛豆荚干大部分就能够留到过年辰光作为新年礼物拿出来畀伲吃。
毛豆荚干是整个毛豆荚烧出来嘅，吃格辰光，要先拿毛豆荚剥脱，剥出来格毛豆呈茶褐色，皱起格毛豆皮浪显出一个个大小不一格勿规则多边形。放到嘴里，舌头舔着咸微微，牙齿咬上去韧纠纠，越嚼越香，等到吞咽格辰光回味起来，还有一丝丝甜津津个味道，真是让人越吃越想吃。实梗好吃格物事爹爹姆妈畀伲吃嘅晨光真是毫不犹豫，我从朆看见俚笃自家吃一荚！伲自家从来勿晓得拿剥出来送到爷娘格嘴里。后来从老屋里黄埭搬出来到仔苏州隔几年里向，因为条件格限制，姆妈就朆晒过毛豆荚干。搬到南京来仔格几十年当中，大概只晒仔一两转毛豆荚干，而且数量浪也勿如从前实梗多哉。想起往事，真想再回到童年时代去过箇种无忧无虑孩童生活！
勒浪呒不毛豆个季节，屋里常备零碎食，勒春天春笋上市格辰光，姆妈会得做好点笋豆，作为伲下昼里放仔夜学格零碎食。笋豆而勒既呒不笋亦呒不毛豆格时节，姆妈烧格盐金豆就是伲格零碎食。盐金豆侪勿是用新鲜格毛豆做嘅，而是用干格黄豆做嘅。
笋豆，顾名思义，原料当中一定是有笋，有豆。做笋豆，其中格笋使馆件格原料。做笋豆格笋是一种名叫“大园笋”格细而长格笋，箇种笋格竹头是用来做㫰衣裳竹头嘅。箇种竹头格笋只有勒春天有得买，而且上市格季节弗长，所以做笋豆是要受到大园笋上市季节辰光格限制嘅。
笋豆香气扑鼻，吃起来软硬适中，咸格里向海带一点点甜格滋味，味道十分鲜美，既可以当早晨头格吃粥小菜，也可以空口当零碎食吃白相。也是我小格辰光特别欢喜吃格物事。常常是一面晒，伲箇辈小人也一面偷来吃，往往是等到晒到要收格辰光，大匾里向只剩得一半哉。
做笋豆嘅大园笋，因为是春笋，勒浪烧笋豆之前，拿剥脱笋壳格笋要先切成条状，然后勒烧开格滚水里㩍一㩍，去脱一点春笋格苦涩味。少笋豆格辰光要重新换水，放进掏干净格黄豆，勒镬子里放满仔水一淘先烧，等到水烧滚仔以后再加盐、酿造格黄豆酱油、糖、五香八角等各种调味格作料，接着再勒灶膛里添柴继续焖烧，一直要烧到镬子里格水份全部收干格辰光为止。勒烧格辰光要经常用镬铲翻动笋豆，特别是到仔镬子里格水份就要收干格辰光，一方面要停止添柴，减小灶膛里格火头，一方面还要勿停格翻动镬子里格物事，防止笋豆烧焦。等到灶膛里格火隐脱之后，再焖脱一歇。然后拿镬子里格笋豆盛出来，摊勒大匾里，放到太阳头里晒，晒到七八成干格辰光就要拿笋豆收转来，放到有盖格罐头里存放起来。箇只罐头格笋豆顶多也就只能畀伲吃一个月格辰光，要想再吃，箇末就要等到来年格春天到仔再做哉。
盐金豆，做起来随意性比较大，因为原料简单，亦勿受时间、季节等条件限制，所以一年四季随便哪一日侪可以炒来吃。盐金豆实际郎就是一种盐水炒格黄豆，关键是要拿盐水炒干。炒好格盐金豆表面豆皮是皱格，还带一层盐霜。吃起来勿硬勿软，蛮有吃头嘅。除脱籽畀伲当零碎食吃之外，也可以拿俚得来当吃粥格小菜吃。
其实勒伲黄埭还有一种曾经勒外国格博览会浪得过奖格知名格特色食品：黄埭（水炒）西瓜子。瓜子壳亦是薄亦是脆，原汁原味，非常好吃。不过我朆学会吃瓜子格本事，勿会像别人实梗瓜子放到嘴里一咬两半爿，舌头一舔，瓜子肉留勒嘴里，吐出来格是两半爿瓜子壳。我就呒不箇种吃完整瓜子肉吐两半爿瓜子壳格本事。瓜子放到我格嘴里，总归是一咬瓜子变得粉碎，瓜子壳搭仔瓜子肉混勒一搭堆，要末连肉带壳一淘吃进肚皮里，要末拿咬碎瓜子连肉带壳统统侪吐出来。随意一直到现在，我看见仔细瓜子就一点也呒不兴趣。我格物会吃西瓜子，曾经引得勿少人侪说我根本勿像黄埭人。不过我格几个姊妹倒侪是吃西瓜资格好手，俚厾能够一次放十几粒西瓜子勒嘴里，一阵“咔咔”声响过后，吐出来格侪是两半爿格瓜子壳！ 小时候生活真丰富~ 说说我自家格故事（十二）
毛豆荚干、笋豆、盐金豆——三种传统格家庭自制零碎食
毛豆荚（苏州白话读作）干、笋豆、盐金豆，是伲小辰光屋里勿断格自备零碎食。每日天下晚昼（苏州白话读作[gho夏mai蛮ts ...
laosuzhou 发表于 2009-8-17 20:42 http://wu-chinese.com/bbs/images/common/back.gif
我想告诉大家，我最近勒一家上海格副食品店勒无锡、南京开格分店里向买着一种有笋丝格毛豆，箇个都吃起来格口味有点像我勒文章里向说格“毛豆荚干”里剥出来格毛豆格味道。而且价钿也勿贵，9.90元/斤。不妨买点尝尝。
页:
[1]