laosuzhou 发表于 2010-8-12 07:10:25

今年箇只“秋老虎”一定勿退班

今年箇只“秋老虎”一定勿退班中国人格老祖宗拿立秋以后格天气炎热称为“秋老虎”。按照古人个说法,“秋老虎”还有雌、雄之分。箇只“老虎”格“雌、雄”就看“立秋”箇日格阴历日脚究竟是逢双还是逢单,逢单就是“雄老虎”,逢双呐就是“雌老虎”哉。而且还说,“雌老虎”比“雄老虎”,热格程度要激滚,也就是说,雌格“秋老虎”比雄格“秋老虎”热得厉害,热格辰光要长。
勒“立秋”来临之前,我曾经查过今年格挂历(一张纸头一个月格箇种月历),今年格“立秋”是阴历六月廿七,逢单,是一只雄格“秋老虎”,应该是热格程度要退班点,热格辰光也会短一点。我心里倒蛮开心。因为“秋高气爽”总归是一年当中最适意格辰光。
不过,老祖宗还有一句气象谚语,是实梗说嘅:“早立秋,凉飕飕;晏(苏州白话读作‘唉’)立秋,热吼吼。”该搭点说格“早、晏”,分界点勒浪中午时分,午时二刻,相当于现在格正午时分,中浪十二点钟模样。勒我查格挂历浪是呒不标明节气时辰格,所以当时我勿晓得今年格“立秋”是早还是晏。后来听别人告诉我,今年格“立秋”时辰是22点以后,也就是说,今年格“立秋”是晏立秋。立秋以后格“秋老虎”是一定要让人热得发吼嘅。

姬远清 发表于 2010-8-12 14:38:45

天气本身就来许反常……

苦露酷亿 发表于 2010-8-15 15:34:21

啊啊啊啊,我要加班,啊啊啊,我要空调,啊啊啊啊啊啊

钱塘知府 发表于 2010-8-15 16:25:03

书店里向有免费个空调吹个

吴人 发表于 2010-8-15 16:46:34

现在个极端天气嚜越来越多咧。今年冷天头也直头长,热天头也还有得热热嘚。
页: [1]
查看完整版本: 今年箇只“秋老虎”一定勿退班