laosuzhou 发表于 2009-8-24 08:11:47

说说我自家格故事(十四)

说说我自家格故事(十四)听书伲黄埭镇,过去辰光虽说只是一个人口勿过一万,小街仅有三里格小码头。我旧年勒《中国评弹网》浪看见一只关于《举办黄埭书场创办一百周年庆典》格帖子。帖子郎介绍黄埭书场勒浪苏州评弹界心目当中格地位格搭重要性格辰光说,黄埭勒苏州评弹界来说,却是俚厾出道进大上海之前,一个必须要前来经受黄埭听客考验格重要码头!看仔实梗个介绍。现在想起来,为啥后来箇点勒上海滩格书坛浪名震四方,名气响得“刮啦啦”格响档,像说小书(弹词)格徐云志、严雪亭、蒋月泉、张鉴庭张鉴国、杨振雄杨振言、朱雪琴、徐丽仙,还有说大书(评话)格唐耿良、曹汉昌等等,我小辰光能够勒黄埭格书场里向侪看见过俚厾勒书坛浪表演格风采哉。至于江苏搭仔苏州格评弹名家,可以说呒不哪一个朆到黄埭来说过书。现在看来,作为一个黄埭人,还真格觉着有点自豪格感觉嘞。
对于帖子浪说格“黄埭书场”,我脑子里始终想勿起来是啥个样子。我只记得,我小格辰光,全黄埭搭戏、曲有关格文化娱乐场所只有三搭场化,两搭是唱戏嘅:东横头闹市区一搭,名叫“大雅”格戏馆,京戏、绍兴戏(越剧)、上海滩簧(沪剧)、文明戏(话剧)、滑稽侪勒箇爿戏馆里登台演出过;一搭是勿晓得名字嘅,勒中市桥下塘格一爿堂口并勿大格茶馆,主要是提供畀小戏班(草台班)唱戏,像无锡摊簧、江北戏(扬剧、淮剧);说书格只有一爿,离伲屋里最近,勒河渎桥西堍浪格,名叫“东来”格书场。
蒋月泉先生生前各一只保留节目,弹词开篇《杜十娘》格弹词作者,朱恶紫先生,也还是伲格黄埭人嘞。俚真实个名字叫“朱湘神”。“恶紫”是俚格笔名。朱湘神还是伲爷同父异母格兄弟,伲格嫡亲阿叔。零二年,勒外地格大阿哥、已经移居香港格姊妹,搭仔我一道回到阔别自五十年格生身地,黄埭老屋里去看看,一位嫡亲个堂房兄弟对伲说起过箇两位已故耄耋老人格一段未了情缘。自从蒋月泉先生得到《杜十娘》开篇格唱词之后,爱不释手,拿来作为自家格保留节目。勒上海电台播出格辰光,蒋先生多次称赞唱词写得好,并表示勒有生之年一定要亲自登门拜访箇位朱恶紫先生。后来为仔要实现蒋先生个心愿,经过上海、苏州两地电台电视台格多方寻访,终于勒黄埭寻着仔朱恶紫先生,勒二零零零年约好仔会见格日脚。然而“天有不测风云,人有旦夕祸福”。朱恶紫先生就勒即将会面箇日个清晨,突发心脑血管疾病而猝然去世。让这段情缘终于成了不了之情。
书场里格书分日场、夜场,日场开书勒下晚昼二点钟,夜场开书末吃过仔夜饭以后格七点钟。一场书说下来,大约摸三个钟头,当中有十来分钟格“小乐会”,也就是中场休息。书场里后场格堂倌(服务员)每一场书还会绞上两趟热毛巾,从后场厾畀前场格堂倌,一把一把格送畀书场里格听客揩把面孔,醒醒神,作为回报,听客揩过面孔之后也会多多少少破费两钿,畀点小费畀堂倌。按照箇辰光行业格约定俗成,立仔个规矩,无论是戏馆,还是书场,“小乐会”一过,下半场开书以后,勒门口卖书筹格老板就要停止买筹。门口守筹格门倌也可以随便放人进来听白书、看白戏,箇叫做“放淌”。特别是书场里,假使请得来仔有名气格响档说书先生,一到“放淌”,门外头箇点想听书而呒不铜钿买筹进来听书格人就会像潮水实梗涌进书场,哪搭有空就立勒那搭,拿个书场书台跟前、走路头浪,所有格空场化侪畀箇班听白书格轧得实实品品。
我箇辰光,勒黄埭小学里读书,学堂勒浪东横头,靠近着着东横头第一顶桥,庙桥格场化。伲屋里向勒浪芳桥堍浪。来来回回侪要路过河渎桥堍浪格东来书场嘅。只要书场里有说书,特别是说大书,《三国》、《水浒》、《岳传》、《英烈》,我最欢喜听。下晚昼放仔夜学转来,经过书场门口大约三、四点钟,书场里日场格书已经说脱仔大一半哉,不过还朆散场,箇个辰光,书场门口已经勿买书筹哉,像伲箇班小人要进书场去听白书,也勿会有人拦嘅哉。碰着箇种机会,我每转勿是先回到屋里放脱书包,而是揹仔书包直接进书场去听白书。我一进书场就勒说书先生说书格书台边浪一立,比买前排座位听书格听客离说书先生还要近!拿说书先生格说、噱、做、打看得清清爽爽。小辰光,因为文化程度格关系,对书场里说格小书,我格兴趣就大退班哉。除非是特别噱头,或者欢喜调门,像张鉴庭格书:《颜大照镜子》、《钱笃招求雨》等特别发噱格书,我就是百听勿厌嘅。
页: [1]
查看完整版本: 说说我自家格故事(十四)