抱龙滩
古老百代格时光，有个年记蛮轻格姆妈。一日子，抱勒小人徕大源江江沿头嬉，搿个时光，水里岸勒來一粒红果果。姆妈潦起來拨伊小人搞搞，蛮记蛮记，小人一个手勒脱拨红果子跌勒嘴蒲里，又一记吞勒肚皮里。小人吞勒红果，头浪支出两只角，嘴唇边浪出出胡苏，眼睛趵出，面孔金黄，变勒个龙头。姆妈呆煞勒。一煞时光，小人格头颈长满金颜色格厣，头颈越伸越长，欧勒水里起勒。姆妈紧紧扱牢儿子，后歇來身子也变勒龙身，姆妈随便納个也扱约扱勿牢勒。金龙M巴一划，游勒江当中，一直孟北兴岸游起。姆妈沿勒江沿头蹩，嘴里呕着伢儿子格名字。姆妈呕一声，江里岸游龙別转头來伢姆妈一眼。生猛头，一声响，金龙腾空飞勒云高头，姆妈吓勒秀倒勒大源江边浪，爬约爬勿起來勒。
伢话，大源江边浪“抱龙滩”格地名就是为勒格个套头叫个。大源江过抱龙滩格段浪，有九个坞宕凹进石出，就是金龙九卯回头勒姆妈之故。
后歇來，金龙回乡娘，总归要刮腔大风，落场大雨，搿是望娘龙格威风，金龙拨伢姆妈上坟格眼泪水。
抱龙滩就是搿卯间上杭千高速配套公路骑牢大源江格地方，头场也叫“抱龙泰”，一直落拓有个瓦窑。
注译：
【古老百代】——很古
【江沿头】——江边
【嬉】——玩
【水里岸】——水中
【】——漂、流
【潦】——捞
【搞搞】——玩玩
【蛮记蛮记】——玩着玩着
【一个手勒脱】——一不小心
【跌】——落
【嘴蒲里】——口中
【又一记】——又一下
【支出】——冒出、由里往外长
【胡苏】——胡子
【趵出】——突出
【厣】——鳞
【欧】——伸、夠
【扱牢】——拦腰抱住
【随便納个也】——再也
【M巴】——尾巴
【一划】——一摆、一甩
【孟】——向
【北兴岸】——北边
【蹩】——追
【呕着】——喊着
【別转】——回转
【生猛头】——忽然
【云高头】——云上
【秀倒】——瘫倒
【江边浪】——江边
【就是为勒格个套头】——就为此因
【格段浪】——这一段
【坞宕】——地方、处
【凹进石出】——弯曲
【之故】——之因
【刮腔】——刮阵
【搿卯间】——现在
【骑牢大源江】——跨越大源江
【头场】——过去
【一直落拓】——一直
页:
[1]