laosuzhou 发表于 2009-6-25 10:27:24

说说我自家格故事(四)

本帖最后由 laosuzhou 于 2009-6-25 16:40 编辑

说说我自家格故事(四)
跟仔阿哥一道白相
仁官,是我大阿哥格小名,俚呐比我大五岁。平常辰光,有俚自家格一班白相淘伴。学堂里放仔学,阿哥总归会搭仔俚格一班白相淘伴约好仔一淘出去白相,勿大愿意带仔自家格兄弟姐妹一淘出去白相嘅。不过,闲话要说转来,伲阿哥也勿是从来勿带伲一淘出去白相嘅。勒我脑子里影响最深格也有过勿少次。
暑假里,夜幕降临,像伲阿哥实梗年纪格一班大小干,有格辰光也会得带仔伲箇班小小干一淘白相一种叫“官兵捉强盗”格游戏。大家事先就已经约好仔啥辰光了啥场化集中。屋里有电筒嘅,手里拿好仔电筒。等人头到齐,大小干、小小干拆一分为二,一半大小干带仔一个小小干,弟兄淘里总归会分勒一淘嘅。所以白相箇种游戏,我总归跟牢胶仔伲阿哥。
人头分派定当,两方面各推举一个大小干做头头,由两个带头人用“猜东猜”格方法来决定哪(读作洛,疑问词。下同)个一方当官兵,哪个一方当强盗。按照一般格规则,“猜东猜”,就是现在格小人也拆欢喜用来决输赢格“石头剪刀布”猜拳游戏。“猜东猜”也像一般格游戏比赛,以三局两胜决定输赢。赢格一方就当“官兵”,输脱格一方就当“强盗”。
游戏开始之后,当“强盗”格一方先自家寻壁壁角角勿容易畀别人寻着格场化叛(躲藏)起来,叛格辰光长短是事先规定好嘅。等辰光一到,当“官兵”一方格领头人已发出指令,就三三两两,开亮仔手里葛电筒来寻,畀“官兵”寻出来格“强盗”只要还朆畀对方捉牢,还可以逃跑,“官兵”就勒后头追。箇个辰光,可以看见伲箇班大大小小格小干儿(读作鱼)三三两两满街格大呼小叫,奔来奔去。直到当“强盗”格一方所有人侪畀“官兵”一方捉牢就算游戏结束。
假使游戏继续进行,两方面格角色对调,也就是原来扮“官兵”格一方改扮做“强盗”,原来“强盗”格一方掉转来改扮“官兵”。有辰光,一盘游戏结束,下一盘游戏开始之前,两方面格头头再用“猜东猜”定输赢格办法来决定哪方当强盗或者官兵。
我小格辰光,黄埭,箇个场化小得真可以称得上是个弹丸之地了。整条街浪呒不高楼大厦,最高格要算西横头黄埭中学后头大操场浪格一座瞭望用格碉堡哉。一条黄埭河贯穿全镇,拿个黄埭分成上塘、下塘两个部分。上塘一条街,街路两边大小商铺林立,文化娱乐场所间插其间,下塘也有一条断续而不规则格街,临河一侧差勿多侪是石驳岸,另一侧则大多搭旷野、农田相连,零散分布着几家工厂、手工业作坊,外来人口勒下塘相对比较集中。上塘搭下塘之间从东到西有庙桥、新黄埭桥、芳桥、中市桥、香花侨等五座桥梁通连,伲屋里向就勒芳桥堍笡(读作“且”,斜)对面。从最东横头格庙桥到最西横头格香花侨,总共也只不过三里路。伲白相“官兵捉强盗”游戏格范围一般侪勒新黄埭桥到中市桥之间上、下塘两条街格范围以内。白相箇种“官兵捉强盗”格游戏侪是男小干,一场游戏白相下来,个个侪是大汗淋漓,浑身侪是汗酸臭味。身浪格衣裳全部湿透,就像勒雨头里沰(读作q]厾)过格一样。下晚昼格浴赛过朆淴,上床睏觉以前要末再淴一次浴,要末拿浑身上下好好交揩一揩,拿身浪格汗酸臭味揩脱仔才好让伲到床浪去睏觉!
倷啊曾看见过“鬼(读作举)火”?绿悠悠格火光,勒空旷格野田爿里飘来荡去格就是“鬼火”,我看见过,也就是跟仔伲阿哥,搭俚格一斑大小干一淘白相格辰光,勒野田爿里看见过嘅!现在,读过书格人,呒不哪个勿晓得,“鬼火”实际朗是漂浮勒空气当中格磷元素,搭流动格空气之间发生磨擦以后产生自燃格一种自然现象。记得也是一年格暑假里向,一日吃过仔夜饭,大大小小格小干儿搭往常一样,由箇里向个大小干带仔一淘白相。里向有一个搭伲阿哥一样大格,名叫元熙格阿哥,对伲箇班小小干说,今朝带恁厾到野田爿里去看鬼火。恁厾勿怕就跟伲一淘去。啥人胆小,勿敢去,箇末倷现在自家先转去,覅跟牢仔伲!
其实,箇辰光,各班大大小小格小干儿跟牢仔俚,已经走过芳桥,穿过仔芳桥下塘格一条屎坑弄,聚集勒埭基坟个空地浪哉。四面是墨黜黑格一片野田爿,再说伲老早听大人说过,各条屎坑弄格式坑棚里曾经吊杀过人!倷想,箇辰光还有哪个小干再敢离开箇班大小干,自家一干子转去呢?只好自家壮壮胆,答应一声:“伲侪勿怕!”大家跟牢仔俚厾。你几个小小干小手相搀,夹勒大小干格当中,沿只能一个人走格田岸,一直望西,沿路还有几搭乱葬岗,一直走到西横头格香花弄外格空地浪。天气闷热加上心理恐惧,你已经走得满头大汗淋漓嘅哉。就勒格辰光,只听见一阵“啪啪”声从身后划空而过,一个小小干下的“哇——”格一声大哭起来。听见有人一哭,我格心里也虚落落起来,马上我格两只小手抓紧仔自家格阿哥。阿哥说:“呒啥吓头,刚刚飞过去格不过是只野鸡而已!”听仔自家阿哥劝慰,我也勿再怕哉。不过,箇日子格夜里,伲搭仔箇班大小干一淘真格看见仔勒野田爿里飘来荡去,颜色绿悠悠格“鬼火”。

泖港人 发表于 2009-6-25 11:12:36

写得相当详细,我想请问“业绩”是啥格物事?

laosuzhou 发表于 2009-6-25 11:23:11

写得相当详细,我想请问“业绩”是啥格物事?
泖港人 发表于 2009-6-25 11:12 http://wu-chinese.com/bbs/images/common/back.gif

啊呀,真正对勿起,是我格一时疏忽,箇是汉语拼音输入里经常出现格让我苦笑勿得格事体。朆拿俚改过来。“业绩”应是“野鸡”之误。倷如果有办法,箇末拜托倷帮我了上面格文章里改一改。谢谢倷哉!

泖港人 发表于 2009-6-25 13:42:20

箇个要倷自家改嘅,我呒不权限格wae,或者是版主领导们倒是可以改脱俚嘅。
倷看看每一只自家写个贴子下头有编辑两个字,倷点击编辑就可以改哉。

大椿 发表于 2009-6-26 11:08:45

“大小干、小小干”,似应写作“大小官、小小官”,或者“大小倌、小小倌”?

人人头 发表于 2009-6-26 11:34:40

恁厾,好像是常熟话哇~~~

埭基坟是什么啊?

laosuzhou 发表于 2009-6-26 17:23:58

恁厾,好像是常熟话哇~~~

埭基坟是什么啊?
人人头 发表于 2009-6-26 11:34 http://wu-chinese.com/bbs/images/common/back.gif

1、恁厾,勒陆基格《苏州同音常用字汇》里写作“{口五}”,勒叶祥苓格《苏州方言志》、钱乃荣格《当代吴语研究》里写作“唔”,箇两个带口字旁格字用来做人称代词,我觉着总归勿大恰当。所以拿俚换成“恁”字。“恁”,新版《辞海》里注二:“同‘您’”。协会推荐格《北部吴语书面用字》注作“,你(常熟方言)”。我觉着拿俚再转个音,用到苏州话里。所以勒我格《吴语方言(苏州话)书面用字》里,我拿俚注作。恁厾,我格注音是,苏州话里格“你们”。
2、“埭基坟”是黄埭芳桥下塘一个高墩墩格地名。2002年我到黄埭去,已经寻勿着箇个地方哉。

人人头 发表于 2009-6-26 19:39:04

这个高墩墩弄不巧还是个什么时代的文化遗址哩。。就像草鞋山、赵陵山一类的
页: [1]
查看完整版本: 说说我自家格故事(四)