laosuzhou 发表于 2010-8-6 16:31:19

说说我自家格故事(十七)我记忆当中格“巧日”

说说我自家格故事(十七)我记忆当中格“巧日”我记得,我小格辰光,大人厾拿农历七月初七称做“巧日”。还听伲爹爹姆妈告诉我,每年阴历格七月初七,是传说当中畀王母娘娘拆散格一对恩爱夫妻——牛郎、织女,通过“鹊桥”相会格日脚。而且说:每到箇个一日,天浪就看勿见有喜鹊飞格身影,也听勿见喜鹊格叫声。说是因为勒箇个一日,天下所有格喜鹊侪飞到天浪箇条银河浪向去搭桥去哉,搭好仔鹊桥让牛郎、织女勒鹊桥浪相会。现在也有人拿农历七月初七箇日称为中国格“情人节”。
每年格阴历七月初七,侪勒浪立过仔秋以后,但是仍旧还勒浪还朆开学格暑假里向,箇个辰光两三场秋雨之后,盛夏格暑热已经有所收敛,然而凉气还朆降临,清澄而蔚蓝色格天际,漂浮着洁白格云朵,正是一派秋高气爽格景象。
“乞巧”,就是勒实梗一种天气格“巧日”里盛行于民间格一项传统格民俗民风活动。不过,勒我格记忆当中,箇项民俗活动格主角主要是女性,尤其是未成年女性和女小人。当然也会友看热闹格男人搭仔欢喜凑热闹格男小干参与。到仔阴历七月初七箇日格中浪向(中午时分),掇一只方凳或者小台子到太阳头里,勒凳子或者台子当中放一只盛有大半碗“阴阳水”格碗,所谓“阴阳水”,就是说箇只碗里向格水是用一半河水搭一半井水镶起来格水。
“乞巧”呐,就是拿一根绣花针放勒箇碗水格水面浪,箇个动作称为“厾巧”。当然,说么说“厾”,是勿可以真正拿绣花针厾了阴阳水里嘅,因为钢铁比水重,绣花针真正厾到水里,一定会立刻沉到碗底浪嘅。所以“厾巧”是要厾格人拿箇根绣花针轻轻交,平平稳稳格放到箇只碗格水面浪去嘅。只有实梗,箇根绣花针才会漂勒箇只碗格水面浪。箇是一桩轻巧而细心格事体,所以也只有女性比较适宜。我小辰光也去凑过热闹,但是厾十转倒有八转箇根针侪是沉到碗底下嘅。
勒“厾巧”成功仔之后,就要看太阳投射下来,照到碗浪,箇支绣花针勒碗底浪形成格黑影像啥个物事?婉底浪向黑影,有辰光像一支“笔”,有辰光像一根“棒锤(苏州白话读作‘蒲柱’,就是过去到河滩头浪汏衣裳辰光,用来捶打衣服格木棒。也可以拿来打人)”,也有像“刀剑”形状嘅,等等。箇是因为钢针经过人格手指接触,钢针表面就会留下来人手指头浪皮肤所分泌格油脂,油脂勒水面浪搭水是互相排斥嘅,所以水搭针格接触面会受到表面油脂格影响,以至于也影响到箇根针投到碗底浪格黑影形状格变化。箇种变化还会随着拿箇根针格人数个增加而使得黑影格形状变化多端。然后,再根据碗底浪黑影格形状,推断厾巧人是聪明还是愚笨。我想用勿着我多作解释,读者一定能够猜得出判断格结果嘅。
我小辰光,每逢“巧日”,爹爹姆妈还会教伲看天浪格“巧云”。所谓“巧云”,就是天浪漂浮格白色云朵看上去像某样物事,譬如,一匹奔跑格骏马;一只弯角格绵羊;一只刚刚睏醒格狮子;一只下山觅食猛虎;……。当然,箇侪是平看格人格想像。而且箇种“巧云”勒天空浪漂浮向前格过程当中还会出现变化,譬如,马变成羊;羊变狗等等。
现在回忆起来,勒伲小格辰光,黄埭箇个小场化,除脱仔有数格几爿规模勿大格面粉厂、一家榨油格作坊、一家作麦芽糖格糖坊、一家家庭染布作坊之外,几乎呒不产生环境污染格工业企业。所以,箇辰光望出去,天,总归是蓝格。只要是晴朗个天气,抬头望天,天浪总归是蓝天漂浮着白云。但是现在就勿对哉,蓝颜色格天空已经几乎看勿见哉,望出去只有灰蒙蒙格一片。黄埭河里向格河水,也总归一年四季侪可以清澈见底,箇条河里格水完全可以满足镇浪格老百姓饮用。讲究一点格大人家屋里向还有井,俚厾吃就用井水,汏物事就到河滩头浪去。我勒上个世纪七十年代中后期、八十年代中期,曾经先后两次到过黄埭。当时辰光,我看见黄埭河里格水是黑格,同时还散发出阵阵臭味。因为来去匆匆,我呒不辰光去深入了解,箇辰光黄埭人吃格是啥个水,用格亦是啥个水?
页: [1]
查看完整版本: 说说我自家格故事(十七)我记忆当中格“巧日”